(1) 1. O (Annabi Muhammadu) saɣim o nini ni, ka lebi biri.
(2) 2. Domin zom kana o sani na zuɣu.
(3) 3. (Yaa nyini Annabi)! Bo n-leei baŋsi a ni di yi pa shɛli o naan niŋ kasi.
(4) 4. Bee ka o wum a wa’azu, ka wa’azu maa niŋ o anfaani?
(5) 5. Amaa! Ninvuɣu so ŋun mali buni maa.
(6) 6. Ka a zaɣisim be o ni.
(7) 7. Tɔ! Bo n-leei yɛn niŋ a chuuta o yi bi niŋ kasi.
(8) 8. Amaa! Ŋun kana a sani n-ti bɔri yomyom’ maa.
(9) 9. Ka o nyɛla ŋun zɔri Naawuni.
(10) 10. Ka a nyɛla ŋun yi o yɛla ni.
(11) 11. Haifa! Achiika! Di nyɛla teebu
(12) 12. Dinzuɣu, ŋun bɔra ŋun zaŋ li n-teei o maŋa.
(13) 13. Di bela kundi shɛŋa din mali jilma la puuni.
(14) 14. Ka di nyɛ bɛ ni duhi shɛli, ka nyɛla din mali kasi.
(15) 15. Ka di be Malaaikanim’ ban sabri (ninsalinim’) tuuntumsa nuu ni.
(16) 16. Darzanima, ban doli Naawuni zaligu.
(17) 17. Bɛ narim ninsala (chɛfura), bo nleei chɛ ka o niŋ gutulunsi?
(18) 18. Ni bimbo ka O (Naawuni) nam o?
(19) 19. Ni maniyyi (dablim kom) ka O nam o, ka nam O saɣisi.
(20) 20. Din nyaaŋa ka O balgi soli n-ti o.
(21) 21. Din nyaaŋa, ka O chɛ ka o kpi, ka zaŋ o niŋ gballi ni.
(22) 22. Din nyaaŋa, O yi bɔra, ka O lahi yiɣisi o.
(23) 23. Haifa! O (ninsala) bi tum Naawuni ni puhi o shɛli niŋbu.
(24) 24. Dinzuɣu, ninsala yulmi o bindirgu.
(25) 25. Achiika! Ti (Tinim’ Naawuni) kpaai la kom na (sagbana ni) kpaabu ni yɛlimaŋli.
(26) 26. Din nyaaŋa, ka Ti chɛ ka tiŋgbani tahibɔɣi, bɔɣibu ni yɛlimaŋli.
(27) 27. Din nyaaŋa, ka Ti chɛ ka bimbilima yi di puuni na.
(28) 28. Ni inabi (sinsaba) mini momaha.
(29) 29. Ni zaituun mini dobino.
(30) 30. Ni puri din laɣim tihi pam.
(31) 31. Ni binwola mini biŋkobri bindira.
(32) 32. Ka di nyɛla nyεɣisim n-ti ya, n-ti pahi yi biŋkobri.
(33) 33. Dinzuɣu, tahigu din pahi ayi yi ti kana.
(34) 34. Dindali ka ninsala yɛn ti zɔri kachɛri o mabia.
(35) 35. Ni o ba mini o ma.
(36) 36. Ni o paɣa mini o bihi.
(37) 37. Dindali maa, bɛ puuni ninvuɣu yino kam daa ti yεn malila yɛli shɛli din saɣindi o.
(38) 38. Dindali maa, ninvuɣu shɛba nina yɛn ti malila neesim.
(39) 39. Ka nyɛla din lara, ka mali suhupɛlli.
(40) 40. Dindali maa mi, taŋkpagbilgu yɛn ti limsila shɛba nina polo.
(41) 41. Ka zimsim ŋari li.
(42) 42. Bannim’ maa n-nyɛ chɛfurinima, ka nyɛ bibiɛhi.