(1) Qaaf. Mi woondirii Alqur'aanaare teddunde nden !
(2) Si ko woni, ɓe ŋalɗu ko tawi kon jertinoowo arii ɓe iwɗo e maɓɓe ; heeferɓe ɓen wi'i: "Ɗum ɗoo ko huunde haawniinde.
(3) Kere si men maayii, men wontii mbulmbuldi...? Ɗum ɗon ko ruttitagol woɗɗungol non !"
(4) Gomɗii Meɗen anndi ko leydi ndin ñaamata kon e maɓɓe ; hino ka Amen gaa deftere reenunde.
(5) Si ko woni, ɓe fennu goonga kan tuma nde ka arunoo e maɓɓe, hiɓe e nder fiyaaku jilɓuɗo.
(6) E ɓee ndaaraali kammu ngun dow maɓɓe, ko honno Men mahiri ngun Men cuɗini ngu ; hara perɗi alanaa ngu?
(7) Leydi ndin kadi, Men weerti ndi Men werlii e mayri pelle, Men fuɗini e mayri kala nooneeji [puɗi] wooɗuɗi.
(8) fii tasakuyee e waaju wonannde kala jeyaaɗo ruttotooɗo.
(9) Men jippini kadi ndiyam barkinaaɗam ummaade ka kammu, Men fuɗiniri ɗam gese e gabbe soñeteeɗe.
(10) e leɗɗe tamaro juutuɗe wonduɗe e piindi fawondirndi,
(11) ko arsike jeyaaɓe ɓen. Men wuurnitiri ɗam kadi leydi yoorundi. Awa ko non woni fii ummital ngal.
(12) Ado maɓɓe, yimɓe nuuhu ɓen, e yimɓe Ɓunndu ɓen e Samuuda'en [fow] fennuno,
(13) e 'Aadi'en, e Fir'awna e musiɗɓe Luutu ɓen.
(14) e yimɓe fitaare nden, e yimɓe Tubba' ɓen. Kala maɓɓe fennuno Nulaaɓe ɓen, kammbaa Am on jojji.
(15) Kere Men ronkuno fii tagu aranu ngun? Ko woni kamɓe, hiɓe e jiɓaare fii tagiteede laawol kesol.
(16) Gomɗii Men tagii neɗɗanke on, Meɗen anndi ko wonkii makko kin sowinsinirta mo. Ko Menen ɓuri ɓadaade mo e dii ɗaɗol (makko) daande ngol.
(17) tuma nde jaɓɓoytooɓe ɓen ɗiɗo jaɓɓoroytoo [golle makko ɗen] ñaamo e nano, hara hiɓe jooɗii.
(18) O wowlataa konngol, si wanaa hino takko makko winndoowo tawaaɗo.
(19) Ɗeɗɗere maayde nden ardi e goonga : "Ko ɗum wonunoo ko dogaynoɗaa".
(20) Wuttee ka alaandu ; ko nden woni Ñalaande kammbaa nden.
(21) Wonkii kala ara, hara hiki wonndi e soggoowo e seedotooɗo.
(22) "Gomɗii a laatinoke welsindiiɗo e ndee. Men hunci wirngallo maa ngon kisan; gite maa ɗen hannde ko seeɓuɗe".
(23) Wonndiiɗo makko on wi'a: "Ko ɗum ɗoo woni ka am ɗoo, maandinaa-ɗum".
(24) Bugee ka Jahannama onon ɗiɗo, kala yedduɗo canndallo.
(25) haɗoowo moƴƴere, jaggitoowo, sikkitiiɗo,
(26) on waɗiduɗo e Allah reweteeɗo goo. Bugee mo ka nder lepte saɗtuɗe".
(27) Cinndadiijo makko (seytaane) on wi'i: "Joomi amen, mi bewinaali oo; si ko woni, ko e majjere woɗɗunde o wonunoo e mun".
(28) [Allah] daala : "Wata on yeddondir ka Am ɗoo ! Nde tawnoo Mi ardiniino e mon kammbaa.
(29) Konngol waɗtitetaake ka Am ɗoo ; Mi siforaa kadi tooñoowo jeyaaɓe ɓen".
(30) Ñalnde Men wi'anoyta Jahannama on : "E a heewii?" Nge wi'a: "Ko ɓeydee hino woodi?"
(31) Aljanna on ɓaɗtinanee gomɗuɓe ɓen, hara wanaa ka woɗɗi.
(32) "Ko ɗum ɗoo woni ko fodaɗon, wonannde kala ruttiiɗo [e Joomi mun] reeniiɗo.
(33) on huluɗo Jom Hinaranke On ka wirnii, o ardi e ɓernde laaɓunde.
(34) Naatiree mo e jam". Ko nden woni ñalaande luttaynde nden.
(35) Hino woodani ɓe ton kala ko ɓe faaletee, hara kadi ɓeydaari hino ka Amen.
(36) Ɗuuɗii e gire ɗen Men halki ado maɓɓe, ko ɓen ɓurnooɓe doole, ɓen wanngorii e leydi ndin, ndaarugol taw si ɓe heɓay laaworde.
(37) Pellet, wonii e ɗum, waaju wonannde kala jom ɓernde, maa tuɗuɗo noppi hara ko tawaaɗo.
(38) Gomɗii Men tagii kammuuli ɗin e leydi ndin e kon ko woni hakkunde majji, nder balɗe jeegoo, tampere woo heɓaali Men.
(39) Muñño e ko ɓe wowlata kon, subbunhinanoɗaa Joomi maa ado puɗal naange ngen e ado mutal ngal.
(40) Jemma on kadi, subbunhinanoɗaa Mo e ka battane [julɗe] farlaaɗe.
(41) Heɗo, ñalnde noddoowo on noddoyta e nokkuure ɓadiinde,
(42) ñalnde ɓe naniroyta haacaango ngon e hoore goonga. Ko nden woni Ñalnnde yaltugol ngol [ka genaale].
(43) Pellet, ko Menen wuurnata Men wara, ko ka Amen kadi woni ruttorde nden.
(44) Ñalnde leydi ndin seekotoo [ɓe yaltira] heñagol; ko nde woni mooɓirde newaniinde Men.
(45) Ko Menen ɓuri anndude ko ɓe wowlata kon. A wonaa dooloowoɓe. Haray waajor Alqur'aanaare nden, kala huloowo kammbaa An on.