(1) 1. Miyakarani so Bangkit, go miya-opak so Olan.
(2) 2. Na o makailai siran sa tanda, na talikhodan niran, go Tharo-on niran: A balik mata a Mabagur!
(3) 3. Go piyakambokhag iran go inonotan niran so manga kabaya iran a ribat. Na oman i butad na adun a puthakna-an niyan.
(4) 4. Na Sabunsabunar a adun a miyaka-oma kiran a manga Tothol a so kadadaluman sa tapaos,-
(5) 5. Ongangun a somusundad;- na da makanggai a gona so Miyamakaiktiyar;
(6) 6. Na Talikhodingka siran. Si-i ko Alongan a itawag o (Israfil a) phananawag so Shai a pakalukluk.
(7) 7. Makapangangalimbaba-an so manga kailai ran, a puphamakam bowat siran pho-on ko manga kobor, a lagid o ba siran manga tarapan a mipapayapat,
(8) 8. Madilaput a kapuphakasong iran ko puphananawag! Gi-i Matharo o Miyamangongkir: A giya i na Alongan a marugun.
(9) 9. Tomiyaplis ko miya-ona an niran so pagtao o Nuh, ka tiyaplis iran so Oripun Ami (a nuh), go Pitharo iran: A tataraponan, go tiyapaosan.
(10) 10. Na Miyangangarapan ko Kadnan Niyan (sa Pitharo lyan:) Mata-an! A Sakun na kiyarompisan, na tabangi Yakongka!
(11) 11. Na lika-an Ami so manga pinto o Langit ko ig, a pukhabobos;
(12) 12. Go piyakambowatan Ami so Lopa sa manga Bowalan; na miyakambaratumowa so ig ko Sogowan a Sabunar a miyadiyangka;
(13) 13. Go riyoran Ami Sukaniyan ko pithapi a manga papan, go manga pansar,
(14) 14. Phulatas si-i ko kailai Ami: Balas ko tao a aya butad iyan na Inongkir!
(15) 15. Na sabunsabunar a ini bagak Ami aya a tanda; na ba adun a Phananadum?
(16) 16. Na antona-a i miyambutad o siksa Akun, go so Pamakaiktiyar Akun!
(17) 17. Na sabunsavunar a libod Ami so Qur-an ko kapukhatanodi ron; na ba adun a Phananadum?
(18) 18. Tomiyaplis so pagtao a Ad, na antona-a i miyambutad o siksa Akun, go so pamaka-iktiyar Akun!
(19) 19. Mata-an! A Sukami na biyotawanan Ami siran sa ndo, a domadago-os si-i ko gawi-i a na-as (kiran) a lomalagadai,
(20) 20. Di-i niyan nggagansingun so manga Manosiya lagid o ba siran manga itado a Qormah a miyangahahadot.
(21) 21. Na antona-a i miyambutad o siksa Akun go so Pamaka-iktiyar Akun!
(22) 22. Na sabunsabunar a libod Ami so Qur-an ko kapukhatanodi ron: Na ba adun a Phananadum?
(23) 23. Tiyaplis o pagtao a Samood so Puphamaka-iktiyar.
(24) 24. Na Pitharo iran: Ba so Manosiya! A pud rukutano a sakatao i pagonotan tano Sukaniyan? Mata-an! A sukutano amai ka ba giyoto na titho a miyatago ko karibat, go kapamuthang!
(25) 25. Ino Sukaniyan i mbugiko Pananadum kondolondolonan tano? Kuna, ka Sukaniyan na bokhag, a takabor!
(26) 26. Katokawan niran bo sa akir iyan, o antawa-a i bokhag, a takabor!
(27) 27. Mata-an! A Sukami na Shogo kami sa Babai a Onta a tiyoba kiran; na Nayawangka siran go Thigurka!
(28) 28. Na Panotholangka kiran: A Mata-an! A so ig na pimbagi kiran: Omani shagub na si-i ko Alongan niyan phakadarpa.
(29) 29. Na tiyawag iran (si Qadar a) pud iran, na kinowa niyan, na biyono iyan.
(30) 30. Ah na antona-a i miyambutad o siksa Akun, go so Pamaka iktiyar Akun!
(31) 31. Mata-an! A Sukami na biyotawanan Ami siran sa lalis a isa, na miyabaloi siran a lagid o miyarophod ko kodal.
(32) 32. Na Sabunsabunar a libod Ami so Qur-an ko kapukhatanodi ron: Na ba adun a Phananadum?
(33) 33. Tiyaplis o pagtao o Lut so Puphamaka-iktiyar.
(34) 34. Mata-an! A Sukami na biyotawanan Ami siran sa ndo (a maka a awid sa Ator) inonta so ta-alok ko Lut: Ka siyabut Ami siran ko ka khalibabas iyan,-
(35) 35. Limo a pho-on ko Hadapan Ami: -Lagid oto man a kambalasi Ami ko tao a Miyanalamat.
(36) 36. Na Sabunsabunar a Piyaki iktiyaran Niyan kiran so siksa Ami, na piyamawal iran so Miyamaka iktiyar.
(37) 37. Na Sabunsabunar a inangai ranon so Khikaboboloson (a manga Malaikat); na biyota Mi so manga mata iran (na Pitharo kiran:) Na ta-ami niyo so siksa Akun, go so Pamaka-iktiyar Akun.
(38) 38. Na Sabunsabunar a kiyabalaga-an siran ko kapita pita o siksa, a tatap:
(39) 39. Na ta-ami niyo so siksa Akun, go so Pamaka-iktiyar Akun.
(40) 40. Na Sabunsabunar a libod Ami so Qur-an ko kapukhatanodi ron: Na ba adun a Phananadum?
(41) 41. Na Sabunsabunar a miyaka oma ko pagtao o Pir-aon so Puphamaka-iktiyar;
(42) 42. Na piyakambokhag iran so manga tanda Ami, sa kalangolangowan niyan; na ini gandur Ami kiran so kagandur o Mabagur, a Phakagaga.
(43) 43. Ba so Miyamangongkir rukano i tomo a di so miya-ona an niyo, o di na ba adun a kalulupas iyo si-i ko manga Kitab?
(44) 44. Ino iran di-i Tharowa: A Sukami a madakul a matitimo i phakada-ag?
(45) 45. Khasaroput so matitimo, go khitalikhod iran so manga likod (iran).
(46) 46. Kuna, ka so Bangkit i diyandi kiran, ka so Bangkit i lawan a marugun, go lawan a mapait.
(47) 47. Mata-an! A so manga sala i shisi-i ko karibat, go kadadag.
(48) 48. Si-i ko Alongan a panonda-an siran ko Naraka a mikakaras a manga paras iran, (Tharo-on kiran:) Gudami niyo so kisombo ko Naraka Sakar!
(49) 49. Mata-an! A Sukami na so langowan taman na Inadun Ami sukaniyan a didiyangka-an.
(50) 50. Na da ko Sogowan Ami inonta na isa a lagid o sapuruk mata.
(51) 51. Na Sabunsabunar a bininasa Mi so manga lagid iyo sa kupit: Na ba adun a Phananadum?
(52) 52. Na so langowan taman a pinggolaola iran noto na shisi-i ko manga daptar (a Pishoratan o manga Malaikat):
(53) 53. Go omani maito, a go mala, na misosorat (ko Laokah makfod).
(54) 54. Mata-an! A so Miyamananggila, na khatago ko manga Sorga, go manga lawasaig,
(55) 55. Si-i ko darpa a bunar, o bai o (Allah a) Datu a Phakagaga.