(1) Турга қасам.
(2) Битилган Китобга қасам.
(3) Очиқ саҳифадаги.
(4) Байтул-Маъмурга қасам.
(5) Баланд кўтарилган шифтга қасам.
(6) Тўлиб-тошган денгизга қасам.
(7) Парвардигорингизнинг азоби шак-шубҳасиз юз бергувчидир!
(8) Унинг учун бирон мудофаа қилгувчи йўқдир.
(9) Осмон титраб-чайқалган кунда.
(10) Тоғлар юриб кетган кунда.
(11) Ана ўша кунда (у кунни) ёлғон дегувчиларга ҳалокат бўлгай!
(12) (Ёлғон дегувчилар)ки, улар шўнғиб, ўйнаб юраверадилар.
(13) Улар жаҳаннам ўтига ҳайдалган кунда.
(14) Сизлар ёлғон деган ўт мана шудир.
(15) Бу ҳам сеҳрми ёки сизлар кўрмаяпсизларми?!
(16) Унга киринглар! Сабр қиласизларми, қилмайсизларми, баробар. Барибир қилган ишларингизга яраша аниқ жазо оласизлар.
(17) Тақводорлар жаннатларда ва неъматлар ичрадир.
(18) Парвардигорлари ато этган нарсалардан шод бўлиб юрадилар. Парвардигорлари уларни дўзах азобидан асраб қолгандир.
(19) Қилган амалларингиз учун еб-ичинглар. Ош бўлсин.
(20) Тизилиб турган сўриларда ястаниб. Биз уларни оҳу кўзли ҳурларга уйлантириб қўямиз.
(21) Ўзлари иймон келтирган, зурриётлари эса уларга иймон билан эргашган зотларга зурриётларини ҳам қўшиб қўямиз. Уларнинг амалларидан бирон нарсани камайтирмаймиз. Ҳар бир одам ўзи қилган ишнинг гаровидир.
(22) Уларга кўнгиллари тусаган мева ва гўшт билан мадад бердик.
(23) У ерда косаларни қўлма-қўл қилурлар. У ерда беҳудалик ҳам, гуноҳ ҳам йўқ.
(24) Атрофдарида худди садафдаги дурдек ғуломлар айланиб турадилар.
(25) Бир-бирларига қараб сўрашадилар.
(26) Дедилар: "Олдин оиламизда қўрқардик".
(27) Бас, Аллоҳ бизга марҳамат қилиб, бизни самум азобидан асради.
(28) Дарҳақиқат, биз илгари У Зотга дуо қилар эдик. Албатта У Марҳаматли ва Меҳрибон Зотдир.
(29) Бас, эслатаверинг. Сиз Парвардигорингизнинг неъмати ила коҳин ҳам, мажнун ҳам эмассиз.
(30) Ёки: "У шоир. Ўлимга йўлиқишини кутиб турамиз", дейдиларми?
(31) Айтинг: "Кутаверинглар! Мен ҳам сизлар билан бирга кутиб тургувчиларданман".
(32) Ёки уларни ақллари шунга буюрадими? Ё улар ҳаддаш ошган қавмми?
(33) Ёки уни ўзи тўқиган, дейдиларми? Йўқ! Улар ишонмайдилар.
(34) Агар ростгўй бўлсалар, унга ўхшаш бир гапни келтирсинлар-чи!
(35) Балки улар ҳеч нарсадан (ўзларича) яратилиб қолгандирлар! Ёки уларнинг ўзлари яратувчилардир!
(36) Балки осмонлару ерни яратгандирлар. Йўқ, ишонмайдилар.
(37) Балки Парвардигорингизнинг хазиналари ҳам уларнинг ҳузуридадир?! Ёки улар бошқарувчилардир?!
(38) Балки уларнинг нарвонлари бўлиб, унда туриб қулоқ солармикинлар?! Шундай бўлса, эшитувчилари бир очиқ ҳужжат келтирсинлар-чи?!
(39) Ёки У Зотга қизлару, сизларга эса ўғилларми?!
(40) Ёки сиз улардан ҳақ сўраяпсиз-у, улар тўлашдан қийналиб қолгандирлар?!
(41) Ёки ғайб уларнинг ҳузурида бўлиб, ўзлари ёзяптиларми?!
(42) Ёки бир найранг қилмоқчи бўлаётгандирлар?! Бас, куфр келтирган кимсаларнинг ўзлари найрангга йўлиқадилар.
(43) Ёки уларнинг Аллоҳдан бошқа илоҳи борми? Аллоҳ улар келтираётган ширкдан Покдир!
(44) Агар улар самодан тушаётган парчани кўрсалар ҳам, тўпланган булут, дейдилар.
(45) Уларни то ҳалокатга учрайдиган кунларига йўлиққунларига қадар тек қўйинг.
(46) У кунда уларнинг найранглари бирон нарсага асқотмас ва уларга ёрдам берилмас.
(47) Зулм қилганлар учун бундан бошқа азоб ҳам бор. Лекин уларнинг кўплари билмаслар.
(48) Парвардигорингизнинг ҳукмига сабр қилинг. Зеро, сиз Бизнинг кўз ўнгимиздасиз. Тураётган пайтингизда Парвардигорингизга ҳамду тасбеҳ айтинг.
(49) Туннинг бир қисмида ҳам. Бас, У Зотга тасбеҳ айтинг. Юлдузлар ботганидан кейин ҳам.