(1) 1. lbut ko Palao a Tour a giyoto so Palao a Ron inimbitiyarai o Allah so Musa ko liyawaw niyan.
(2) 2. Go so Kitab a misosorat (a giyo to so Qur'an)
(3) 3. Ko karatas a makakayat,
(4) 4. Go so Baitil Ma-amor a giyoto so Walai a mbabalain a di-i thawapan mambo o manga Malaikat sa Langit.
(5) 5. Go so Atup a ipoporo (a giyoto so Langit a Matatampar sa dunya)
(6) 6. Go so kalodan a mapupuno,
(7) 7. Ka Mata-an! A so siksa o Kadnan Ka na phakatana dun,-
(8) 8. Da-a phakarunon,-
(9) 9. Si-i ko Alongan a mabirbir so Langit sa titho a kabirbir,
(10) 10. Go mamangikayontong so manga Palao a mikayambur.
(11) 11. Na sangat a siksa sa Alongan noto a bagiyan o Miyamanaplis,
(12) 12. So siran na si-i ko ribat khikabibimban;
(13) 13. Si-i ko Alongan a ipanaromag siran ko Naraka Jahanam, sa mabasung a kapanaromag.
(14) 14. (Tharo-on kiran:) giya i so Apoi, a so piyakambokhag iyo sukaniyan!
(15) 15. Ino balik mata ini, antawa-a sukano idi phamakanono?
(16) 16. Sombowi niyo sukaniyan: Na Phantang kano, antawa a di kano Puphantang, na mulagid rukano. Aya bo a imbalas rukano na so Pinggolaola niyo.
(17) 17. Mata-an! A so Miyamananggila na si-i ko manga Sorga, go kadarandang,-
(18) 18. A mabababaya siran sabap ko inibugai kiran o Kadnan niran; go piyakalidas siran o Kadnan niran ko siksa ko Naraka Jahim.
(19) 19. (Tharo-on kiran:) Kangkano, go inom kano sa kapipiya ginawa, sabap ko Pinggolaola niyo;
(20) 20. Gi-i siran shasandasandang ko manga kantir a khirarantarun; go Pakaphamangaroma-an Ami siran sa manga tataid, a manga pipiya i kapumata.
(21) 21. Na so Miyamaratiyaya go tiyondog siran o manga Moriyatao iran ko Paratiyaya, -na pakiraot Ami siran ko manga Moriyatao iran, go da-a korangun Ami kiran ko galubuk iran a maito bo. Oman i isa a tao na sanda ko galubuk iyan.
(22) 22. Na phagomanan Ami siran sa Onga, a go Sapo, a pukhababaya-an niran.
(23) 23. Gi-i siran ro-o ndadawaga sa inomun, a da-a ilangon, go da-a ikhadosa on;
(24) 24. Go phulibutun siran o manga ngongoda iran, lagid o ba siran Montiya a totongkopun;
(25) 25. Go puphagadapun o saba-ad kiran so saba-ad, a puphamagishai siran:
(26) 26. Tharo-on niran: A Mata-an! A sukutano na miyabaloi tano gowani ko shisi-i tano ko manga tonganai tano a ma-aluk tano.
(27) 27. Na ini Kalimo tano o Allah, go piyakalidas tano Niyan ko siksa, a phakarobrob.
(28) 28. Mata-an! sukutano na miyabaloi tano gowani: A Puphamanguni tano Rukaniyan. Mata-an! A Sukaniyan na Sukaniyan so Puphangompiya, a Makalimo-on!
(29) 29. Na Puphanguthoma Ka ka sabap ko Limo o Kadnan Ka, na kuna a ba Ka paririmar, go di Ka tataraponan.
(30) 30. Kuna, ka gi-i ran Tharo-on: A Pababayok! Na dara-an tano Rukaniyan so phangababago o masa!
(31) 31. Tharowangka: Dadara kano, ka Mata-an! A Sakun na pud iyo a pud ko khidadara!
(32) 32. Ba kiran naya sosogo-on o manga gudaguda iran; kuna, ka siran na pagtao a manga darowaka?
(33) 33. Ino iran gi-i Tharowa: A piyangumba-alan Niyan naya a Katharo? Kuna, ka di siran Mapaparatiyaya!
(34) 34. Na bugai siran sa Tothol a lagid iyan, o siran i manga bunar!
(35) 35. Ba siran Miya-adun sa da-a Miyangadun, antawa-a ba siran i Miyangadun?
(36) 36. Ba iran Inadun so manga Langit a go so Lopa? Kuna, ka di ran tatangkudun.
(37) 37. Ba kiran shisi-i so manga kakawasa-an o Kadnan Ka, anta wa-a ba siran i phamakaba-as?
(38) 38. Ba adun a towak iran (ko Langit) a makapuphamakinug siran non? Na talingoma-an o miyama-makinug kiran i katantowan, a mapayag!
(39) 39. Ba aya ruk iyan na so manga Wata a Babai, na ruk iyo so manga Wata a Mama?
(40) 40. Na ba Ka kiran puphanguni sa sokai, na siran na po-on ko ka pakambayadan na kapupunudan siran?
(41) 41. Ba kiran shisi-i so Migagaib, na siran i puphamanoraton?
(42) 42. Kuna, ka aya antap iran na antangan a marata, na so Miyamangongkir na siran i piyangakakaidan!
(43) 43. Ba adun a Tohan niran a salakao ko Allah? Soti so Allah mawatan ko ipuphanakoto iran!
(44) 44. Na o makailai siran sa sagintas ko Langit a pukhaolog, na Putharo-on niran: A gabon a thotorogan!
(45) 45. Na Botawaningka siran, taman sa mimbaratumowa iran so Alongan niran, a so khada-an siran non sa tanod,-
(46) 46. Alongan a di kiran makanggai a gona so ikmat iran sa maito bo, go di siran pangatatabangan.
(47) 47. Na Mata-an! A adun a bagiyan o siran a Mindadarowaka, a siksa a salakao ro-o, na ogaid na so kadakulan kiran na di iran katawan.
(48) 48. Na phantang ka ko kokoman o Kadnan ka; ka mataan! a ska na sii ko pangilailayan o mga mata ami: Go pthasbikn ka so podi o Kadnan ka, ko wakto a kangganat ka;
(49) 49. Go si-i ko kagagawi-i na Puthasbik Ka Rukaniyan, go so kapamakasudup o manga bito-on!