(1) 1. (ألم) هۆسا دئێتە خواندن (ئەلف، لام، میم) و ل دۆر ڕاڤەكرنا ڤان تیپان بزڤڕە دەستپێكا سۆرەتا بەقەرە.
(2) 2. ئەڤە ئایەتێت كتێبەكا ڕێك و پێك و موكومە.
(3) 3. ڕێكا ڕاستەڕێیی و دلۆڤانییێیە بۆ قەنجیكاران [ئەوێت خودێ دپەرێسن هەروەكی دبینن، و ل وێ هزرێنە ئەگەر ئەو خودێ نەبینن خودێ وان هەر دبینیت].
(4) 4. [قەنجیكار] ئەون ئەوێت بەردەوام و ب ڕەنگێ پێدڤی نڤێژان دكەن، و زەكاتێ ددەن و ژ ئاخرەتێ بێ گۆمانن.
(5) 5. ئەڤەنە ل سەر ڕاستەرێیییا خودایێ خۆ، و هەر ئەڤەنە یێت سەرفەراز.
(6) 6. و هندەك مرۆڤ یێت هەین [مەخسەد پێ (نضرێ كوڕێ حارثی)یە] ئاخڤتنێت پویچ و بێ تام دكڕین، دا ژ نەزانین ڕێكا خودێ ل بەر خەلكی بەرزەكەن [و وان ژ ئیسلامێ بدەنە پاش]، و دا بۆ خۆ تڕانەیان ب ئایەتێت خودێ بكەن، و بۆ ئەڤێت هە ئیزایەكا هەتكبەر یا هەی.
(7) 7. و ئەڤێ ژ ڤان مرۆڤان، گاڤا ئایەتێت مە بۆ دهاتنە خواندن ژ مەزناتی پشتا خۆ ددایێ و دچۆ هەچكو نەبهیستین، هەروەكی ژ هەردو گوهێت خۆ یێ كەڕ و گران، ڤێجا مزگینییا ئیزایەكا ب ژان و دژوار بدە وی.
(8) 8. ب ڕاستی ئەوێت باوەری ئینایین و كار و كریارێت ڕاست و دورست كرین، بەحەشتێت تێر خێر و بێر بۆ وانە.
(9) 9. و هەروهەر دێ تێدا مینن، و ئەڤە پەیمانەكا هەقە ژ دەڤ خودێ، و ئەوە یێ سەردەست و كاربنەجهـ.
(10) 10. وەكی هوین دبینن ئەسمان بێ ستوین یێت چێ كرین، و چیایێت مەزن و بنەجهـ یێت ئێخستینە د ئەردیدا دا ئەرد هەوە نەهەژینیت، و ژ هەمی ڕەنگان جانەوەر تێدا بەلاڤكرن، و مە ئاڤەك (بارانەك) ژ ئەسمانی (ژ ئەوران) داڕێت، مە پێ ژ هەمی ڕەنگێت جوان و پڕ مفا شینكاتی د ئەردیدا دا و شینكر.
(11) 11. ئەڤەیە دان و چێكرنا خودێ، ڤێجا كا بێژنە من ئەڤێت هوین شوینا خودێ دپەرێسن، چ دایییە و چ چێ كرییە؟ [نەخێر وان چو نەدایییە و چو چێ نەكرییە] بەلێ ستەمكار یێت د گومڕایییەكا ئاشكەرادا.
(12) 12. و ب سویند مە ئەقل و تێگەهشتن و زانین و حیكمەت دابوو لوقمانی [و مە گۆتێ] شوكور و سوپاسییا خودێ بكە، و هەر كەسێ سوپاسییا خودێ بكەت، ب ڕاستی ئەو بەس یێ بۆ خۆ [شوكورا خودێ] دكەت، و هەر كەسێ سوپاسییا نیعمەتێت وی نەكەت [خودێ منەت ب سوپاسییا وی نینە]، و خودێ یێ دەولەمەندە و هێژایی پەسن و سوپاسییێیە.
(13) 13. و چیڕۆكا لوقمانی بۆ وان بێژە: وەختێ كوڕێ خۆ شیرەت كری و گۆتیێ: كوڕێ من چو هەڤپشكان بۆ خودێ چێ نەكە، ب ڕاستی هەڤپشك پەرێسی [شرك] ستەمەكا مەزنە.
(14) 14. و مە ئەمرێ مرۆڤان كر د گەل دەیبابێت خۆ د باش بن نەخاسمە [دگەل] دەیكێ، نەخۆشی و بێ تاقەتی ل دویڤ نەخۆشی و بێ تاقەتییێ پێ برن دەمێ د زكیدا، و دو سالان ل سەرێك شیر دایێ ژ نوی ژ شیرڤەكر، و مە گۆتێ: سوپاسییا من بكە من تو دایی، و شوكور و سوپاسییا دەیبابێت خۆ بكە تو خودانكری، و هوین هەر دێ ب بال منڤە زڤڕن.
(15) 15. و ئەگەر دەیبابێت تە مانە ب تەڤە، تە د بەر هندێڕا بكەن تو تشتەكی بۆ من بكەیە هەڤپشك تو چو ژێ نەزانی، گوهێ خۆ نەدە وان، و د دنیایێدا ب قەنجی و باشی د گەل وان ببۆرینە [خۆ ژ وان دویر نەئێخە، و یێ باش بە د گەل وان، بەس گوهدارییا وان د شركێدا نەكە]، و [و ددینێ خودا هەكە نە یێت موسلمان بن، د دنیایێدا د گەل یێ باشبە بەلێ ڕێكا وان و دینێ وان نە گرە و] ڕێكا وی (دینێ وی ) بگرە یێ بەرێ خۆ دایییە من [بۆ تۆبەكرن و دلبێشیێ]، پاشی دێ هەر ب بال منڤە زڤڕن، [تۆ و دەیبابێت تە و ئەو] ڤێجا [هنگی] یا هەوە كری دێ بۆ هەوە بێژم [و هەوە پێ ئاگەهداركەم].
(16) 16. كوڕێ من گونەهـ و خرابی ئەگەر [چەندا بچویك بیت] تەمەتی دندكا تۆڤێ خەندەلكێ بیت، و د ناڤ كەڤرەكیدا بیت، یان ژی ل هەر جهەكێ بیت ژ ئەرد و ئەسمانان، خودێ دێ هەر ئینیت، ب ڕاستی خودێ یێ هویربین و شارەزایە.
(17) 17. كوڕێ من نڤێژان ب ڕەنگێ پێدڤی بكە، و داخوازا كرنا باشییێ بكە و داخوازا دانەپاشا خرابییێ و گونەهێ بكە، و سەبری ل سەر نەخۆشییا دگەهیتە تە بكێشە، ب ڕاستی ئەڤە [پارستنا نڤێژێ، و داخوازكرنا باشییێ، و دانەپاشا خرابییێ، و سەبركێشان ل سەر نەخۆشییان] ژ وان كارانە ئەوێت دڤێت مرۆڤ ل سەر یێ هشیار و ڕژد بیت.
(18) 18. [كوڕێ من] ژ مەزناتی ڕوییێ خۆ ژ خەلكی وەرنەگێڕە، و قەبە و دفن بلند ب ڕێڤە نەچە، ب ڕاستی خودێ حەژ وان ناكەت ئەوێت قەبە و دفن بلند و زێدە ب خۆ شاهی.
(19) 19. [كوڕێ من] د ڕێڤەچۆنا خۆدا یێ ناڤنجی بە [نە هێدی هێدی و نە حێل، و نە ب مەزناتی و نە مریچۆك] و دەنگێ خۆ نزم بكە و زڕ نەكە، ب ڕاستی دەنگێ ژ هەمییان نەخۆشتر زڕێنا كەرانە [ئەگەر دەنگ بلندی جوانی بایە چو دەنگ ژ یێ كەری د بلندتر نینن].
(20) 20. ما هوین نابینن خودێ هندی د ئەرد و ئەسماناندا یێ بۆ هەوە سەرنەرم و بەردەست كری، و كەرەمێت خۆ یێت ئاشكەرا [وەكی ئیسلامەتیێ... هتد] و نەئاشكەرا [وەكی ئەقل و زانین و تێگەهشتنێ... و هتد] ل سەر هەوە یێت بەرفرەهـ كرین، و د گەل هندێ ژی هندەك مرۆڤ یێت هەین بێ زانین و بێ ڕاستەڕێیییەك و بێ كتێبەكا ڕۆنكەر، جڕەبڕێ د دەرهەقێ خودێدا دكەن.
(21) 21. و گاڤا موسلمانان دگۆتە وان: ل دویڤ وێ بكەڤن یا خودێ ئینایییە خوارێ دگۆتن: نەخێر ئەم دێ ب دویڤ وێ كەڤین ئەوا مە باب و باپیرێت خۆ ل سەر دیتی. [ئەرێ ئەو هەر دێ ل دویڤ وان چن خۆ ئەگەر د خەلەت ژی بن] و شەیتان بەرێ وان بدەتە ئاگرێ دۆژەهێ ژی؟!
(22) 22. و هەر كەسێ خۆ بسپێریتە خودێ و ل بەر فەرمانا وی یێ ڕاوەستیای بیت [شۆل بنەجهـ بیت]، و ئەو ب خۆ ژی یێ قەنجیكار بیت، ئەڤە وی خۆ ب چنبلێ (قولپا) ژ هەمییان موكومترڤە گرت [ئانكو ڕێكا سەرفرازییێ، و ترس ب دویڤڤە نینە]، و دویماهیكا هەمی كاروباران هەر ب بال خودێڤەیە.
(23) 23. و هەر كەسێ گاور ببیت ڤێجا بلا گاورییا وی تە ب خەم نەئێخیت [چونكی تە ئەوا ل سەر خۆ ڕاكر، تە گازییا خۆ گەهاندە وان]، زڤڕینا وان هەمییان ب بال مەڤەیە، ڤێجا تشتێ وان كری ئەم دێ بۆ وان بێژین [پێ جزا و خەلات كەین]، ب ڕاستی خودێ دزانیت كا چ د دلاندایە و پێ ئاگەهە.
(24) 24. [د دنیایێدا] ئەم دێ وان هێلین پیچەكێ خۆشییێ ببەن، پاشی [ڕۆژا قیامەتێ] دێ وان نەچاركەین بكەڤنە د ئیزایەكا دژوار و گراندا.
(25) 25. و ئەگەر تو پسیارا وان بكەی كێ ئەرد و ئەسمان دایینە؟ دێ بێژن: خودێ.. بێژە هەمی پەسن و شوكور بۆ خودێ [ل سەر ڤێ هەقاندنا هەوە د ڕاستا خودێدا، و پەسەندكرنا هەوە خودایێ عەرد و عەسمانان خودێیە و ل سەر ئاشكراكرنا هەوە ئەو هێژایی پەرستنێیە و یا هوین ل سەر یا خەلەتە و نە یا دورستە پا چاوا هوین ئێكێ دی ژ بلی وی دپەرێسن و دكەنە شریك]، بەلێ باراپتر ژ وان نوزانن [كا مەخسەدا ڤێ هەقاندنێ چیە؟].
(26) 26. هندی د ئەرد و ئەسماناندا هەی یێ خودێیە، ب ڕاستی خودێ یێ دەولەمەندە و هێژایی شوكوراندنێیە.
(27) 27. و ئەگەر هەر دارەكا د ئەردیدا هەی قەلەم و خامە بن، و دەریایێت هەین حەفت دەریایێت دی ژی بێنە سەر و هەمی حوبر بن [و ب وان قەلەم و خامەیان و ب وی حوبری ئاخڤتن و پەیڤێت خودێ بێنە نڤێسین] هەر زانین و ئاخڤتن و پەیڤێت خودێ ب دویماهی نائێن، ب ڕاستی خودێ یێ سەردەست و كاربنەجهە.
(28) 28. چێكرنا هەوە [ل دەستپێكێ] و ساخكرنا هەوە ژ گۆڕان [پشتی مرنێ] وەكی [دان و چێكرنا] مرۆڤەكی ب تنێیە، ب ڕاستی خودێ یێ گوهدێر و بینەرە.
(29) 29. ما تو نابینی خودێ شەڤێ دكەتە د ناڤ ڕۆژێدا، و ڕۆژێ دكەتە د ناڤ شەڤێدا [هەردووكان ب ڤێ چەندێ كورت و درێژ دكەت]، و ڕۆژ و هەیڤ یێت بۆ هەوە خزمەت خۆش كرین [یێت ئێخستینە د خزمەتا هەوەدا] هەر ئێك هەتا وەختەكێ دیاركری دێ ئێت و چیت، و تشتێ هوین دكەن خودێ ژێ ب ئاگەهە.
(30) 30. خودێ ڤێ دكەت دا هوین بزانن خودێ یێ هەقە و ئەوێت شوینا وی دئێنە پەرستن د پویچ و بەتالن، و خودێیە یێ بلند و مەزن.
(31) 31. ما تو نابینی گەمی ژ كەرەم و دلۆڤانییا خودێ د دەریایێدا دئێت و دچیت، دا خودێ نیشانێت دەستهەلاتدارییا خۆ نیشا هەوە بدەت، ب ڕاستی ئەڤە چامە و نیشانن بۆ وان ئەوێت زێدە بێنفرەهـ و زێدە شوكوردار.
(32) 32. گاڤا پێلەكا ئاڤا دەریایێ وەكی ئەوران یان وەكی چیایان ب سەر واندا گرت، ژ دل بەس دێ دوعایێ ژ خودێ ب تنێ كەن، ڤێجا گاڤا خودێ قورتالكرن و گەهاندنە ئەردێ دێم، دێ بینی هندەك ژ وان نیڤ نیڤەنە [هندەك ب دورستی سوپاسییا خودێ ناكەن، و هندەك د بنیڕا سوپاسییا خودێ ناكەن و نیعمەتێت خودێ نائیننە بەرچاڤێت خۆ] كەس نیشانێت مە درەو نادانیت و ئینكار ناكەت زێدە پەیمان شكێن و زێدە گاور نەبن.
(33) 33. گەلی مرۆڤان پارێزگارییا خودێ بكەن، و ژ ڕۆژەكێ بترسن [كو ڕۆژا قیامەتێیە] نە باب شوینا عەیالی و نە عەیال شوینا بابێ دئێتە جزاكرن [باب و زاڕۆك چو مفایی ناگەهیننە ئێك]، ب ڕاستی پەیمانا خودێ دایی یا ڕاستە [و دێ هەر وەسا ئێت]، ڤێجا بلا ژیانا دنیایێ هەوە نەخاپینیت، و هەوە د سەردا نەبەت، و بلا شەیتان ژی هەوە ب كەرەما خودێ نەخاپینیت [كو هوین گونەهان بكەن و بێژن كەرەما خودێ یا مەزنە و تۆبە نەكەن].
(34) 34. ب ڕاستی خودێ دزانیت كا قیامەت كەنگی دێ ئێت، و ئەوە بارانێ دبارینیت، و دزانیت كا چ د مالبچویكاندایە [بەری ببیتە مرۆڤ]، و كەس نوزانیت كا سوبەهی چ دێ ئێتە سەری، و كەس نوزانیت كا ل كیرێ و ل كیڤە دێ مریت، ب ڕاستی خودێ زانا و شارەزایە.