(1) 1. Sε Asεm (kεseε a εrebesie) no nya si a,
(2) 2. Nkontompo biara nni si a ebesie no ho.
(3) 3. (Saa Da no), yεbεbrε (nnipa no) bi ase, ama (ebinom nso) so.
(4) 4. Sε asaase woso nwosoeε (denden) no,
(5) 5. Na yebubu mmepͻ gͻsͻgͻsͻ –
(6) 6. Na εyε sε mfuturo a εretu hwete a,
(7) 7. (Saa Da no) mobεyε akuo ahodoͻ mmiεnsa.
(8) 8. Wͻn a wͻ’yε Nifa so foͻ no; hwan nom ne wͻn a wͻ’yε Nifa so foͻ no ?
(9) 9. Ɛne wͻn a wͻ’yε Benkum so foͻ no; hwan nom ne wͻn a wͻ’yε benkum so foͻ no?
(10) 10. Ɛne (gyidie ho nyuma mu) adikanfoͻ no; wͻn ne (daakye no mu) adikanfoͻ.
(11) 11. Woinom na wͻ’bεbεn (Nyankopͻn),
(12) 12. Wͻ Anigyeε Aheman no mu.
(13) 13. Dodoͻ no befri tetefoͻ no mu,
(14) 14. Ԑna kakraabi nso befri nkyirimma no mu.
(15) 15. Wͻ’bεtena ahennwa a yεde sika kͻkͻͻ ne dwetε na anwene so.
(16) 16. Wͻ’bεgyegye ada mu ahwε wͻn ho wͻn ho anim.
(17) 17. Mmeranteε a wͻ’te nkwa mu daa na wͻ’nnwu da bedi wͻn hͻ akͻneaba (asom wͻn),
(18) 18. Wͻ’de nkoraa ne sanya nkuruwaa ne gyansee a nsa korͻgyee wͻ mu.
(19) 19. Wͻn ti mmpae wͻn, na wͻ’mmoro nso,
(20) 20. Ne nnuaba biara a wͻn ara bεhwε mu ayi deε wͻ’pε.
(21) 21. Ne nnomaa nnam biara a wͻn kͻn dͻ.
(22) 22. Ne (mmaa) akronkron ahoͻfεfoͻ a wͻn ani akεse-akεse,
(23) 23. (Wͻn ho fε) tesε nhwene pa bi a yahyε da de asie abͻ ho ban.
(24) 24. (Woi) yε akatua ma dwuma (pa) a wͻ’diiε no.
(25) 25. Wͻ’nnte nsεm hunu anaa kasa bͻne biara wͻ hͻ.
(26) 26. Gyesε ‘Salaaman Salaaman’ Asomdweε! Asomdweε!
(27) 27. Ɛna Nifasofoͻ no; hwan nom ne Nifaso foͻ no?
(28) 28. (Wͻn wͻ) nnua bi a εho yε trͻmtrͻm a nkasεε nni ho bi mu,
(29) 29. Ne nkwadu a abͻ esa-esa,
(30) 30. Ne enyunu a εbae trε mu,
(31) 31. Ne nsuo a εtene ba (abrε biara),
(32) 32. Ne nnuaba a abu soͻ,
(33) 33. (Nnuaba no berε) to nntwa, na yennsi wͻn ho kwan nso.
(34) 34. (Wͻn) wͻ aban soroͻ a εwͻ soro so.
(35) 35. Nokorε sε Ya’bͻ wͻn (mmeͻε foforͻ) paa,
(36) 36. Ɛna Y’ama wͻn ayε mmabunu,
(37) 37. Ɔdͻ ne ahomeka (wͻ wͻn mu); na wͻn (nyinaa) bͻ atipεn.
(38) 38. (Woi) wͻ Nifaso foͻ no.
(39) 39. Dodoͻ no befri tetefoͻ no mu,
(40) 40. Na dodoͻ no nso afri nkyirimma yi mu.
(41) 41. Ɛna Benkum so foͻ no; hwan nom ne Benkum so foͻ no?
(42) 42. (Wͻn) wͻ mframa hyew ne nsuo hyeε mu,
(43) 43. Ne wisie tumm nyunu mu,
(44) 44. (Saa wisie no) nyε nyunu na (wͻ’nnya emu) anigyeε anaa papa biara.
(45) 45. Nokorε sε, kane no na wͻ’gye wͻn ani,
(46) 46. Na wͻ’tͻ kͻ bͻne akεseε so.
(47) 47. Na wͻ’ka sε: “Sε yewu na yε’yε mfuturo ne nnompe a, nokorε sε yεbεsan anyane yεn?
(48) 48. Anaasε yεn agyanom tetefoͻ no (nso)?
(49) 49. (Nkͻmhyεni), ka sε: “Tetefoͻ no ne nkyirimma no (nyinaa),
(50) 50. Nokorε sε yε’bεboa wͻn ano akͻ εberε a yahyε no wͻ saa Da no mu no“.
(51) 51. Afei mo ayerafoͻ no a mofaa (nokorε no) nkontompo no,
(52) 52. Mobedidi afri dua Zaqqum so,
(53) 53. Na mode ahyε (mo) afru ma,
(54) 54. Na moanom nsuo hyeε agu so;
(55) 55. Na (mo) bεnom no sεdeε yoma a sukͻm deno renom nsuo.
(56) 56. Woi na εbεyε wͻn brεsuo a yεde bεma wͻn akwaaba wͻ (daakye) akatua Da no.
(57) 57. Yεn na Yε’bͻͻ mo na afei adεn nti na monye nnie?
(58) 58. Moahunu (ahobaeε) a mohwie gu (ͻbaa awodeε mu) no?
(59) 59. Mo na mobͻ (akͻdaa no) anaasε Yε’ne Ɔbͻͻ Adeε no?
(60) 60. Yεn na Y’ahyehyε owuo de ato mo soͻ; na entumi mmu mfa Yεn so-
(61) 61. -Sε Yε’bεsesa mo tebea yi abͻ mo akͻ (tebea foforͻ) a mo nnnim mu.
(62) 62. Ampa sε, monim mmͻeε a edi kan no; afei adεn na monfa nkͻ adwen-dwene mu?
(63) 63. Moahunu (nneεma) a modua no?
(64) 64. Mona moma no fifiri na enyin, anaasε Yεn na Yε’ma no fifiri na enyin?
(65) 65. Sε Yε’pε a anka Yε’bεma no ayam (anaasε Yε’bεma no asεe) ama mo atwa adwo-
(66) 66. (Ama moasu sε): “Nokorε yabͻ ka.”
(67) 67. Aane, yahwere (y’agyapadeε).
(68) 68. Moahunu nsuo a monom no?
(69) 69. Mo na mosiane fri mununkum no mu ba, anaasε Yεn na Yesiane ba?
(70) 70. Sε Yε’pε a anka Yε’bεma no ayε nkyene-nkyene. Adεn na afei monna (Nyankopͻn) aseε?
(71) 71. Moahunu egya a mosͻ no?
(72) 72. Mona mobͻ ne nnua no anaasε Yεn na Yε’bͻeε?
(73) 73. Y’ayε egya no nkaeε (a mode bεkae Amanehunu gya no), εsan nso wͻ mfasoͻ dema onipa biara a ohia gya, ne εserε so akwantufoͻ no.
(74) 74. Enti bͻ wo Wura Nyankopͻn Kεseε no abodin.
(75) 75. Mede faako a nsoromma kͻtͻ di nse!
(76) 76. Nokorε sε, εyε nsedie a εso paa sε anka monim a.
(77) 77. Nokorε sε, εyε Qur’aan animuonyam (Nwoma) noa,
(78) 78. Ɛwͻ Nwoma a yε’bͻ ho ban no mu.
(79) 79. Abᴐfoᴐ ahotewfoᴐ no na wᴐ’sᴐ mu.
(80) 80. (Qur’aan) yε Adiyisεm a efri Abͻdeε nyinaa Wura Nyankopͻn no hͻ.
(81) 81. Enti saa Asεm yi na mobu no animtia?
(82) 82. Ɛna moayε po a mopo (Qur’aan no sε εnam so) na monya mo akͻnhoma?
(83) 83. Afei adεn na sε (obi a ͻrewuo nkwa no) duru ne mene mu a (monsi nkwa no kwan)?
(84) 84. Na saa berε no na morehwε.
(85) 85. (Saa berε no) Yε’bεn no kyεn mo, nanso monnhunu.
(86) 86. Sε anka monhyε tumi bi ase a mobebu akonta a,
(87) 87. Adεn na momma (nkwa) no nsan n’akyi (nkͻ onipa no mu bio) sε moyε nokwafoͻ ampa a?
(88) 88. Enti sε (saa nipa no) ka wͻn a wͻ’bεn (Nyankopͻn) no ho a,
(89) 89. (Obenya) ahomegyeε, ne akͻnhoma ne Anigyeε Aheman no.
(90) 90. Na sε ͻka Nifaso foͻ no nso ho a,
(91) 91. Ɛneε asomdweε nka wo, Nifaso foͻ no.
(92) 92. Na mmom sε ͻka wͻn a wͻ’po nokorԑ, ayerafoͻ no ho nso a,
(93) 93. Ɛneε nsuo-hyeε na yεde bεma no brεsuo,
(94) 94. Na yakͻhye no wͻ Amanehunu gya no mu.
(95) 95. Nokorε sε, ampa woi ne Nokorε pefee no.
(96) 96. Enti bͻ wo Wura Nyankopͻn Kεseε no abodin tontom no.