Қисқача танитув

Жорий йилнинг 5-февраль сешанба куни халқоро исломий фиқҳ маркази бош котиби Саудия Арабистони уламолар кенгашининг аъзоси ўнлаб китоблар соҳиби аллома Шайх Бакр ибн Абу Зайд узоқ йиллардан буён безовта қилиб келаётган касаллиги сабабли оламдан кўз юмди.

Тўлиқ тавсиф

Шайх Бакр ибн Абу Зайд оламдан кўз юмдилар.

Жорий йилнинг 5-февраль, сешанба куни халқоро исломий фиқҳ маркази бош котиби Саудия Арабистони уламолар кенгашининг аъзоси, ўнлаб китоблар муаллифи аллома Шайх Бакр ибн Абу Зайд узоқ йиллардан буён безовта қилиб келаётган касаллиги сабабли оламдан кўз юмди.

Шайх раҳматуллоҳи алайҳ Ислом умматининг  буюк забардаст алломаларидан бири эдилар. Шайх умрини ва бор кучини дин хизматига бағишладилар. Шайх бир даврнинг ўзида ҳам воиз, ҳам қози, ҳам ўткир тадқиқотчи олим эдилар.

Олимнинг вафоти дунё мусулмонлари учун катта мусибат бўлди. Аллоҳ таолодан марҳумни мағфират қилиб, Ўз раҳматига буркашини, дин йўлида чеккан заҳматлари эвазига улкан ажр-мукофотлар беришини умид қиламиз. Марҳумнинг оила аъзолари ва яқинларига эса тоғдек сабр тилаб қоламиз. Инна лиллаҳи ва инна илайҳи рожиуун.

Шайхнинг ҳаётидан лавҳалар.

Шайх Бакр ибн Абу Зайд ҳижрий 1365 санада машҳур Қузоа қабиласининг бани Зайд уруғи оилаларидан бирида дунёга келдилар. Бошланғич илмларини олиб, ҳижрий 1375 санада Риёз шаҳрига кўчиб келдилар. Бу ерда илмларини давом эттириб, аваал илмий маъҳадни, сўнгра ҳижрий 1387/88 йилларда шариат факультетини тамомладилар. 1384ҳ. санада Мадинаи Мунавварага кўчиб келиб, Ислом Университети қошидаги кутубхонада бош мудир бўлиб ишладилар. Шайх раҳматуллоҳи алайҳи расмий вазифаларига қарамай ҳаргиз уламолар суҳбатини тарк қилмас эдилар.

Риёзда юрган чоғида Қози Солиҳ ибн Мутлоқ ҳузурида илм таҳсили билан машғул бўлдилар. Мақомоти Ҳаририйдан йигирма бешта мақомни ёддан ўқиб  ўтказдилар.

Маккаи Мукаррамага келган вақтларида устози шайх Абдулазиз ибн Абдуллоҳ ибн Боз раҳматуллоҳи алайҳига Ҳарам Шарифда Ал-Мунтақо китобининг ҳаж бобини ўқиб ўтказдилар.

Мадинаи Мунавварага келган йиллари буюк аллома Муҳаммад Амин Шинқитийга шогирд тушиб, устози дунёдан кўз юмганга қадар кўплаб китоблардан таълим олдилар. Азвоул-Баён тафсири, Баҳс ва мунозара одоби китоби шулар жумласидандир. Шайх Бакр ибн Абу Зайд айниқса насаб илмида аллома Шинқитийнинг мумтоз шогирдларидан бирига айландилар.

Шайх Бакр ибн Абу Зайд 1399-1400 ҳ. саналарда магистратура дипломини ёқладилар. 1403 ҳ. санада эса докторликни ёқлаб, фан доктори унвонига сазовор бўлдилар.

Шайх умматга ҳадис, фиқҳ, луғат, маърифат ва бошқа соҳаларда беқиёс асарлардан элликдан ортиқ асарлар ёзиб қолдириб, илм-маърифит тарқатишда ўзининг катта ҳиссасини қўшдилар.

Аллоҳ таоло у кишини Ўз раҳматига олиб, фирдавс боғидан жой беришлигини сўраб қоламиз. Амин.

Фикрингиз биз учун муҳим