(1) Sa diha nga ang langit magkabuak-buak.
(2) Ug sa diha nga ang mga bitoon magkatibulaag,
(3) Ug sa diha nga ang mga dagat maga-awas,
(4) Ug sa diha nga ang (mga sulod sa) mga lubnganan mahabwa,
(5) Ang matag kalag (unya) mahibalo kung unsa ang iyang gipadala ug unsa ang iyang gibiyaan (nga maayo o daotan nga mga buhat).
(6) Oh tawo, unsa ang nakapalinga kaninyo gikan sa imong Ginoo (Allah), nga Labing Mahinatagon,
(7) Kinsa ba ang naglalang kaninyo, nag-umol kaninyo, ug naghulma kaninyo sa kahingpitan?
(8) Sa bisan unsang dagway nga Iyang gibuot gimugna Niya kamo.
(9) Apan dili, Ikaw naglimod sa (Adlaw sa Paghukom ug) Pagbalus.
(10) Ug sa pagkatinuod adunay mga magbalantay ibabaw kaninyo (mga anghel);
(11) Nga pinasidung'gan nga mga eskriba,
(12) Nahibalo sila sa tanan ninyong gibuhat.
(13) Sa pagkatinuod, ang mga matarung maanaa sa Kalipay,
(14) Ug sa pagkatinuod ang mga dautan maanaa sa nagdilaab nga Kalayo,
(15) Nga diin sila mosulod sa Adlaw sa Pagbalus.
(16) Ug sila dili gayud mawala gikan niini.
(17) Ug unsa ang magpahibalo kanimo kung unsa ang Adlaw 'sa Paghukom ug' sa Pagbalus?
(18) Sa makausa pa, unsay makapahibalo kanimo kon unsa ang Adlaw sa Pagbalus?
(19) Mao na kana ang adlaw sa diha nga ang kalag wala nay gahum sa pagbuhat ug bisan unsa alang sa (laing) kalag; ug tanang hukom nianang Adlawa (bug-os) alang lang sa Allāh.