55 - суратур-Рахман ()

|

(1) әр-Рахман / аса Қайырымды /

(2) Құранды үйретті,

(3) адамды жаратты,

(4) оған түсіндіріп жеткізуді үйретті.

(5) Күн мен ай есеппен / қозғалады / ,

(6) және жұлдыздар мен өсімдіктер сәжде етеді.

(7) Әрі Ол аспанды көтерді және таразыны орнатты,

(8) таразыда шектен шықпауларың үшін.

(9) Өлшеуді де туралықпен орындаңдар және таразыда кемітпеңдер.

(10) Әрі Ол, жерді жаратылғандар үшін орнатты.

(11) Онда жемістер және қауашақты құрма ағаштары бар,

(12) және дәнді дақылдар, хош иісті шөптер бар.

(13) Сонда сендер / адамзат пен жын / , өздеріңнің Раббыңның қай игілігін өтірік дейсіңдер?!

(14) Ол адамды / Адам атаны / қыш / құмыра / секілді құрғақ лайдан жаратты.

(15) Ал жынды оттың жалынынан жа­ратты.

(16) Сонда сендер, өздеріңнің Раббыңның қай игілігін өтірік дейсіндер?!

(17) Ол - екі шығыстың Раббысы әрі екі батыстың Раббысы.

(18) Сонда сендер, өздеріңнің Раббыңның қай игілігін өтірік дейсіңдер?!

(19) Ол бір-бірімен кездесетін екі теңізді қосты.

(20) Ол екеуінің арасында, екеуі бір-біріне өтіп, араласа алмайтын кедергі бар.

(21) Сонда сендер, өздеріңнің Раббыңның қай игілігін өтірік дейсіңдер?!

(22) Ол екеуінен інжу және маржан шығады.

(23) Сонда сендер, өздеріңнің Раббыңның қай игілігін өтірік дейсіндер?!

(24) Теңізде көтерілген тау секілді жүзетіндер / кемелер / Оның иелігінде.

(25) Сонда сендер, өздеріңнің Раббыңның қай игілігін өтірік дейсіңдер?!

(26) Оның / жердің / үстіндегілерінің барлығы да өтеді,

(27) ал ұлылық пен кеңшілік Иесі болған Раббыңның дидары мәңгі қалады.

(28) Сонда сендер, өздеріңнің Раббыңның қай игілігін өтірік дейсіңдер?!

(29) Аспандардағы және жердегілер Одан / Аллаһтан / тілейді. Ол әр күні іс үстін /іспен шұғылдануда / .

(30) Сонда сендер, өздеріңнің Раббыңның қай игілігін өтірік дейсіңдер?!

(31) Жақында / Есеп күні / сендермен айналысамыз, ей, екі ауыр топ!

(32) Сонда сендер, өздеріңнің Раббыңның қай игілігін өтірік дейсіңдер?!

(33) Ей, жын мен адамзат тобы! Аспандар мен жердің шектерінен өтуге шамаларың келсе, өтіңдер. Тек, бұйрық арқылы болмаса, өте алмайсыңдар.

(34) Сонда сендер, өздеріңнің Раббыңның қай игілігін өтірік дейсіндер?!

(35) Сендерге оттан жалын және түтін жіберіледі, сендер қорғана алмай қаласыңдар.

(36) Сонда сендер, өздеріңнің Раббыңның қай игілігін өтірік дейсіңдер?!

(37) Аспан жарылып, қызыл тері сияқты болған кезде,

(38) сонда сендер, өздеріңнің Раббыңның қай игілігін өтірік дейсіңдер?!

(39) Сол күні адамдар да, жындар да күнәсі жайлы сұралмайды.

(40) Сонда сендер, өздеріңнің Раббыңның қай игілігін өтірік дейсіңдер?!

(41) Қылмыскерлер белгілерінен танылып, кекілдері мен аяқтарынан ұсталады.

(42) Сонда сендер, өздеріңнің Раббыңның қай игілігін өтірік дейсіңдер?!

(43) Қылмыскерлер өтірікке шығарған Жаһаннам (Тозақ) - осы.

(44) Олар оның / тозақ отының / және қайнап тұрған / қызуы шегіне жеткен / судың екі арасында жүреді.

(45) Сонда сендер, өздеріңнің Раббыңның қай игілігін өтірік дейсіңдер?!

(46) Ал, Раббысының алдында тұрудан қорыққанға екі бақ бар.

(47) Сонда сендер, өздеріңнің Раббыңның қай игілігін өтірік дейсіңдер?!

(48) Олардың бұтақтары бар.

(49) Сонда сендер, өздеріңнің Раббыңның қай игілігін өтірік дейсіңдер?!

(50) Ол екеуінде ағып жатқан екі бұлақ бар.

(51) Сонда сендер, өздеріңнің Раббыңның қай игілігін өтірік дейсіңдер?!

(52) Ол екеуінде әрбір жемістің екі түрі бар.

(53) Сонда сендер, өздеріңнің Раббыңның қай игілігін өтірік дейсіндер?!

(54) Олар астарлары қалың жібектен болған көрпелердің үстінде сүйеніп отырады. Әрі екі бақтың да үзілетін жемісі жақын.

(55) Сонда сендер, өздеріңнің Раббыңның қай игілігін өтірік дейсіңдер?!

(56) Онда олардан / адам мен жыннан / бұрын адам да, жын да жақындамаған, көздерін тыйып, сақтаушылар бар.

(57) Сонда сендер, өздеріңнің Раббыңның қай игілігін өтірік дейсіңдер?!

(58) Олар бейне бір жақұт пен маржан секілді.

(59) Сонда сендер, өздеріңнің Раббыңның қай игілігін өтірік дейсіңдер?!

(60) Жақсылықтың жақсылықтан басқа қайтарымы бар ма?

(61) Сонда сендер, өздеріңнің Раббыңның қай игілігін өтірік дейсіңдер?!

(62) Ол екеуінен өзге тағы да екі бақ бар.

(63) Сонда сендер, өздеріңнің Раббыңның қай игілігін өтірік дейсіңдер?!

(64) Екеуі де қою жасыл болғандықтан қара болып көрінетін.

(65) Сонда сендер, өздеріңнің Раббыңның қай игілігін өтірік дейсіндер?!

(66) Ол екеуінде қайнардан бұрқылдап шығып тұрған екі бұлақ бар.

(67) Сонда сендер, өздеріңнің Раббыңның қай игілігін өтірік дейсіңдер?!

(68) Ол екеуінде жемістер, құрма және анар бар.

(69) Сонда сендер, өздеріңнің Раббыңның қай игілігін өтірік дейсіңдер?!

(70) Онда игі де көріктілер, -

(71) сонда сендер, өздеріңнің Раббыңның қай игілігін өтірік дейсіңдер?! -

(72) шатырларда қорғалып күтілетін, көздері үлкен де әдемілер / хурлар / бар.

(73) сонда сендер, өздеріңнің Раббыңның қай игілігін өтірік дейсіңдер?! -

(74) олардан бұрын оларға адам да, жын да жақындамаған.

(75) Сонда сендер, өздеріңнің Раббыңның қай игілігін өтірік дейсіңдер?!

(76) Олар әдемі қалың кілемдердің үстінде, жасыл жастықтарға сүйеніп отырады.

(77) Сонда сендер, өздеріңнің Раббыңның қай игілігін өтірік дейсіндер?!

(78) Ұлылық пен кеңшілік иесі Раббыңның есімі берекелі!