(1) Шиддат билан (жонни) суғуриб олувчиларга қасам.
(2) Юмшоқлик билан жон олувчиларга қасам.
(3) Сузиб юрувчиларга қасам.
(4) Ўзишда мусобақа қилувчиларга қасам.
(5) Ишнинг тадбирини қилувчиларга қасам.
(6) Титрагувчи титраган кунда.
(7) Унга эргашувчи эргашганда.
(8) Ўша кунда қалблар қўрқувга тушгувчидир.
(9) Кўзлари эса эгилиб қолгувчидир!
(10) Дейдилар: «Биз ростдан ҳам ортга қайтариламизми?».
(11) «Чириган суяк бўлганимиздан кейин ҳам-а?»
(12) "Ундай бўлса, бу зиёнли қайтиш-ку!» – дерлар.
(13) Албатта, у бир қичқириқдан бошқа нарса эмас.
(14) Қарабсизки, улар ер устида бўлиб қолурлар!
(15) Сизга Мусонинг хабари келдими?
(16) Эсланг, Парвардигори унга муқаддас Туво водийсида (шундай) нидо қилган эди:
(17) «Фиръавннинг ёнига бор, чунки у ҳаддидан ошди.
(18) Унга айт: "Сенда покланишга (рағбат) борми?"
(19) "Сени Парвардигоринг сари бошласам, бас, (У зотдан) қўрқсанг".
(20) Унга бир улкан мўъжиза кўрсатди.
(21) (Фиръавн) уни ёлғонга чиқарди ва осий бўлди.
(22) Сўнг юз ўгириб, тезлаб кетди.
(23) Сўнг (ўз одамларини) тўплаб, жар солди:
(24) «Мен сизларнинг энг олий Парвардигорингиздирман», деди.
(25) Бас, Аллоҳ уни охират ва дунё азобига гирифтор қилди.
(26) Албатта, бунда У зотдан қўрқадиганлар учун ибрат бордир.
(27) Сизларни яратиш қийинми ёки осмонними? Уни (Аллоҳ) бино қилди.
(28) Шифтини баланд қилиб, тиклади.
(29) Кечасини қоронғу қилиб, (ундан) кундузини чиқарди.
(30) Ундан кейин ерни ёйиб текис қилди.
(31) Ундан сувини, ўтлоқларини чиқарди.
(32) Ва тоғларни ўрнаштирди.
(33) Сизларга ва чорваларингизга фойдали бўлиши учун.
(34) Катта бало келганида
(35) Инсон ўз қилмишини ёдга олганида
(36) Ва дўзах кўрадиган кимсага кўрсатиб қўйилганида
(37) Ўшанда ким ҳаддидан ошган бўлса,
(38) Ва бу дунё ҳаётини устун қўйган бўлса,
(39) Унинг жойи фақат жаҳаннам бўлур.
(40) Ким Парвардигори қошида туришдан қўрқиб, нафсни хоҳиш-истаклардан тийган бўлса,
(41) Бас, унинг жойи жаннатдир.
(42) Сиздан, Қиёмат қачон бўлиши ҳақида сўрайдилар.
(43) Сиз қаёқда-ю, уни зикр қилиш қаёқда?!
(44) Уни (билиш) ёлғиз Парвардигорингизга бориб тўхтар.
(45) Сиз фақат ундан қўрқадиган кишиларни огоҳлантиргувчисиз, холос.
(46) Уни кўрадиган кунда худди (бу дунёда) биргина Пешиндан сўнг ёки чошгоҳ пайтида тургандек бўлиб қолурлар!