(1) Siya (ang Propeta) mikunot ang agtang ug mitalikod,
(2) Sa diha nga kaniya mi-duol ang ta-wong buta[1],
[1]. Nga mao si Abdullah ibn Umm Maktoom nga nabalda kaniya, nangita og Giya, samtang ang Propeta nalinga sa iyang pagdapit sa mga bantogan nga mga Quraysh tawo ngadto sa Islam.
(3) Apan unsa ba nakapaamgo kanimo tingali mahimong siya mosulay sa pagputli sa iyang kaugalingon,
(4) O mapahinumdoman, ug ang Pahinumdom kaayohan kaniya?
(5) Alang kaniya nga nag-isip sa iyang kaugalingon nga gawasnon gikan sa panginahanglanon (sa Balaanong Giya),
(6) Ikaw naghatag ug (labaw nga) pagtagad ngadto kaniya.
(7) Ug dili ka mahimong mabasol kong siya dili magputli sa iyang kaugalingon,
(8) Apan mahitungod sa usa nga miabot kanimo naghinamhinam (aron makat-on ug magiyahan),
(9) samtang nahadlok (sa Allah) ug nagtahod,
(10) Gikan kaniya ikaw nalinga?
(11) Apan dili! Kini nga ˹Qur'an˺ tinuod nga usa ka pahinumdom.
(12) Busa siya nga buot, siya pahinumdomi pinaagi niini;
(13) (Kini) natala (pag-ayo) sa pinasidunggan nga mga talaan,
(14) Gipataas, ug Giputli,
(15) Sa mga kamot sa mga eskriba (nga mga anghel).
(16) Halangdon ug masinulondon.
(17) Tinunglo ang tawo (ang manlilimod). Pagkadili-mapasalamaton ba gud niya!
(18) Sa unsa nga butang (ang Allah) naglalang kaniya?
(19) Gikan sa usa ka tinulo sa semilya; Siya naglalang kaniya, unya Siya nagtakda alang kaniya;
(20) Unya (mahitungod sa) dalan Iyang gihimo nga sayon alang kaniya[2],
[2]. Nga mao, ang iyang paggawas gikan sa sabakan sa iyang inahan, o ang iyang dalan sa kinabuhi, o ang Dalan ngadto sa tinuod nga Giya.
(21) Unya Siya nag-buot kaniya nga ma-matay ug igalubong.
(22) Unya sa diha nga Siya mobuot, Siya magbanhaw kaniya pag-usab.
(23) Apan wala niya buhata ang unsay Iyang (Allah) gisugo kaniya.
(24) Unya himoa nga ang tawo makahunahuna (sa tinubdan sa) iyang pagkaon,
(25) Nga Kami (Allah) nagbubo sa tubig 'gikan sa mga panganod', pagbubo (niini) nga abunda,
(26) Unya Kami nagpikas sa yuta, pagpikas (niini) sa pagkabahin 'uban sa mga turok',
(27) Aron sa pagpatubo niini sa mga lugas,
(28) Ug mga ubas ug mga pananom,
(29) Ug ang olibo ug ang palma,
(30) Ug labong nga mga tanaman,
(31) Ug mga prutas ug mga (lunhaw) nga sagbot,
(32) Usa ka tagana alang kaninyo ug sa inyong mga bakahan.
(33) Apan sa diha nga ang makabungol nga pagbuto moabut[3],
[3]. Ang ikaduha nga pagtayhop sa Trumpeta.
(34) Nianang adlawa ang usa ka tawo mokalagiw gikan sa iyang igsoon,
(35) Ug 'gikan sa' iyang inahan ug amahan,
(36) Ug gikan sa iyang asawa ug mga anak.
(37) Ang matag usa kanila sa Adlawa adunay igo nga mabalaka sa sa iyang kaugalingon ug makapapuliki kaniya.
(38) (Ang uban sa) mga nawong nianang Adlawa mahayag (kini sila ang mga magtutuo),
(39) Nga nagkatawa ug malipayon.
(40) Apan (ang uban) nga mga nawong nianang Adlawa masulob-on, sa ibabaw niini abug,
(41) Ang kangitngit motabon kanila.
(42) Kini sila mao ang mga manlilimod, ang mga dautan.