(1) Bali khushibi abakalakala, beshichelo!
(2) Balia abeene nibechelela khubandu, benyanga betsusilibwe.
(3) Nabo nibachelela abandu khushichelo nohomba khuratili, nibakatia.
(4) Koo, shibaparangakhwo mbu toto bakhayabululwe mubafu?
(5) Khulwa inyanga ikhongo.
(6) Inyanga yabandu baliema khulwa Nyasaye Omulesi webilonje bioosi.
(7) Shikali kario tawe (shinga olwa mukholanga)! Toto bwene amaandiko ka (ebikhole bia) abamabii kali mushitabu shilangwa mbu Sijjiin.
(8) Ne ni shina shikhumanyia Sijjiin ino?
(9) Ni eshitabu shiahandikwamwo (ebikhole bia abonooni).
(10) Eshinyasio eshikhongo inyanga eyo shiliba khubakhayi.
(11) Balia bakatsulanga inyanga yeyindukho.
(12) Ne shibachikatsulanga inyanga eyo tawe okhuyiniakhwo buli wabura eshichelo, omukholi wetsimbi.
(13) Nasoomelwa ebimanyisio biefu naboola mbu: “Etso ni tsingano etsia abakhale!”
(14) Shikali kario tawe! Habula emioyo chiabu chakhupa tsindebelende okhurulana khu kalia kabakholanga.
(15) Shikali kario tawe! Toto bwene abo inyanga eyo baliikalilwa okhunyoola emikabo chia Nyasaye wabu Omulesi.
(16) Ne mana bakhenjile mumulilo!
(17) Mana baboolelwe mbu: “Kano niko kamwakhayanga.”
(18) Shikali kario tawe (shingala mukholanga)! Toto bwene amaandiko ka (ebikhole bia) abamalayi kali mushitabu shilangwa mbu I’liyyin.
(19) Ne nishina shilikhumanyia I’liyyin ino?
(20) Ni eshitabu shiahandikwamwo.
(21) Bakhashilole balia abarebwa hambi nende Nyasaye.
(22) Toto bwene abakholi bamalayi baliba mubwokholo.
(23) Baliikhala khubifumbi bioluyali nibahenga.
(24) Olibamanyila khukhumesamesa khwobweni bwabu okhurulana khubwokholo.
(25) Balinywesibwa ebinywebwa ebilayi biasubwa.
(26) Eshisubo shiabio shiliwunya obulayi shinga imisk. Ne khulwa okhunyoola kano, bashilane balia abenya okhushilana.
(27) Ne shiasasibwamwo mu (amaatsi ka) Tasniim.
(28) (Tasniim eyo) ni Isebele yabalia abali hambi nende Nyasaye balinywamwo.
(29) Toto bwene abakholi betsimbi batsekhaanga abasuubili.
(30) Ne olwa baburanga ewa bali, babakhondiolanga nibechesania.
(31) Ne nibakalukha mubandu babu, bakalukha nibasangaalile.
(32) Ne nibabalola, baboola mbu: “Toto bano nibo bakora.”
(33) Nabo abo shibarumwa okhuba abalindi babu tawe.
(34) Kho olwa lelo Abasuubila nibo abatsekha Abakhayi.
(35) Nibekhaale khubifumbi nibahenga.
(36) Ne koo, Abakhayi barunjilwe khukabakholanga?