(1) 1. M (Mani Naawuni) po sagbana, ka po Taariki.
(2) 2. (Yaa nyini Annabi)! Bo n-leei baŋsi a, bo n-nyɛ Taariki?
(3) 3. Di nyɛla saŋmar’ so ŋun ne pam.
(4) 4. Nyɛvuli n-kani naɣila di malila ŋun (Malaaika so) guli li.
(5) 5. Dinzuɣu ninsala lihimi bɛ ni nam o na ni shɛli?
(6) 6. Bɛ nam o mi ni ko’ shɛli di puhiri yiri na.
(7) 7. Ka di yiri doo yaaŋkobli mini paɣa nyokoba ni na.
(8) 8. Achiika! O (Naawuni) mali yiko din ni tooi labsi o na (o nyɛvuli ni).
(9) 9. Dabsi’ shɛli bɛ ni yɛn ti viigi ashiya.
(10) 10. Ka o (ninsala) ti ka yaa bee sɔŋda.
(11) 11. M (Mani Naawuni) po sagbana shɛli din mali sakom din miri ka labri mira.
(12) 12. Ka po tiŋgbani shɛli din tahiri bɔɣira (ka bindira yiri na).
(13) 13. Achiika! Di (Alkur’aani) nyɛla yɛltɔɣa din wolgiri yɛlimaŋli mini ʒiri sunsuuni.
(14) 14. Yaha! Di pala kpɛrigu.
(15) 15. Achiika! Bɛ (chɛfurinim’) narila nabiɛri.
(16) 16. Ka N (Mani Naawuni) gba nari ba nari.
(17) 17. Dinzuɣu (yaa nyini Annabi)! Naɣisim ti chɛfurinima, ka guhi ba ni baalim.