(1) Аллоҳ таоло муқаддас шаҳар – Маккаи мукаррама номига қасам ичди.
(2) Эй Пайғамбар, Маккада қилаётган ишларингиз – қатл қилинишга лойиқ кишиларни қатл қилишингизу асир олинишга лойиқ кишиларни асир олишингиз сиз учун ҳалолдир.
(3) Аллоҳ таоло башариятнинг отаси ва унинг насли, зурриётлари номига қасам ичди.
(4) Дарҳақиқат, Биз инсонни меҳнат-машаққатга яратдик. Дунёда унинг бошига тушадиган қийинчиликлар ана шу меҳнат-машаққатнинг кўринишларидир.
(5) Инсон, гуноҳ қилсам ҳам менга ҳеч кимнинг кучи етмайди ва ҳеч ким мени жазолай олмайди, деб ўйлайдими? Ҳатто яратган Парвардигори ҳам-а?!
(6) Бир-бирининг устига уюлиб кетган жуда кўп мол-дунёни совурдим, дейди.
(7) Бу мақтанчоқ, исроф қилганимни Аллоҳ кўрмаяпти, мол-дунёмни ва уни қайси йўл билан топганимни ҳисоб-китоб қилмайди, деб ўйлаяптими?
(8) Унга кўриш учун иккита кўзни бермадикми?
(9) Гапириши учун бир тил ва икки лаб ато қилмадикми?
(10) Унга яхшилик ва ёмонлик йўлини танитиб қўймадикми?
(11) У жаннатдан ажратиб турган довондан ошиб ўтиши керак эди. Ўтмади.
(12) Эй Пайғамбар, сиз жаннатга кириш учун кесиб ўтилиши керак бўлган довоннинг нималигини қаердан ҳам билар эдингиз?
(13) У бир эркак ёки аёл қулни озод қилишдир.
(14) Ёки озиқ-овқат танқис бўлган очарчилик кунида таом беришдир.
(15) Отасидан ажралган қариндош етим болага.
(16) Ёки ҳеч нарсаси йўқ мискин фақирга.
(17) Кейин Аллоҳга иймон келтирган, тоат-ибодат, гуноҳлардан тийилиш ва мусибатлар борасида бир-бирларига сабрли бўлишни тавсия қилган ҳамда бир-бирларига Аллоҳнинг бандаларига раҳм-шафқатли бўлишни маслаҳат берган кишилар бўлса,
(18) Ана ўшалар ўнг томон эгаларидир.
(19) Биз юборган пайғамбарга нозил қилинган оятларга куфр келтирган кишилар эса чап томон эгаларидир.
(20) Қиёмат куни улар устларидан қулфланган жаҳаннам – олов ичида азобланадилар.