79 - суратун-Нәзиғат ()

|

(1) Қатты тартып, суырып алушылармен,

(2) жеңіл етіп шығарып алушылармен,

(3) және жылдам жүзушілермен,

(4) солай, екпінді озушылармен,

(5) бұйрықты орындаушылармен ант етемін!

(6) Ол күні сілкінуші сілкінеді,

(7) оған артынан келесісі жалғасады.

(8) Ол күні жүректер тітірейді,

(9) көздер қорлана бағынып, төмен қарайды.

(10) Олар / сенбеушілер / : «Біз артқа қайтарыламыз ба?

(11) Егер біз үгітілген сүйекке айналсақ та ма?» - дейді.

(12) Олар: «Ендеше, ол тиімсіз бір қайту екен», - дейді.

(13) Ақиқатында, ол - бар болғаны бір ғана қатты дауыс.

(14) Сонда олар жер бетінде / тіріліп / тұрады.

(15) Саған Мұсаның хабары келді ме?

(16) Кезінде қасиетті Тууа алқабында оған Раббысы үндеді:

(17) «Фиръаунға бар, өйткені ол шектен шықты.

(18) Әрі оған айт: «Сен тазаруды қалайсың ба?

(19) Саған Раббыңа / апаратын / жолды көрсетейін. Сонда сен / Оның жазасынан / қорқатын боласың», - / деп / .

(20) Сөйтіп оған үлкен бір белгі-мұғжизаны көрсетті,

(21) бірақ / Фиръаун / оны өтірікке шығарды және қарсы шықты.

(22) Содан кейін ол теріс айналып, әрекетке кірісті.

(23) Әрі / халқын / жинап, жар салды:

(24) «Мен сендердің ең жоғарғы иелеріңмін», - деп.

(25) Сондықтан Аллаһ, оны соңғы, мәңгілік өмір / ақирет / және осы өмір азабымен жазалады.

(26) Күмәнсіз, мұнда қорқатындар үшін бір ғибрат бар.

(27) / Жаратуда / сендерді жарату қиын ба, әлде аспанды ма? Ол оны құрды,

(28) оның төбесін көтеріп, оны теңестірді,

(29) және оның түнін қараңғы етіп, / күндіз / жарығын шығарды.

(30) Әрі одан кейін жерді жайды.

(31) Одан / жерден / оның суы мен жайылымдарын шығарды,

(32) және тауларды бекітіп орнықтырды,-

(33) сендердің пайдалануларың әрі малдарың үшін.

(34) Ал, өте үлкен бір қасірет келген кезде,

(35) сол күні адам не нәрсеге талпынғанын есіне алады,

(36) және көрушілерге Жахим анық көрсетіледі.

(37) Сонда кім шектен шыққан болса,

(38) әрі бұл өмірді артық көрген болса,

(39) онда күмәнсіз, оның баратын орны - Жахим (Тозақ).

(40) Ал, кім Раббысының алдына тұрудан қорқып, өзін құмарлықтан қайтарса,

(41) онда күмәнсіз, оның баратын орны - жәннат.

(42) / Ей, Мұхаммед! / Олар сенен Сағат / Қиямет / туралы: «Ол қашан болады?», - деп сұрайды.

(43) Ол туралы сен не айта аласың?

(44) Оның / ол жайлы толық мағлұматтың / шегі Раббыңда,

(45) сен тек одан / Есеп күнінен / қорыққандарды ғана ескерте аласың.

(46) Олар оны / қияметті / көрген күні, / дүниеде / бір кеш немесе бір сәске уақыты тұрғандай болады.