(1) 1. (حم) هۆسا دئێتە خواندن (حا، میم)، ل دۆر ڕاڤەكرنا ڤان ڕەنگە تیپان، ل دەستپێكا سۆرەتا بەقەرە بزڤڕە.
(2) 2. سویند ب كتێبا ڕۆنكەر [كو قورئانە].
(3) 3. ب ڕاستی مە ئەڤ كتێبە [كو قورئانە] د شەڤەكا پیرۆزدا [كو (لیلە القدر)ـە، شەڤا ب ڕێز و ڕویمەتە] ئینا خوارێ، دا خەلكی پێ هشیاركەین و بترسینین.
(4) 4. د وێ شەڤێدا هەمی كاروبار ب حیكمەت و شارەزایی، دئێنە دیاركرن و ژێك جوداكرن.
(5) 5. ب ئەمر و فەرمان و زانینا مە، ئەڤە هەمی دئێنە دیاركرن، ب ڕاستی ئەم، پێغەمبەران دهنێرین.
(6) 6. [هنارتنا پێغەمبەران] دلۆڤانییەكە ژ خودایێ تە، ب ڕاستی خودایێ تەیە یێ گوهدێر و زێدە زانا.
(7) 7. [ئەوێ قورئان ئینایییە خوارێ] خودایێ ئەرد و ئەسمانانە و هندی د ناڤبەرا واندا، ئەگەر هەوە ئێقین هەبیت [ئەڤە ژ هەمی تشتان هێژاترە، هوین ئێقینێ پێ بینن].
(8) 8. چو پەرستییێت ڕاست و دورست ژ وی پێڤەتر نینن، و هەر ئەوە ژیانێ و مرنێ ددەت، ئەڤە خودایێ هەوەیە و خودایێ باب و باپیرێت هەوە یێت كەڤنە.
(9) 9. نەخێر وان ئێقین نینە كو خودێیە چێكەرێ ئەرد و ئەسمانان، بەلێ یێت د شك و گۆمانێدا [د ڕاستا قیامەتێدا]، و تڕانەیان پێ دكەن.
(10) 10. ڤێجا [هەی موحەممەد] خۆ بگرە هەتا عەسمان دویكێلەكا ئاشكەرا دئینیت.
(11) 11. [ئەو دویكێل ] ب سەر خەلكیدا دگریت، ئەڤە ئیزایەكا ب ژان و دژوارە.
(12) 12. [هنگی گاور دێ بێژن:] خودێوۆ، ڤێ ئیزایێ ل سەر مە ڕاكە، ڕاست ئەم دێ باوەرییێ ئینین.
(13) 13. و چاوا ئەو دێ پێڤە چن و فایدەی ژ ئیزایێ كەن [و ئاخڤتنا خۆ ب جهـ ئینن]، ئەگەر ئیزا ل سەر وان ڕابوو ئەو باوەرییێ بینن، و بەری نوكە [پێغەمبەرەكێ پێغەمبەراتییا وی ئاشكەرا بۆ وان چۆبوو].
(14) 14. پاشی پشت دانێ، و گۆتن: ئەڤە فێركرییەكێ دینە [ئێك ڤێ بۆ دبێژیت، و ئەڤە نە وەحییە بۆ دئێت].
(15) 15. ب ڕاستی ئەم دێ پیچەكێ وێ ئیزایێ ل سەر هەوە گیرۆكەین، بەلێ هوین [دیسا] دێ ل گاورییا خۆ زڤڕن.
(16) 16. ڕۆژا ب هێز [كو ڕۆژا قیامەتێیە] ئەم دێ وان گرین، و ئەم دێ وێ ڕۆژێ تۆلێ ل وان ڤەكەین.
(17) 17. و ب سویند مە بەری وان ملەتێ فیرعەونی [ب هنارتنا مووسایی و هاروونی] جەڕباندن، و پێغەمبەرەكێ پیرۆز بۆ وان هات.
(18) 18. [گۆتە وان] بەندەیێت خودێ [ئسرائیلییان] بسپێرنە من [ئانكو ڕادەستی من بكەن]، ب ڕاستی ئەز بۆ هەوە پێغەمبەرەكێ ئەمین و دەستپاكم.
(19) 19. و خۆ ل سەر خودێ مەزن نەكەن [كو هوین ئەمرێ وی ب جهـ نەئینن]، ب ڕاستی من بۆ هەوە بەلگە و نیشانەكا ئاشكەراكەر یا ئینایی.
(20) 20. و من خۆ ب خودایێ خۆ و خودایێ هەوە پاراست، كو هوین من بكوژن.
(21) 21. و ئەگەر هوین باوەر ژ من نەكەن [و باوەرییێ ب خودێ نەئینن]، دێ ژ من ڤەبن [و ئەزیەتا من نەكەن، هەتا خودێ حوكمی د ناڤبەرا مە و هەوەدا دكەت].
(22) 22. ڤێجا [وەختێ مووسایی دیتی ئەو باوەرییێ نائینن، و موعجیزەیێت خودێ درەو ددانن] دوعا ژ خودایێ خۆ [ل وان] كر [و گۆت:] ئەڤە ڕاست ملەتەكێ گونەهكارن.
(23) 23. [و مە وەحی بۆ مووسایی هنارت] ب شەڤ بەندەیێت من [ئەوێت باوەری ب تە ئینایین ژ ئسرائیلییان ژ مسرێ بۆ سەر دەریایا سۆر] دەربێخە، ب ڕاستی ئەو دێ كەڤنە دویڤ هەوە.
(24) 24. [گاڤا هەوە دا دەریایێ] بستە ژ دەریایێ دەربازبە، و تە شۆلە ژێ نەبیت بلا [دەریا] وەكی خۆ بمینیت، ب ڕاستی دویماهییا وی لەشكەری خەندقینە [چو پێ نەڤێت].
(25) 25. چەند جنیك و باخچە و كانی وان هێلان.
(26) 26. و چەند زەڤیێت چاندی و شوینوارێت خۆش وان هێلان.
(27) 27. و چەند نیعمەت وان هێلان، تێدا خۆشی دبرن.
(28) 28. و هۆسا مە ئەو د هیلاك برن، و مە ملەتەكێ دی پشتی وان كرە وێرسێ ملك و مالدارییا وان.
(29) 29. و ئەرد و ئەسمان بۆ وان نەگرین [پشتی مە د هیلاك برین]، و دەرفەت ژی بۆ وان نەهاتە دان [ل خۆ بزڤڕن].
(30) 30. و ب سویند مە ئسرائیلی ژ ئیزایا ڕسواكەر قورتالكرن.
(31) 31. ژ فیرعەونی، ب ڕاستی وی خۆ گەلەك مەزن كر، و زێدە یێ گونەهكاربوو.
(32) 32. ب سویند مە ئەو [ئسرائیلی] ب زانینا خۆ ب سەر خەلكێ وی دەمی ئێخستن.
(33) 33. و مە ئەو نیشان و موعجیزە دانە وان، ئەوێت جەڕباندن و ئمتیحانەكا ئاشكەرا تێدا.
(34) 34. و ب ڕاستی ئەڤە (قورەیشی) دبێژن:
(35) 35. ژ مرنا مە یا ئێكێ پێڤەتر نینە، و ئەم [پشتی مرنێ] ساخ نابینەڤە.
(36) 36. [و گۆتن] پا كا باب و باپیرێت مە بۆ مە بزڤڕینن [ئەگەر ڕاستە وەكی هوین دبێژن، كو پشتی مرنێ جارەكا دی ئەم دێ ساخ بینەڤە].
(37) 37. ئەرێ ما ئەو ب هێزترن یان ژی ملەتێ توببەع [یێ حیمیەری، كو ئێك ژ میرێت یەمەنێ بوو]، یان ژی ئەوێت بەری وان [وەكی عاد و (ثمود)] مە د هیلاك برن، ب ڕاستی ئەو یێت گونەهكاربوون.
(38) 38. و ب ڕاستی مە ئەرد و ئەسمان و تشتێ د ناڤبەرا واندا ژ قەستا چێ نەكرینە.
(39) 39. و مە ئەرد و ئەسمان بۆ هەقییێ یێت دایین [دا هەقی بێتە ئاشكەراكرن، و مرۆڤێ خراب ب خرابییا خۆ بێتە جزاكرن، و یێ باش ب باشییا خۆ بێتە خەلاتكرن]، بەلێ باراپتر ژ وان ڤێ نوزانن.
(40) 40. [بێ گۆمان ئەو ڕۆژا ئەو تێدا دودل] ڕۆژا جوداكرنا قەنجییێ و خرابییێ، ڕۆژا كۆمبوونا وان هەمییانە.
(41) 41. ڕۆژا چو دۆست و كەس و كار نەشێن چو ئیزایێ ژ دۆست و كەس و كارێت خۆ بدەنە پاش، و هاریكارییا وان ژی نائێتەكرن.
(42) 42. ئەو نەبیت یێ خودێ دلۆڤانییێ پێ ببەت [كو خودان باوەرن، ب دەستویرییا خودێ دێ مەهدەرێ بۆ ئێك و دو كەن]، ب ڕاستی خودێ سەردەست و دلۆڤانە.
(43) 43. ب ڕاستی دارا زەقوومێ.
(44) 44. زاد و خوارنا زێدە گونەهكارانە [ئانكو گاوران].
(45) 45. وەكی سفرێ حەلیایی د زكێ واندا دكەلیت.
(46) 46. وەكی كەلا ئاڤا شاریایی.
(47) 47. [خودێ دێ بێژتە ملیاكەتان:] بگرن و ڕاكێشنە نیڤا دۆژەهێ.
(48) 48. پاشی ئاڤا زێدە كەل داڕێژنە سەر سەرێ وی.
(49) 49. [ملیاكەت دێ بێژنێ:] دێ تامكێ، تە خۆ دەستهەلاتدار و خودان ڕێز و ڕویمەت ددانا.
(50) 50. ئەڤە ئەو ئیزایە ئەوا هەوە جڕەبڕ ل سەر دكر [و باوەری پێ نەدئینا].
(51) 51. ب ڕاستی پارێزكار و مرۆڤێت خودێ یێت د جهەكێ ئێمندا.
(52) 52. د ناڤ باغ و كانیاندانە.
(53) 53. و جلكێت ئارمویشێ تەنك و یێ ستویر دكەنە بەر خۆ، و بەرانبەری ئێك و دونە.
(54) 54. ئەها بەحەشتی د هۆسانە، و مە پەریێت چاڤگر یێت كرینە هەڤسەرێت وان.
(55) 55. بێ ترس [كو تشتەك ل وان بێت] ئەو هەمی ڕەنگێت فێقییان د بەحەشتێدا دخوازن [و دخۆن].
(56) 56. ژ بلی مرنا خۆ یا ئێكێ [كو مرنا دنیایێیە]، مرنێ نابینن و [خودێ] ئەو ژ ئیزایا دۆژەهێ پاراستن.
(57) 57. ئەڤە كەرەمەكە ژ خودایێ تە [دایییە وان]، نێ ئەڤەیە سەرفەرازییا مەزن.
(58) 58. بێ گۆمان مە ئەڤ قورئانە ب ئەزمانێ تە بۆ وان ب ساناهی كر، دا پێڤە بچن و ل خۆ بزڤڕن.
(59) 59. ڤێجا [هەی موحەممەد] خۆ بگرە [و چاڤێ تە لێ بیت، دێ چ ئێتە سەرێ وان]، ب ڕاستی ئەو ژی یێ ل هیڤیێ [كا دێ چ ئێتە سەرێ تە].