(1) Yaa bõe yell la b sogsd taaba?
(2) Yaa kɩbar kẽengã yelle?
(3) Kɩbar ning bãmb sẽn yõsd taab a pʋgẽ wã.
(4) Tek woto! B na wa n bãnge.
(5) Rẽ poorẽ tek woto! B na wa n bãnge.
(6) Tõnd pa maan Tengã t'a yaa sẽn yεdge?
(7) La tãensã tɩ b yaa sẽn kɩ?
(8) La D naan yãmb buk a yiibu (pag la raoa).
(9) La D maan yãmb gõeemã tɩ yaa sẽn yõgne.
(10) La D maan yʋngã tɩ yaa lidbu.
(11) La D maan wĩndgã tɩ yaa vɩɩm baoobo?
(12) La D me yãmb yĩngrã (sa-gãnd) kegems a yopoe.
(13) La D maan fɩtl sẽn witi.
(14) La D sik n yiis sawat-yũnugdsẽ wã koom sẽn kiigdi.
(15) Tɩ d na yiis ne-a bõn-bεεla, la bõn-tobdɩ.
(16) La pʋt sẽn tob n bidimsi.
(17) Ad welgrã raar yãka raare.
(18) Raar ning b sẽn na n fʋʋs Baorgã tɩ yãmb wat sull-sulli.
(19) Tɩ b pak saagã t'a legb ragnoya.
(20) La b sãeeg tãmsã tɩ b legb wala ko-sɩɩga.
(21) Ad Gεhannem ra kor n gũudame.
(22) N yaa lεbeng zĩig ne kedgdbã.
(23) B yaa zĩidb a pʋgẽ zamaan-woko.
(24) B pa lembda pʋgẽ maasem, pa bõn-yũudi me ye.
(25) Sã n pa ko-kaeedem la nod-meto.
(26) Rẽ yaa rolb sẽn zemse.
(27) Ad b ra yɩɩme n pa tẽed geelg ye.
(28) La b yags Tõnd tagmas-rãmbã (aayae rãmbã) yagsg tεkẽ.
(29) La bũmb fãa Tõnd tigim-a lame ne gʋlsgo.
(30) Bɩ y lembe! Tɩ D pa na n tol n paas yãmba, sã n pa naongo.
(31) Ad wẽn-zoεtbã tara paoongo.
(32) Pʋt la sibi.
(33) La pʋg-sãdb sẽn yaɑ reem-n-tɑɑse.
(34) La ko-tees sẽn pid n demse.
(35) B pa wʋmd a pʋgẽ gom-zaala, pa zĩrimbeed me.
(36) Yaa rolb sẽn yi fo Soabã nengẽ, lɑ kũun sẽn seke.
(37) Saag la Tẽng Naaba, la bũmb ning sẽn be b yiibã sʋk Naaba, sẽn yaa yolsg Naabã, bũmb bɑ ɑ ye pa so gomd a nengẽ ye.
(38) Raar nĩng ɑ Gibriil la malεgsã sẽn nɑ n wa n yãnes n tedg taaba, b pa gomde, sã n pa ned ning Yolsg Naab sẽn kõ-a soab sore, t'a yeel sẽn zemsde.
(39) Rẽ la sɩdã raare, bɩ ned ning sẽn rat-a, bɩ a bao lεbeng zĩig n tʋg a Soabã nengẽ.
(40) Ad Tõnd bugsa yãmb ne naong sẽn pẽnege, raar ning ninsaal sẽn na n wa get a nus a yiibã sẽn tʋme, tɩ kɩfr yetẽ "M sã n da paam n yɩẽ tom, (pɑ são)".