(1) 1. Amai ka makatana so phakatana (a so Alongan a Qiyamah),-
(2) 2. Da ko kapakatana iyan Maka-ongkiron,-
(3) 3. Phakarondanun Niyan (so saba-ad), phaka-ombaon Niyan (so saba-ad);
(4) 4. Amai ka Linogun so Lopa sa Linog a samporna.
(5) 5. Go masharoput so manga Palao sa samporna a kasharoput,
(6) 6. Na mbaloi a lopapuk, a mikakayambur,
(7) 7. Go mbaloi kano a tulo ka dinis:
(8) 8. Na so manga tao sa kawanan; na antona-a i manga tao sa kawanan?-
(9) 9. Go so manga tao sa diyowang,- na antona-a i manga tao sa diyowang?-
(10) 10. Go so miyanga o ona (ko Paratiyaya) na phanga-o ona (ko Sorga):
(11) 11. Na siran man i manga rarani (ko Allah),
(12) 12. A khatago ko manga Sorga, a Pakalma:
(13) 13. Madakul a pudon ko miyanga-o ona,
(14) 14. Na maito a pudon ko miyanga-o on;
(15) 15. Khidadarpa ko manga kantir, a piyamarabowatan,
(16) 16. Gi-i siran ro-o shasanda-sandang, a khipaga-adapadapa.
(17) 17. Ipuphagilid kiran o manga Wata a tatap a manga Kangoda an,
(18) 18. So manga baso, go manga kundi, go so khitatagowan sa inomun a pho-on ko bowalan,
(19) 19. Di ron shakit a Olo iran, go di siran non khaburug,
(20) 20. Go manga Onga, a pud ko matotomo iran,
(21) 21. Go sapo a manga papanok a pud ko pukhababaya-an niran;
(22) 22. Go so (manga bai a) manga tataid, a manga pipiya i kapumata,-
(23) 23. Manga ishan o manga Montiya, a totongkopun;-
(24) 24. Balas ko Pinggolaola iran (a mapiya).
(25) 25. Da-a khanug iran ro-o a ilang, go da-a kambaradosa,
(26) 26. Inonta so Katharo a Salaam, Kalilintad.
(27) 27. Na so manga tao sa kawanan;- antona-a i manga tao sa kawanan?-
(28) 28. Khatago siran ko kayo a sidur a disoroken,
(29) 29. Go manga saging, a manga titiyolig,
(30) 30. Go kasisirongan a tatap,
(31) 31. Go ig a mabobobos,
(32) 32. Go manga Onga a madakul,
(33) 33. Dikharintas go da-a run niyan,
(34) 34. Go manga iga-an a manga poporo.
(35) 35. Mata-an! A Sukami na Pagadunun Nami siran (a manga bai ko Sorga) sa bago a Kapangadun,
(36) 36. Na mbalowin Ami siran a manga Raga,-
(37) 37. A manga Sasalinggagao, a murusha rusha,-
(38) 38. A bagiyan o manga tao sa kawanan.
(39) 39. Madakul a pudon ko miyanga-o ona,
(40) 40. Go madakul a pudon ko miyanga-o ori.
(41) 41. Na so manga tao sa diyowang; -antona-a i manga tao sa diyowang?-
(42) 42. Khatago ko mayao, go phulikabo a ig,
(43) 43. Go along, a bul a maitum,
(44) 44. Di pakarunggai, go di mapiya.
(45) 45. Mata-an! A siran na aya butad iran ko ona-an noto na khika sosonor,
(46) 46. Go aya butad iran na lalalayonun niran so dosa a mala,
(47) 47. Go aya butad iran na gi-iran Tharo-on: Ino amai ka matai kami, go mbaloi kami a botha, go manga tolan, ba Mata-an! A khaoyag kami dun (sharoman)?
(48) 48. Go so manga lokus ami a miyanga-o ona?
(49) 49. Tharowangka: Mata-an! A so miyanga-o ona, go so miyanga o ori,
(50) 50. Na Pulimodun siran ndun ko Kaputhatalabokaan ko Alongan a mapupunto;
(51) 51. Oriyan niyan na Mata-an! A sukano Hai Mithataridadag!- A Miyamanaplis,-
(52) 52. Na phakakan kano dun ko kayoa Zaqqum,
(53) 53. Na mapunopuno iyo ron so manga tiyan niyo;
(54) 54. Na misondok iyo ron so phulikabo a ig.
(55) 55. Na makainom kano sa kainoma manga Onta a pukhawao!
(56) 56. Giyaya i talagad kiran ko gawi-i a kapamalas!
(57) 57. Sukami i Miyadun rukano; na ba kano di Phangimbunar?
(58) 58. Aiguda iyo ko pukhaodod iyo (ko manga Rahim o manga Babai)?
(59) 59. Ba sukano i Phagadun non, antawa-a Sukami i Puphangadun?
(60) 60. Sukami i dominiyangka rukano ko kapatai, na di Kami niyo khapalagoyan,
(61) 61. Ko kashambi Ami sa manga lagid iyo, go so Kaphagadun Nami rukano ko nganin a di niyo katawan.
(62) 62. Na Sabunsabunar a kiyatokawan niyo so Kiyapangadun a paganai; na ba niyo di Khatadumi?
(63) 63. Aiguda iyo ko ipushaod iyo?
(64) 64. Ba sukano i Puphamakalonao ron, antawa-a Sukami i Puphamakalonao ron?
(65) 65. O kabaya Ami na Mata-an a khabaloi Ami sukaniyan a pols, na mabaloi kano a puphamumusa kano,
(66) 66. (Gi-i niyo Matharo:) Mata an! A sukami na bakami dun miyakambayadan!
(67) 67. Kuna, ka sukami na piyapas rukami (so riskhi).
(68) 68. Aiguda iyo ko ig a so Phaginomun niyo?
(69) 69. Ba sukano i puphamakatoronon a pho-on ko manga Gabon, antawa-a Sukami i Puphamakatoronon?
(70) 70. O kabaya Ami, na khabaloi Ami sukaniyan a mapulud; na ino kano di Phanalamat?
(71) 71. Aiguda iyo ko Apoi a so Mapuphakagumao niyo?
(72) 72. Ba sukano i Miyakatho ko kayo niyan, antawa-a Sukami i Miyamakatho-on?
(73) 73. Sukami na biyaloi Ami sukaniyan a Pananadum, go kapunggona-an khitatanao.
(74) 74. Na Phoroporo-on Ka so ngaran o Kadnan Ka, a Mala!
(75) 75. Na Pushapa Ako dun sa lbut ko manga darpa o manga Bito-on,-
(76) 76. Na Mata-an naya a titho a Kashapa o katawi niyo a lubi a Mala,-
(77) 77. Mata-an! A Sukaniyan na titho a Qur-an, a Paga-adatan,
(78) 78. Shisi-i ko daptar a pago-on gowan (a so Laokh mahfod).
(79) 79. Da-a phakasukho-on inonta so miyanga Sosoti;
(80) 80. Initoron a pho-on ko Kadnan o manga Ka-adun.
(81) 81. Antona-a i sabap a giyangkai a Tothol na sukano na paka-i ito-on niyo.
(82) 82. Go pumbalowin niyo so pagupur rukano a Mata-an! A sukano na Phagongkirun niyo?
(83) 83. Na ino igira-a miyakasampai (so Niyawa) ko bakurung,-
(84) 84. A sukano sa masa oto na pukhailai niyo,-
(85) 85. Go Sukami i lubi a marani ron a di sukano, -na ogaid na di niyo khailai,-
(86) 86. Na o sukano na di kano khabalasan,-
(87) 87. Na ino niyo to di maphakakasoi, o sukano i manga bunar?
(88) 88. Na amai ka aya butad iyan na pud ko phamakaranin (ko Sorga),
(89) 89. Na (rukiyan) so Kapakadukha, go pagupur, go Sorga, a Pakalma.
(90) 90. Na amai ka aya butad iyan na pud ko manga tao sa kawanan,
(91) 91. Na (Tharo-on non:) Salaam a bagiyan ka a pud ko manga tao sa kawanan.
(92) 92. Na amai ka aya butad iyan na si-i pud ko Miyamanaplis, a Mithataridadag,
(93) 93. Na talagadon so phulikabo a ig.
(94) 94. Go phagbong ko Naraka Jahim.
(95) 95. Mata-an! A giyaya na titho a sukaniyan so bunar a matatangkud.
(96) 96. Na Phoroporo-on Ka so ngaran o Kadnan Ka, a lubi a Mala.