(1) 1. lbut ko Puphamanogo-on, a di-i Makathondotondog,
(2) 2. Go so puphamanambur sa mabandus,
(3) 3. Go so puphamayapat (ko oran) sa samporna a kapamayapat,
(4) 4. Go so gi-i makashusung-gaya sa samporna a kasunggai,
(5) 5. Go so puphamamugai sa Pananadum (a manga Malaikat).-
(6) 6. Kapamokas sa Kataksilan, o di na Kapamaka-iktiyar,-
(7) 7. Mata-an! A so diyandi rukano (a Mapunggolaola ko Alongan a Qiyamah) na phakatana dun.
(8) 8. Na amai ka so manga Bito-on na mapadung,
(9) 9. Go amai ka so Langit na mabunsad,
(10) 10. Go amai ka so manga Palao na mamangikayambur.
(11) 11. Go amai ka so manga Sogo na Limodun ko wakto a Mapupunto,-
(12) 12. Antona-a Alongan a tiyaalik?
(13) 13. Si-i ko Alongan a Kokoman.
(14) 14. Na antona-a i miyakandao Ruka o antona-a i Alongan a Kokoman?
(15) 15. Kabinasa sa Alongan noto, a bagiyan o Piyamakambokhag iran naya!
(16) 16. Ba Ami da binasa-a so miyanga o ona?
(17) 17. Oriyan niyan na iputhondog Ami kiran so miyanga o ori
(18) 18. Lagid oto man a ikhidiya Mi ko manga baradosa.
(19) 19. Kabinasa sa Alongan noto, a bagiyan o Miyamanaplis!
(20) 20. Ba Ami sukano da Aduna a pho-on sa ig a malumuk?
(21) 21. Na tiyago Ami oto ko darpa a Mapapalihara,
(22) 22. Taman ko diyangka a katawan,
(23) 23. Na Pindidiyangka Ami. Na sayana Kami a mapiya a Mididiyangka!
(24) 24. Kabinasa ko Alongan noto, a bagiyan o Miyamanaplis!
(25) 25. Ba Ami da baloya so Lopa a maka-a angkos,
(26) 26. Ko manga Oyagoyag a go so Miyamatai,
(27) 27. Go piyakabukunan Ami oto sa manga Palao a manga poporo, go piyaka-inom Ami sukano sa ig a tabang?
(28) 28. Kabinasa sa Alongan noto, a bagiyan o Miyamanaplis!
(29) 29. (Putharo-on kiran:) Songkano ko piyakambokhag iyo sukaniyan!
(30) 30. Songkano ko Along a tulo sa-i
(31) 31. Di khasirongan, go di khirun ko kadug.
(32) 32. Mata-an naya! A ipuphululubad iyan so manga kotokoto a Apoi a datar o manga torogan.
(33) 33. Lagid o ba oto manga Onta a manga Bibinaning.
(34) 34. Kabinasa sa Alongan noto, a bagiyan o Miyamanaplis!
(35) 35. Giyaya so Alongan a di siran Makaputharo,
(36) 36. Go di kiran iphangonot, ka o ba siran Makapamitowa.
(37) 37. Sangat a siksa sa Alongan noto, a bagiyan o Miyamanaplis!
(38) 38. Giyaya so Alongan a Kokoman: Linimod Ami sukano a rakhus o miyanga-o ona!
(39) 39. Na o adun a ikmat iyo, na ikmat Ako niyo!
(40) 40. Sangat a siksa sa Alongan noto, a ruk o Miyamanaplis!
(41) 41. Mata-an! A so Miyamananggila, na si-i ko khikasisirongan a go manga bowalan,
(42) 42. A go manga Onga, a pud ko Pukhababaya-an niran.
(43) 43. (Putharo-on kiran:) Kangka no, go inom kano sa kapipiya ginawa sabap ko Pinggolaola niyo (a mapiya).
(44) 44. Mata-an! A Sukami na lagid oto man a kambalasi Ami ko Miphipiyapiya.
(45) 45. Sangat a siksa sa Alongan noto, a ruk o Miyamanaplis!
(46) 46. Kangkano go khariyala kano sa di mathai. Mata-an! A sukano na manga sala.
(47) 47. Sangat a siksa sa Alongan noto, a ruk o Miyamanaplis!
(48) 48. Na igira-a Pitharo kiran: a (Shambayang kano sa) Pangalimbaba-angkano! Na di siran Phangalimbaba-an.
(49) 49. Sangat a siksa sa Alongan noto, a ruk o Piyakambokhag iran naya!
(50) 50. Na antona-a i Tothol, ko oriyan angkai a Qur-an, i Pharatiyaya-an niran?