(1) 1. Sangat a siksa a bagiyan o manga Palilimpang:
(2) 2. Siran na igira-a miyakipagasad siran ko manga Manosiya na Puphakitarotop siran,
(3) 3. Na igira-a piyagasadan niran siran o di na Pithimbangan niran siran na puphangorang siran.
(4) 4. Ba di tatangkuda o siranoto a Mata-an! A siran na pagoyagun siran,
(5) 5. Si-i ko Alongan a lubi a mala:
(6) 6. A so Alongan a kapakatindug o manga Manosiya sa Hadapan o Kadnan o manga ka-adun?
(7) 7. Gunuki ran, ka Mata-an! A so Kitab o manga baradosa na khatago dun ko Sijjin,-
(8) 8. Na antawa-a i miyakandao Ruka o antona-a i Sijjin?-
(9) 9. Kitab a Sosoratan.
(10) 10. Sangat a siksa sa Alongan noto a bagiyan o Miyamangongkir!
(11) 11. Siran na o Ongkirun niran so Alongan a kapamalas.
(12) 12. Na da-a Phagongkiron a rowar ko omani Malawani, a Baradosa!
(13) 13. lgira-a Puphangadi-anon so manga Ayat Ami na gi-i niyan Tharo-on: A manga iringa a manga kabokhag o miyanga o ona!
(14) 14. Sabunar, a kuna, kamitha-ab ko manga poso iran so pinggalubuk iran (a dosa)!
(15) 15. Sabunar, a Mata-an! A siran sa Alongan noto na kharunding siran ndun ko Kadnan niran:
(16) 16. Oriyan niyan na Mata-an! A siran na makasolud siran ndun ko Naraka Jahim;
(17) 17. Oriyan niyan na Tharo-on (kiran): A giyaya so Inongkir iyo sukaniyan.
(18) 18. Sabunar, a Mata-an! A so Kitab o Miyamaratiyaya na khatago dun ko iliyin,-
(19) 19. Na antawa-a i miyakandao Ruka o antona-a i illiyun?-
(20) 20. Kitab a Sosoratan,
(21) 21. Shasaksi-an noto o manga rarani (ko Allah).
(22) 22. Mata-an! A so Miyamaratiyaya na khatago dun ko Pakadarandang;
(23) 23. Si-i ko manga Kantir, a gi-i siran mbabantabantai,
(24) 24. Masasarinongka ko manga Paras iran so Sigai o Kadarandang;
(25) 25. Puphamaka-inomun siran ko Soti a Arak, a paparkatun:
(26) 26. Aya parkat iyan na kastori na makapantag saya na Pamagarabaya so Puphamagarabaya (ko Kapangongonotan ko Allah) -
(27) 27. Go sasaogan noto sa Tasnim:
(28) 28. Bowalan, a phaginomun oto o manga rarani (ko Allah).
(29) 29. Mata-an! A so manga baradosa na aya butad iran na gi-iran ikhakala so Miyamaratiyaya (si-i sa doniya),
(30) 30. Go igira-a siyagadan niran siran na gi-i siran khukurata;
(31) 31. Go igira-a miyakandod siran ko manga ta-alok kiran, na makandod siran a pukhababaya siran;
(32) 32. Go igira- a miya-ilai ran siran, na Tharo-on niran: Mata-an! A siran naya na titho a Miyangadadadag,
(33) 33. Akuna a ba siran Siyogo a khisisiyap kiran.
(34) 34. Na sa Alongan naya na siran a Miyamaratiyaya na ikhakala iran so manga kapir:
(35) 35. Si-i siran ko manga Kantir a gi-i siran Mbabantabantai.
(36) 36. Ino minibalas ko manga kapir so Pinggolaola iran?