(1) Ako (Dios) nanumpa sa [mga anghel] nga naglinya sa usa ka laray,
(2) ug pinaagi (ang mga anghel) nga kugihan nga magmaneho (sa mga panganod aron sa pagbisibis sa uga nga kayutaan),
(3) ug pinaagi niadtong (mga anghel) nga naglitok sa Pahinumdom 'pulong sa Dios',
(4) Sa pagkatinuod, inyong Dios usa ra lamang (ang Allah lang):
(5) Ang Ginoo sa mga langit ug sa yuta ug sa unsay anaa sa taliwala niini, ug ang Ginoo sa pagsubang sa adlaw.
(6) Kami nagpanindot sa labing duol nga langit pinaagi sa mga dayandayan nga mga bituon,
(7) Ug ingong panalipod batok sa matag masukihon nga demonyo.
(8) Dili sila makapaminaw sa halangdon nga panagtigom (sa mga anghel) tungod kay sila ginalabay gikan sa matag kiliran,
(9) Sa usa ka pagpalayas. Ug alang kanila mao ang makanunayon nga pagsakit,
(10) Gawas kaniya nga naga-ilog (pipila ka mga pulong) pinaagi sa pagpangawat niini, apan sila gigukod sa nagdilaab nga kalayo.
(11) Busa pangutan-a sila (kadtong naglimod sa Kamatuoran sa Islam) kon sila: "Mas kusgan ba sila sa kabuhatan o ang [uban pa mga kahibulongan] nga Among gibuhat?" Sa pagkatinuod, Kami nagbuhat kanila gikan sa lapok.
(12) Hinoon, ikaw matingala ˹pinaagi sa ilang panghimakak' samtang sila nagbiaybiay (kanimo),
(13) Sa diha nga sila pahimatngonan, sila dili manumbaling.
(14) Sa diha nga sila makakita ug Timaan, sila magdasig sa usag-usa sa pagbiaybiay niini,
(15) nga nag-ingon: "Kini wala nay lain gawas sa usa ka tin-aw nga salamangka",
(16) Sa diha nga kita nangamatay na ug nahimong abug ug mga bukog, kita ba pagabanhawon pa gayud (gikan sa mga patay)?
(17) Ug ang atong mga katigulangan "ingon man"?
(18) Isulti: "Oo, ug kamo unya gipakaulawan."
(19) Kini usa lang ka singgit (pagtayhop sa trumpeta), unya sa kalit sila nagtutok.
(20) Ug sila moingon: "O pagkaalaut namo, kini mao ang Adlaw sa Pagbalus."
(21) (Sila pagasultihan): "Kini mao ang Adlaw sa Paghukom nga kaniadto inyong gipanghimakak."
(22) (Oh mga anghel), tiguma sila nga nagbuhat ug kadautan (ang mga pagano, manlilimod) ug ang ilang matang, ug ang unsay ilang ginasimba kaniadto,"
(23) Gawas kang Allah, unya dad-a sila 'tanang' ngadto sa dalan sa Imperno."
(24) Pahunonga sila, kay sila pangutan-on:
(25) Unsay nahitabo kaninyo (Oh mga manmilimod ug mga pagano) nga (karon) kamo dili makatabang sa usag-usa?
(26) Apan sila magtugyan nianang adlawa.
(27) Ang uban kanila moduol sa uban, nga naglabay sa pagbasol sa usag-usa.
(28) [Ang uban] moingon, "Kaniadto miduol ka kanamo gikan sa usa ka posisyon sa gahum."
(29) Sila moingon, "Dili, kamo 'sa inyong mga kaugalingon' dili mga magtutuo."
(30) Ug kami wala'y pagbulot-an (o gahum) diha kaninyo, apan kamo malinapason nga mga katawhan;
(31) Busa ang Pulong 'Dekreto" sa (Allah) nga atong Ginoo gipatuman batok kanato, nga kita sa pagkatinuod makatilaw (sa Silot);
(32) Busa gipahisalaag namo kamo, kay kami (usab) sa among mga kaugalingon mga nangahisalaag.
(33) Busa nianang Adlawa, sila (tanan) makaambit sa Silot.
(34) Sa pagkatinuod Ingon niana Kami magtagad sa mga daotan.
(35) Sa pagkatinuod sila kaniadto nagagawi nga mapahitas-on , sa diha nga giingon ngadto kanila: "Walay dios (nga takos simbahon) gawas sa Allah;"
(36) Ug miingon: "Itugyan (biyaan) ba gayud nato ang atong mga dios tungod (lang) sa usa ka buang nga magbabalak?"
(37) Dili, siya (ang Propeta Muhammad) miabot dala ang Kamatuoran, ug iyang gipamatud-an ang (nauna) nga mga Mensahero (sa Allah).
(38) Kamo 'kinsa naglimod sa kamatuoran' makatilaw gayud sa masakit nga silot.
(39) Ug kamo dili pagabalusan gawas (sa) unsay inyong gibuhat kaniadto.
(40) Gawas sa pinili nga mga alagad ni Allāh.
(41) Alang kanila adunay ilado nga tagana (sa Paraiso),
(42) Mga prutas (sa tanang matang), ug sila pagapasidunggan pag-ayo,
(43) Sa mga Tanaman sa kalipay,
(44) Sa mga trono (sa dignidad), nga nag-atubang sa usag-usa.
(45) Ang usa ka kopa (sa lunsay nga bino) igapasa-pasa (igalibot) ngadto kanila gikan sa tin-aw nga nagadagayday nga tubod.
(46) Puti (tin-aw), lamian alang sa mga muinom.
(47) Walay pagsakit sa ulo. Hingpit ug hapsay, ug dili maka-hubog.
(48) Ug uban kanila adunay mga babaye nga maglikay sa ilang mga panan-aw, nga adunay dagko, matahum, ug madanihon nga mga mata;
(49) Ingon nga sila sama sa gitagoan nga mga itlog (sa ostrich), nga maayo ang pagkapreserbar (ug pag-amping).
(50) Unya sila molingi sa usag-usa, nga magpangutana sa usag-usa.
(51) Ang usa ka mamumulong gikan kanila moingon: "Sa pagkatinuod ako kaniadto adunay usa ka kauban (sa kalibotan),
(52) Naga-ingon: "Kamo ba gayud uban niadtong mga mituo (sa Pagkabanhaw human sa kamatayon)?"
(53) "(Nga) Sa diha nga kita patay na ug nahimong abog ug mga bukog, dad-on (banhawon) ba gayod kita alang sa Pagbalus 'ug Paghukom'?".
(54) Siya moingon: "Motan-aw ba kamo (kaniya kung unsa na ang iyang kahimtang)?
(55) Unya mitan-aw siya sa ubos ug Nakita niya siya nga anaa sa tunga-tunga sa Imperno.
(56) Siya moingon: "Pinaagi sa Allah, ikaw sa tinuod hapit na magdala sa kalaglagan kanako.
(57) Kon dili pa tungod sa grasya sa (Allah) nga akong Ginoo, ako sa pagkatinuod nauban na unta niadtong gidala (ngadto sa Imperno)."
(58) (Ang nagpuyo sa Paraiso muingon) "Dili na ba kita mamatay",
(59) "Gawas sa atong naunang kamatayon? Ug kita dili na pagasilotan?"
(60) Sa pagkatinuod, kini mao ang Dakong Kalamposan.
(61) Ang bisan kinsa nga buot niini (Paraiso), nan, tugoti siya nga maninguha sa maong tumong.
(62) Kini ba (ang Paraiso) labing maayo isip pag-abiabi o ang kahoy nga Zaqquum?
(63) Sa pagkatinuod, Kami naghimo niini nga usa ka pagsulay alang sa mga mamumuhat sa dautan.
(64) Sa pagkatinuod, kini usa ka kahoy nga mitubo gikan sa gamut sa Impiyerno.
(65) Ang mga bunga niini sama sa mga ulo sa mga yawa1.
1. Laing kahulogan: "Ang mga bunga niini sama sa mga ulo sa mga bitin sa Cobra, hilabihan ka mangil-ad nga dulumtanan kan-on, makadaot sa uban, makadaot sa kaugalingon."
(66) Unya sa pagkatinuod sila magakaon gikan niini, ug sudlan ang ilang mga tiyan gikan niini.
(67) Ug sa pagkatinuod sila pagahatagan ug nagbukal nga tubig (aron sa pag-inom, nga adunay sagol nga Zaqquum).
(68) Unya sila tinuod nga mobalik sa Impiyerno.
(69) Sa pagkatinuod ilang nakaplagan ang ilang mga amahan nga nangasalaag,
(70) Busa sila usab nagdali ngadto sa ilang mga lakang!
(71) Sa pagkatinuod, kadaghanan sa mga karaang katawhan mga nangahisalaag sa wala pa sila,
(72) Ug sa pagkatinuod Kami nagpadala kanila ug mga tigpasidaan.
(73) Unya tan-awa, kung unsa kamakalilisang ang katapusan niadtong mga gipasidan-an,
(74) Gawas sa sinsero (ug matuod) nga mga ulipon sa Allah.
(75) Si Noe sa pagkatinuod mitawag Kanato, ug unsa ba Kami Kamaayo sa pagtubag (sa pag-ampo).
(76) Kami miluwas kaniya ug sa iyang pamilya gikan sa dako nga kagul-anan (pagkalumos ug ang pagpanglimod sa iyang katawhan).
(77) Ug naghimo sa iyang mga kaliwatan kinsa nagpabilin alang sa pagsanay.
(78) Ug nagbilin alang kaniya (usa ka maayong handumanan) taliwala sa ulahing mga kaliwatan.
(79) Kalinaw ug ang hataas nga pagdayeg maanaa kang Noe taliwala sa mga kaliwatan.
(80) Kami sa ingon nagganti sa mga magbubuhat ug maayo.
(81) Sa pagkatinuod siya kauban sa Among mga magtutuo nga mga ulipon.
(82) Ug Among gilumsan ang uban.
(83) Usa gayud sa iyang (Noe) mga sumusunod si Abraham.
(84) Sa diha nga siya miabot sa iyang Ginoo (Allah) uban sa putli nga kasingkasing,
(85) Sa diha nga siya miingon sa iyang amahan, ug ngadto sa mga katawohan: "Unsa kining inyong ginasimba?"
(86) Kini bang bakak – laing mga diyos (gawas) ni Allāh - ang inyong gitinguha?"
(87) Busa, unsa ang imong hunahuna bahin sa Ginoo sa tanang binuhat?"
(88) Ug siya mipa-siplat sa mga bituon,
(89) Ug siya miingon: "Sa pagkatinuod ako masakiton (siya gustoha aron makapabilin sa templo aron sa pagguba sa ilang mga dios-dios)."
(90) Busa sila mitalikod ug mibiya gikan kaniya.
(91) Busa siya milingi sa ilang mga dios-dios ug miingon: "Dili ba kamo mokaon (sa mga gipanghalad sa inyong atubangan)?"
(92) Unsa may nahitabo kaninyo nga kamo dili mosulti?
(93) Unya siya miatubang ngadto kanila, nga mibunal kanila pinaagi sa (iyang) tuong kamot.
(94) Busa sila (ang mga magsisimba sa mga diosdios) miadto kaniya nga nanag-dali.
(95) Si (Abraham) miingon: "Nagsimba ba kamo sa inyong gikulit?"
(96) Samtang si Allah naglalang kanimo ug ang unsang inyong gibuhat."
(97) Sila miingon: "Pagtukod alang kaniya ug 'usa ka hudno' unya itambog siya sa nag-lagiting Impiyerno."
(98) Ug sila naninguha sa usa ka laraw batok kaniya, apan Kami naghimo kanila nga labing gipakaulawan.
(99) Si (Abraham) miingon: "Sa pagkatinuod ako molalin sa akong Ginoo (Allah); Siya mugiya kanako!"
(100) (Oh Allah) akong Ginoo, hatagi ako (usa ka anak) gikan sa mga matarung."
(101) Busa Kami mihatag kaniya sa maayong balita sa usa ka mapailubon nga anak nga lalaki.
(102) Busa sa diha nga siya (Ishmael) miabut (sa pangidaron) sa pagtrabaho uban kaniya, siya (Abraham) miingon: "O akong anak, sa pagkatinuod nakita ko sa akong damgo nga ihalad ko ikaw; tan-awa unya, kun unsa ang imong panglantaw." Siya (Ishmael) miingon: "O akong amahan, buhata ang gisugo kanimo; kon itugot sa Allah, ikaw maka-kaplag kanako nga mapailubon.
(103) Busa sa diha nga silang duha (Abraham ug Ismael) mipailalom (sa Kamandoan sa Allah), ug iyang gibutang siya pinaagi sa (kilid sa) iyang agtang 'sa yuta',
(104) Kami mitawag kaniya (nga nag-ingon): "O Abraham!"
(105) Ikaw nakatuman na sa panan-awon. Sa ingon Kami muganti sa mga magbubuhat sa maayo.
(106) Kini sa pagkatinuod mao ang tin-aw nga pagsulay.
(107) Ug Kami mitubos kaniya (Ismael) sa usa ka dako nga halad (usa ka laki nga karnero).
(108) Kami nagbilin alang kang Abraham (usa ka maayong paghisgot) sa ulahing mga kaliwatan.
(109) Ang kalinaw maanaa kang Abraham.
(110) Sa ingon Kami muganti sa mga magbubuhat sa maayo.
(111) Sa pagkatinuod, siya (Abraham) usa sa among mga magtotoo nga mga alagad.
(112) Ug (sa hustong panahon) Kami mihatag kaniya sa maayong balita mahitungod kang Isaak, usa ka Propeta gikan sa mga matarung.
(113) Kami mihatag sa among mga panalangin ngadto kaniya ug ngadto kang Isaac; ug (gikan sa) taliwala sa ilang mga kaliwat mao sila nga nagbuhat og maayo, ug (usab adunay) kadtong kinsa sayop sa ilang mga kaugalingon.
(114) Sa pagkatinuod, Kami naghatag sa Among mga pabor kang Moises ug Harun (Aaron).
(115) Kami nagluwas kanilang duha ug sa ilang mga katawhan gikan sa dakong katalagman (gikan sa paglutos kanila pinaagi ni Paraon ug sa iyang katawhan).
(116) Kami mitabang kanila, mao nga sila nahimong mga nagmadaugon.
(117) Kami mihatag kanilang duha sa ka tin-aw nga Kasulatan.
(118) Ug nag-giya kanila sa matul' id nga dalan.
(119) Kami nagbilin alang kanila nga duha (usa ka maayong handumanan) sa ulahing mga kaliwatan.
(120) Kalinaw ug hataas pagdayeg alang Moises ug Aaron.
(121) Sa ingon niana Kami nagganti sa mga magbubuhat ug maayo.
(122) Sa pagkatinuod, silang duha kauban sa Among mga magtutuo nga mga alagad.
(123) Si Ilyas (Elijah) tinuod nga usa sa mga Mensahero (sa Allah).
(124) Sa diha nga siya miingon sa iyang katawhan: "dili ba ninyo bantayan ang inyong kaugalingon batok dautan?
(125) Nagsimba ba kamo ngadto sa Ba'al[1], ug mibiya sa Labing Maayo sa tanang Manlalalang - Allâh -?"
[1]. Usa ka inila nga diosdios sa iyang panahon.
(126) Si Allah maoy inyong Ginoo ug Ginoo sa inyong mga katigulangan?"
(127) Apan sila mipanghimakak kaniya, busa sila sa pagkatinuod pagadad-on ngadto (sa Imperno).
(128) Gawas sa pinili nga mga alagad ni Allah.
(129) Kami nagbilin alang kaniya (maayong paghisgot) taliwala sa ulahing mga henerasyon.
(130) Kalinaw ug hataas nga pagdayeg alang kang Ilyas (Elijah).
(131) Sa ingon niana Kami muganti sa mga magbubuhat ug maayo.
(132) Sa pagkatinuod, siya usa sa Among mga magtutuo nga mga alagad.
(133) Sa pagkatinuod, si Lut usa sa mga Mensahero (sa Allah).
(134) (Busa hinumdomi) sa dihang Kami miluwas kaniya ug sa iyang panimalay.
(135) Gawas (sa iyang asawa) sa usa ka tigulang nga babaye (nga kauban) sa mga nagpabilin sa ulahi (ug naguba).
(136) Unya among gilaglag ang niadtong uban (sa dakbayan sa Sodom).
(137) Ug sa pagkatinuod kamo naga-agi kanila (sa ilang dapit) matag kabuntagon,
(138) Ug sa gabii. Wala ba kamo makasabot?
(139) Si Yunus (Jonas) sa pagkatinuod usa sa mga Mensahero (sa Allah).
(140) Sa dihang (siya gitalikdan ang iyang katawhan) ug mikalagiw paingon sa sakayan nga gikargahan.
(141) Unya nagripa siya uban kanila, apan siya ang napildi.
(142) Busa gilamoy siya sa isda samtang siya takos nga basulon.
(143) Busa kon dili pa sa iyang pagdayeg ug paghimaya (kang Allah),
(144) Siya (Jonas) magpabilin unta sa tiyan niini hangtod sa Adlaw nga sila pagabanhawon.
(145) Apan gilabay Namo siya sa mamala nga baybayon samtang siya masakiton.
(146) Kami nagpatubo alang kaniya sa usa ka punoan sa kalabasa (nga nagalandong ug nagbugaw sa mga langaw).
(147) Kami nagpadala kaniya ngadto sa usa ka gatus ka libo (nga tawo), o sobra pa.
(148) Busa sila mituo, unya Kami naghatag kanila ug kalipay sa usa ka gitakdang panahon.
(149) Busa pangutan-a sila: "Ang mga anak nga babaye iya ba sa imong Ginoo (Allah) ug ang mga anak nga lalaki ila ba?"
(150) O gibuhat ba Namo ang mga anghel ingon nga mga babaye (sama sa ilang gisulti) ug sila mga saksi niini?
(151) Kay sa pagkatinuod kini gikan lamang sa ilang kaugalingong mga bakak nga sila nag-ingon:
(152) Si Allāh nanganak ug mga anak. Ug, sa pagkatinuod, sila mga ang bakakon!
(153) Nagpili ba Siya ug mga anak nga babaye kay sa mga anak nga lalake?
(154) Unsa ba'y nahitabo kaninyo, giunsa ba ninyo paghukom (paghunahuna)?
(155) Wala ba kamo namalandong niini?
(156) O aduna ka bay sigurado nga pamatuod?
(157) Nan kon mao, dad'a ang inyong mga kasulatan, kon tinuod man ang imong gisulti!
(158) Sila nagpahayag sa usa ka kadugo tali Kaniya ug sa mga anghel. ug sa pagkatinuod ang mga anghel nahibalo nga sila (nga naghimo sa ingon niana nga pag-angkon) sa pagkatinuod pagadad-on (ngadto sa Silot sa Imperno);
(159) Himaya sa Allāh labaw sa bisan unsa nga ilang gihulagway ngadto Kaniya (sa mga politeismo nga mga pagtuo),
(160) Gawas sa pinili nga mga alagad ni Allāh (nga wala makaambit niana nga sala).
(161) Busa, kasigurohan nga kamo ug ang inyong gisimba,
(162) Dili makatintal (kang bisan kinsa) palayo gikan Kaniya,
(163) Gawas kanila nga mga maga-padulong ngadto sa Impiyerno.
(164) ˹Ang mga anghel mitubag,˺ “Walay usa kanamo nga walay gitudlo nga estasyon ˹sa pagsimba˺.
(165) Sa pagkatinuod, kami (mga anghel) paglinya nga nahan-ay (alang sa pagsimba),
(166) Sa pagkatinuod, kami (mga anghel) usab nagpahayag sa Himaya (ug Kadungganan sa Allah).
(167) Sa pagkatinuod sila (ang mga pagano) nag-ingon:
(168) Kon kita adunay usa ka pahinumdom gikan sa mga karaan,
(169) Kita unta karon, matinumanon nga mga alagad (ni) Allāh.
(170) Busa (karon) sila nanag-dumili niini (ang Qur'an) apan sila sa dili madugay mahibalo!
(171) Sa pagkatinuod, ang Among pulong nanag-una na kanhi alang sa among mga alagad nga mga mensahero:
(172) Nga sila mao ang gipangtabangan (nga magmadaugon),
(173) Ug sa pagkatinuod, nga ang Among mga sundalo (ang mga magtutuo) mao ang magmadaugon.
(174) Busa biyai sila (ang mga manlilimod) sa makadiyot.
(175) Ug (dayon) lantawa unsay mahitabo kanila, ug sila usab makakita (sa Silot).
(176) Magpadali ba sila sa Among Silot?
(177) Apan sa diha nga kini moabut ngadto sa ilang nataran, ang kadautan mao ang mamahimong kabuntagon sa mga gipasidan-an (nga wala naminaw).
(178) Busa biyai sila sa makadiyot.
(179) Lantawa unsay mahitabo kanila, ug sila usab makakita (sa Silot).
(180) Himayaon ang imong Ginoo 'Allāh' —ang Ginoo sa Kadungganan ug Gahom—labaw sa unsay ilang giangkon!
(181) Ang Kalinaw maanaa sa tanan nga mga Mensahero (sa Allāh).
(182) Ang tanan nga pagdayeg iya sa Allāh, ang nga Ginoo sa tanang linalang.