(1) 1. Pushapa Ako sa lbut ko Alongan a Qiyamah;
(2) 2. Go Pushapa Ako sa lbut Ko Niyawa a Puphanginsoya (ka Pagoyagun kano dun).
(3) 3. Ba aya tarima-on o Manosiya na di Ami dun khatimo so manga tolan niyan?
(4) 4. Owai, khagaga Mi a kathaong Ami pharoman ko manga kumur iyan!
(5) 5. Kuna, ka kabaya o Manosiya a Kapumbaradosa niyan ko kasasangoran niyan;
(6) 6. Iphagisha iyan: o anda i kaphakatalingoma o Alongan a Qiyamah?
(7) 7. Na amai ka maburug so kailai,
(8) 8. Go Nggarahana so Olan,
(9) 9. Go matimo so Alongan a go so Olan,-
(10) 10. Matharo o Manosiya sa Alongan noto: A'anda i khapalagoyan?
(11) 11. Da dun noto! Ka da-a Khalindongan!
(12) 12. Sobo so Kadnan Ka sa Alongan noto i kaputhakna-an.
(13) 13. Panotholun ko Manosiya sa Alongan noto so mini-ona niyan a go so mini pakaori niyan.
(14) 14. Kuna, ka so Manosiya i shaksi ko ginawan niyan,
(15) 15. Na apiya i inibugai niyan a manga dalina iyan.
(16) 16. Dingka pukhaoga sa sabap rukaniyan (a Qur-an) so dila a Ka makapantag sa Kaphagalokaloking ka-on.
(17) 17. Mata-an! A si-i Rukami so katimo iyan, a go so Kapuphangadi iron:
(18) 18. Na igira-a Piyangadi-an Ami Sukaniyan , na Kudugangka so Kiyapangadi iron;
(19) 19. Oriyan niyan na Mata-an! A si-i Rukami so Kapakarayagaon.
(20) 20. Sabunar, a kuna, ka Pukhababaya-an niyo so (doniya a) matag sagad,
(21) 21. Go ipumbagak iyo so Akhirat
(22) 22. Adun a manga paras sa Alongan noto a Mamakataid,-
(23) 23. A mailai ran so Kadnan niran;
(24) 24. Go adun a manga paras sa Alongan noto a khipaka-i ibi,
(25) 25. Maguguda iran a adun a Punggolaola-an kiran a marugun.
(26) 26. Sabunar a amai ka isampai (so Niyawa) ko manga tolan ko bakurung;
(27) 27. Na Matharo: A antawa-ai Pamomotar?
(28) 28. Na Miyatangkud iyan a Mata-an! A sukaniyan so Kapaka pungganata (o Niyawa a go so Badan);
(29) 29. Na milapis so Marugun ko isa a Marugun:
(30) 30. Si-i bo ko Kadnan Ka sa Alongan noto so khandodan!
(31) 31. (Sukaniyan) na da Pangimbunar, go da Shambayang!
(32) 32. Na ogaid na Tomiyaplis, go Tomiyalikhod!
(33) 33. Oriyan niyan na somiyong ko pagtao niyan a Shasagola!
(34) 34. So kabinasa a ruk ka, na Miyakarani (hai Miyongkir)!
(35) 35. Oriyan niyan na so kabinasa a ruk ka, na Miyakarani!
(36) 36. Ba aya tarima-on o Manosiya na imbagak sa Kandarainon?
(37) 37. Ba da mabaloi sukaniyan a malumuk a mani a pukhipantos?
(38) 38. Oriyan niyan na mimbaloi a rogo a mimbathik, na Inadun o Allah go Pithaong lyan sa tarotop;
(39) 39. Na biyaloi Niyan sukaniyan a ngganapa: Mama, a go Babai.
(40) 40. Ba di giyoto i phakagaga sa Kaoyaga Niyan ko Miyamatai?