(1) 1. مڕویتا وی [پێغەمبەری] نەخۆشبوو و بەرێ خۆ ژێ وەرگێڕا [مەخسەد پێغەمبەرە، دەمێ (عبدالله)یێ كوڕێ (أم مكتوم) هاتییە دەڤ و ئەو یێ مژویل بوو ب ڕوی سپیێت قورەیشییانڤە، و دل تێ هەبوو باوەرییێ بینن، و دەعوەیا وان دكر و ژ ئاگرێ جەهنەمێ دترساندن، و د وی وەختیدا و ئەو یێ ب ڤان گرەگرانڤە مژویل، (عبدالله) هاتە دەڤ و گۆتێ: ئەو تشتێ خودێ نیشا تە دایی بۆ من ژی بێژە و نیشا من بدە، پێغەمبەری (سلاڤێت خودێ ل سەر بن) نەدڤیا ئاخڤتنا وی د گەل ڤان گرەگران بێتە ڤەبڕین، ژ بەر هندێ مڕویتا وی نەخۆش بوو].
(2) 2. دەمێ كۆرە (ابن أم مكتوم) هاتییە دەڤ.
(3) 3. ما تو چ دزانی بەلكوو هاتبیت، خۆ ژ گونەهان بشۆت.
(4) 4. یان پێڤەبچیت و مفای ژ شیرەتێت تە وەربگریت.
(5) 5. و هەچیێ پشت دا باوەرییێ، و خۆ بێ منەت كر و پشتا خۆ ب مالێ خۆ گەرم كر.
(6) 6. تو پێڤە دمینی و بەرنادەی.
(7) 7. خۆ پێڤە نەئێشینە ئەگەر باوەرییێ ب تە نەئینیت، یا تە ژی بەس ڕاگەهاندنە.
(8) 8. و هەچیێ ژ ڤیان و ژ دل، هاتە دەڤ تە.
(9) 9. و دلێ وی ژ خودێ ب ترس.
(10) 10. تو وی ژ بیر دكەی، و دمینییە ب ئێكێ دیڤە.
(11) 11. نەخێر وەنەكە، ئەڤ قەومینە و ئایەتێت د دەرهەقدا هاتین، بۆ بیرهاتن و پێڤەچۆنێنە.
(12) 12. هەچیێ بڤێت دێ مفای ژێ وەرگریت و ل سەر ڕێڤەچیت.
(13) 13. و ئەڤ بیرهاتن و پێڤەچۆنە، د هندەك كتێباندانە د پیرۆزن.
(14) 14. [ئەو كتێب یێت] بلند و خودان ڕێز و ڕویمەت و پاقژن.
(15) 15. د دەستێ هندەك ملیاكەتاندانە، ئێلچینە د ناڤبەرا پێغەمبەراندا.
(16) 16. ئەو ملیاكەت یێت خودان ڕێز و ڕویمەتن، و بێ فەرمانییا (بێ ئەمرییا) خودێ ناكەن.
(17) 17. وەی بۆ مرۆڤی، چەندێ بێ نان و خوێیە و چەند یێ ژ ڕێ دەركەڤتییە.
(18) 18. خودێ ژ چ چێكرییە [بیرا وی دئینیتە بنەتارێ وی، دا خۆ مەزن نەكەت و ب خۆ نەخڕیێت، و خۆ ل سەر سەرێ بەنیێت خودێ مەزن نەكەت].
(19) 19. ژ چپكەكێ، بێ كێماسی و ئەو یێ تەكووز چێكری.
(20) 20. پاشی ڕێكا بوونێ بۆ ب ساناهی ئێخستی [و ژیان بۆ ساناهی كر و هەردو ڕێك بۆ ئاشكەراكرن، ڕێكا باشییێ و باوەرییێ و ڕێكا خرابییێ و گاورییێ، كا وی كیژ بڤێت بلا بۆ خۆ وێ بگریت].
(21) 21. پاشی مراند و بن ئاخ كر، [دا بێنا وی ب سەر ساخاندا نەئێت، و دەهبە (وحش) نەخۆن بۆ هندێ بێ بها نەبیت].
(22) 22. پاشی دەمێ خودێ ڤیا، دێ زیندی كەتەڤە.
(23) 23. نەخێر د سەر ڤێ هەمیێڕا، تشتێ خودێ ژێ ڤیایی نەكر.
(24) 24. بلا مرۆڤ بەرێ خۆ بدەتە خوارن و ڤەخوارنا خۆ [و هویرك هزرا خۆ تێدا بكەت، كا چاوا دبیتە خوارن و دئێتە بەر دەستێ وی].
(25) 25. مە ئاڤ ژ عەوران داڕێت.
(26) 26. و مە ئەرد ب گل و گیا و شینكاتیڤە كەلاشت.
(27) 27. مە دان و دەرامەت ژێ دەرئێخست [وەكی دەخلی و جەهی و برنجی، كو خوارنا سەرەكینە بۆ مرۆڤی].
(28) 28. هەروەسا تری و زەرزەوات ژی.
(29) 29. و زەیتوون و دارقەسپ ژی.
(30) 30. و جنیك و بیستانێت تێكڕا ژی.
(31) 31. و فێقی و چەرە ژی.
(32) 32. سوود و مفا بۆ هەوە و تەرش و دەوارێت هەوە.
(33) 33. ڤێجا ئەگەر ڕۆژا مرۆڤی ژ گوهان دكەت (كو ڕۆژا قیامەتێیە) هات.
(34) 34. ڕۆژا مرۆڤ ژ برایێ خۆ دڕەڤیت [و براتیا خۆ یا دەیبابی ژ بیر دكەت، و ژ ترساندا پشتا خۆ ددەتێ].
(35) 35. ڕۆژا مرۆڤ ژ دەیبابێت خۆ دڕەڤیت، و كەس خۆ ل كەسێ نەكەتە خودان.
(36) 36. ڕۆژا مرۆڤ ژ ژن و زاڕۆكێت خۆ دڕەڤیت [ئەو ژن و عەیالێ د دنیایێدا هند حەژێ دكر، و سەرخاترا وان، سینگێ خۆ دئێخستە هەمی نەخۆشییان، ئەڤرۆ دێ ژێ ڕەڤیت].
(37) 37. هەر ئێك وێ ڕۆژێ ب خۆڤە یێ مژویلە، و حالێ وی بەسی وییە.
(38) 38. وێ ڕۆژێ هندەك سەروچاڤ د گەشن.
(39) 39. دەڤ ب كەنی و بەختەوەر و دلخۆشن.
(40) 40. و هندەك سەروچاڤ وێ ڕۆژێ د شۆڕ و تۆزەوینە.
(41) 41. ڕەشاتییێ هلچنینە.
(42) 42. ئەها ئەڤەنە، گاورێت ژ ڕێ دەركەڤتیێت گونەهكار.