(1) Энг олий зот бўлмиш Парвардигорингизнинг номини покланг!
(2) У яратган ва расо қилиб қўйган Зотдир.
(3) У белгилаб, ҳидоят қилиб қўйган Зотдир.
(4) У ўт-ўланни ундириб чиқариб,
(5) сўнг уни қорамтир хас-хашак қилиб қўйган Зотдир.
(6) Биз сизни қироат қилдирурмиз. Бас, сиз унутмассиз.
(7) Аллоҳ хоҳлагани бундан мустасно. Албатта, У Зот ошкора ишларни ҳам, яширинганларини ҳам билур.
(8) Биз сизни осонликка муваффақ қилурмиз.
(9) Эслатиш фойда берса, эслатинг!
(10) (Аллоҳдан) қўрқадиган киши эслатмага қулоқ солади.
(11) Бадбахт кимса эса ўзини ундан четга олур.
(12) Катта оловга кирадиган (бадбахт)
(13) Сўнгра у жойда на ўла олур ва на яшай олур!
(14) Дарҳақиқат, пок бўлган киши нажот топгай.
(15) Парвардигорининг номини ёд этиб намоз ўқиган (киши)
(16) Асло! Сизлар шу дунё ҳаётини устун қўйяпсизлар!
(17) Ҳолбуки, охират яхшироқ ва боқийроқдир.
(18) Албатта, бу аввалги саҳифаларда бордир.
(19) Иброҳим ва Мусо саҳифаларида.