(1) Тонгга қасам.
(2) Ўн кечага қасам.
(3) Жуфт ва тоққа қасам.
(4) Ўтиб бораётган кечага қасам.
(5) Мана шунда ақл эгаси учун қасам бордир?!
(6) Парвардигорингиз Одни қандай қилганини кўрмадингизми?
(7) Баланд устунлари бор Иромдаги
(8) Юртларда уларнинг ўхшаши яратилмаган эди.
(9) Водийда харсанг тошларни кесган Самудни
(10) Ва кўп аскарлари бор Фиръавнни.
(11) Юртларида ҳадларидан ошган.
(12) У жойларда фасодни кўпайтириб юборгандилар.
(13) Бас, Парвардигорингиз уларнинг устига турли азоб-офатни ёғдирди!
(14) Шак-шубҳасиз, Парвардигорингиз кузатиб тургувчидир.
(15) Энди қачон инсонни Парвардигори синаш учун азиз-мукаррам қилиб қўйса ва унга неъмат ато этса, Парвардигорим мени азиз қилди, дейди.
(16) Қачон уни синаш учун ризқини танг килиб қўйса, Парвардигорим мени хор қилди, дейди.
(17) Асло! Сизлар етимни иззат-икром қилмайсизлар!
(18) Бир-бирингизни мискинларга таом беришга ундамайсизлар.
(19) Меросни эса шиддат ила еяверасизлар.
(20) Мол-дунёни ўта яхши кўрасизлар.
(21) Асло! Замин парча-парча қилиб юборилганда;
(22) Парвардигорингиз ва фаришталар саф-саф бўлиб келганда;
(23) Ўша кунда жаҳаннам келтирилганда. Ўша кунда инсон эслайдир. Лекин бу эслашдан энди не фойда?
(24) "Шу ҳаётим учун ҳам бирон нарса тақдим қилиб қўйганимда эди", деб қолади.
(25) Ўша кунда Аллоҳнинг азобига ўхшаш азоб билан ҳеч ким азоблай олмайди.
(26) У зотнинг боғлаши каби ҳеч ким боғлай олмас!
(27) Эй, хотиржам жон!
(28) Парвардигорингга рози бўлган ва рози қилинган ҳолда қайт!
(29) Бас, бандаларим қаторига киргин,
(30) Ва жаннатимга киргин!