52 - суратут-Тур ()

|

(1) Турмен ант етемін,

(2) әрі жазылған Кітаппен,

(3) жайылған жұқа нәрсеге / жұқа теріге, қағазға / .

(4) Әрі Байтул-Маъмурмен (бұл жетінші аспанда тұрғызылған Қағба секілді үй.Оғани күніне жетпіс мың періште кіріп, құлшылық етеді) ,

(5) және биік көтерілген шатырмен,

(6) және көтерілген теңізбен ант етемін!

(7) Раббыңның жазасы / азабы / міндетті түрде түседі,

(8) оны қайтарушы жоқ.

(9) Ол күні аспан теңселіп шайқалады,

(10) ал таулар қозғалып жылжиды.

(11) Сол күні / Аллаһты әрі Оның Елшісін / өтірікке шығарушыларға үлкен қасірет болады,

(12) сондай жалғанға сүңгіп, ермек етіп, ойнап жүргендерге!

(13) Ол күні олар Жаһаннам отына күштеп итеріледі.

(14) / Оларға / : «Міне, осы - сендер өтірік санап келген От.

(15) Ал, осы сиқыр ма екен, әлде сендер көрмей тұрсындар ма?

(16) Оның ішінде жаныңдар! Енді шыдасаңдар да, не шыдамасаңдар да - сендер үшін бірдей. Сендерге істеп өткен амалдарыңның қайтарымы ғана беріледі», - делінеді.

(17) Ақиқатында, тақуалар / Аллаһтың жа­засынан қорқып, сақтанушылар / Жәннаттағы бақтарда болып, игіліктерге бөленеді,

(18) олар Раббысының өздеріне бергеніне қуанып, шат-шадыман болады. Әрі олардың Раббысы оларды Жахим азабынан сақтады.

(19) / Оларға: / «Істеген амалдарың үшін рахаттанып жендер, ішіңдер!» - делінеді.

(20) Олар қатар тізілген көтеріңкі жайлы орындарда, сүйеніп отырады. Әрі Оларға көздері үлкен де әдемілерді / хурларды / қосамыз.

(21) Әрі Біз өздері иманға келген және ұрпақтары да иманмен өздеріне ергендерді ұрпақтарымен қосамыз. Біз олардың амалдарынан еш нәрсені кемітпейміз. Әрбір адам өз жиғанының / амалының / тұтқыны.

(22) Әрі, Біз оларға өздері қалаған жемістер мен еттерді / ет тағамдарын / қосамыз.

(23) Ол жерде олар / сусын / толы кеселерді бір-біріне ұзатады, онда бос сөз сөйлеу де, күнә жасау да болмайды.

(24) Оларға қабығы ашылмаған інжу секілді жасөспірімдер қызмет етеді.

(25) Әрі олар бір-біріне қарап сұрасады.

(26) Олар: «Негізінде, біз бұрын үй-ішімізбен болған кезімізде қатты қорқушы едік.

(27) Аллаһ бізге игілік етті және бізді Самум (ыстық жел) азабынан сақтады.

(28) Ақиқатында, біз бұрын Одан тілеуші едік. Анығында, Ол әл-Бәрр / аса Игі / , әр-Рахим / ерекше Мейірімді / »,- дейді.

(29) / Ей, Мұхаммед! / Естеріне сал! СенРаббыңныңигілігі арқасындабақсы-балгер әрі жын қаққан да емессің.

(30) Не болмаса олар: «Ол - ақын. Біз оған заманның өзгеруін күтеміз», - дейді.

(31) / Ей, Мұхаммед! / Айт: «Күтіңдер, мен де сендермен бірге күтушілерденмін», - деп.

(32) Оларға ақылдары осыны бұйыра ма, әлде олар шектен шыққан адамдар ма?

(33) Әлде олар: «Ол оны / Құранды / ойдан шығарды», - дей ме? Жоқ, керісінше! Олар сенбейді.

(34) Егер олар шын сөзді болса, осыған ұқсас / Құран секілді / хабар келтірсін.

(35) Немесе олар еш нәрсесіз / өздігінен / жаратылды ма? әлде олар жаратушылар ма?

(36) Не олар аспандар мен жерді жаратты ма? Жоқ! Олар нақты / айқын / сенбейді.

(37) Немесе Раббыңның қазыналары оларда ма? Не олар басқарушылар ма?

(38) Әлде олардың / көтеріліп / тыңдайтын сатылары бар ма? Онда олардың ішінен тыңдағаны анық бір дәлел келтірсін.

(39) Немесе қыздар - Аллаһтікі, ал ұлдар - сендердікі ме?

(40) / Ей, Мұхаммед! / әлде сен олардан ақы сұрап, содан олар борышқа қалып, соны ауырсынып жатыр ма?!

(41) Не оларда ғайыптың мәліметі бар болып, олар соны жаза ма?

(42) Әлде олар айла-шарғы жасауды қалай ма? Ол айла-шарғыға сондай күпірлік етушілердің / Аллаһқа қарсы шыққандардың / өздері ілінеді.

(43) Әлде олардың Аллаһтан өзге, басқа құдайы бар ма? Аллаһ - олардың қосқан серіктерінен пәк!

(44) Әрі олар егер аспанның бір бөлігінің құлап келе жатқанын көрсе де: «Бұл - шоғырланған бұлт», - дейді.

(45) / Ей, Мұхаммед! / Енді оларды, өздерінің жойылатын / қайта тірілу / күніне жолыққандарына дейін жайына қалдыр.

(46) Ол күні Оларға айла-шарғылары ешбір пайда бермейді әрі Оларға ешкім көмектеспейді.

(47) Анығында, әділетсіздерге оған дейін де азап бар, бірақ олардың көбі білмейді.

(48) / Ей, Мұхаммед! / Раббыңның үкімі келгенге дейін сабыр ет. Сөзсіз, сен Біздің көз алдымыздасың / қорғауымыздасың / . Әрі тұрған кезіңде Раббыңды мақтап, Оны / барлық кемшіліктен / пәк деп дәріпте.

(49) Сондай-ақ, түннің бір бөлігінде және жұлдыздар көрінбей қалғанда да Оны / барлық кемшіліктен / пәк деп дәріпте.