(1) 1. Amai ka so Langit na manga bubunsad,
(2) 2. Go mangonot ko Kadnan Niyan, ka Miyapatoton,
(3) 3. Go amai ka so Lopa na pakaoladun,
(4) 4. Go iyawa iyan so nganin a madadalumon, na kada-an sa tago,
(5) 5. Go mangonot ko Kadnan Niyan, ka miyapatoton!
(6) 6. Hai Manosiya! Mata-an! A suka na Pananagontaman sa taman sa kitumo ko Kadnan ka sa samporna a panagontaman, ka mipumbaratumowa-a ka Sukaniyan.
(7) 7. Na sa dun sa mibugai ron so Daptar iyan si-i ko kawanan niyan,
(8) 8. Na mapamagitong dun sa itongan a malubod,
(9) 9. Go makandod ko manga tonganai niyan a mabababaya!
(10) 10. Na so puman so midawagon so Daptar iyan si-i ko tampar ko likod iyan.
(11) 11. Na migoraok iyan ndun so kabinasa,
(12) 12. Go makasolud ko kadug.
(13) 13. Mata-an! A sukaniyan na so katatago iyan (sa doniya) ko manga tonganai niyan na mabababaya.
(14) 14. Mata-an naya! A aya tangkap iyan non na di dun phakandod (ko Kadnan Niyan).
(15) 15. Owai na, Mata-an! A so Kadnan Niyan na tatap a phagilain Niyan!
(16) 16. Na Pushapa Ako sa Ibut ko Pamorawag a mariga,
(17) 17. A go so gagawi-i, go so nganin a miyatiganus iyan,
(18) 18. Go so Olan igira-a mimbiring,
(19) 19. Ka puphakasakat kano dun ko sapangkat pho-on ko sapangkat.
(20) 20. Na antona-a i maka-arun kiran sa di iran Kapharatiyaya,
(21) 21. Go-igira a biyatiya kiran so Qur-an na di siran Phangalimbabaan?
(22) 22. Kuna, ka siran a da Pamaratiyaya na gi-i ran Pakambokhagun (so Qur'an).
(23) 23. Na so Allah i lubi a Mata-o ko pagu-unusun niran.
(24) 24. Na Pamanotholangka kiran so siksa a malipudus,
(25) 25. Ogaid na so siran a Miyamaratiyaya go Pinggalubuk iran so manga pipiya: Na adun a bagiyan niran a balas a di khaompas.