(1) 1. (الر) ب ڤی ڕەنگی دئێتە خواندن، ئەلف، لام، ڕا، ئەڤ قورئانە كتێبەكە مە بۆ تە ئینایییە خوارێ دا مرۆڤان ژ تاریستانێ [تاریستانا شرك و گاورییێ] ب دەستویرییا خودێ دەربێخییە ڕۆناهییا باوەرییێ، ڕێكا خودایێ سەردەست و هێژایی شوكور و سوپاسییێ.
(2) 2. ئەو خودایێ هندی د ئەرد و ئەسماناندا هەی یێ وی، و هیلاك و نەخۆشی بۆ گاوران بیت ژ ئیزایەكا دژوار و گران.
(3) 3. ئەوێت ژیانا دنیایێ ب سەر یا ئاخرەتێ دئێخن، و ڕێكا خودێ ل بەر خەلكی دگرن، و خوار و ڤیچ دخوازن، دا خەلكی ژێ بدەنە پاش، ئەڤە یێت د گومڕایییەكا دویر و ئاشكەرادا.
(4) 4. و مە چو پێغەمبەر نەهنارتینە ئەگەر ب زمانێ وی ملەتی نەبیت یێ مە بۆ هنارتی [دا فەرمان و بەرنامەیێ خودێ] بۆ وان دیار بكەت، [پشتی پێغەمبەر بۆ وان دیار دكەت، ئەو نەشێت كەسێ ڕاستەرێ بكەت]، ڤێجا یێ خودێ بڤێت دێ گومڕا و بەرزەكەت، و یێ بڤێت ژی دێ ڕاستەڕێ كەت، و ئەوە یێ سەردەست و كاربنەجهـ.
(5) 5. و ب سویند مە مووسا ب موعجیزەیێت خۆ [كو نەهـ موعجیزە بوون] هنارت، [و مە گۆتێ] ملەتێ خۆ ئسرائیلییان [ئەوێت كەڤتینە د بن عەبدینییا فیرعەونیدا] ژ تاریستانا گاورییێ دەربێخە ڕۆناهییا باوەرییێ، و ڕویدان و قەومینێت خودێ [ئەوێت ب سەرێ ملەتان هاتین و پێ د هیلاك چۆیین] بینە بیرا وان، ب ڕاستی د ئینانەبیرا ڤان ڕویداناندا نیشان و بەلگەیێت [مەزن] یێت هەین [ل سەر شیان و دەستهەلاتدارییا خودێ] بۆ هەر ئێكێ گەلەك سەبركێش و زێدە سوپاسدار بیت.
(6) 6. و بیننە بیرا خۆ وەختێ مووسایی گۆتییە ملەتێ خۆ: نیعمەت و كەرەمێت خودێ بیننە بیرا خۆ، وەختێ هوین ژ فیرعەونییان ڕزگار كرین، كو وان ئیزایەكا خراب و دژوار ددا بەر هەوە، كوڕێت هەوە دكوشتن و ژن و كچێت هەوە [بۆ خدامینییا خۆ] دهێلان، ب ڕاستی ئەڤە ئەزموون و جەڕباندنەكا مەزن بوو بۆ هەوە.
(7) 7. و بیننە بیرا خۆ وەختێ خودایێ هەوە ڕاگەهاندی [و هوین ئاگەهدار كرین] ئەگەر هوین شوكور و سوپاسییا خودێ بكەن، ئەز دێ نیعمەتێت خۆ ل هەوە زێدەكەم، و ئەگەر هوین چاڤكۆرەیییێ بكەن، و نیعمەتێت من نەئیننە بەر چاڤێت خۆ [ئانكو سوپاسییا نیعمەتێت من نەكەن] هنگی بزانن ئیزایا مە یا گران و دژوارە.
(8) 8. مووسایی گۆت: ئەگەر هوین و هندی ئەوێت د ئەردیدا هەین گاور ببن [یان سوپاسییا نیعمەتێت خودێ نەكەن]، ب ڕاستی خودێ یێ بێ منەتە و چو پاكی ب هەوە نینە [و سوپاسی و شوكورا هەوە چو لێ زێدە ناكەت، و نەسوپاسییا هەوە چو لێ كێم ناكەت]، و هێژایی سوپاسییێیە [چونكی نیعمەتێت وی گەلەكن، و فایدەیێ سوپاسدارییا وی هەر ل هەوە دزڤڕیت].
(9) 9. ئەرێ بەحس و خەبەرێت ئەوێت بەری هەوە بۆ هەوە نەهاتییە، ملەتێ نووح و عاد و (ثمود) و یێت پشتی وان هاتین، ژ بلی خودێ كەس نوزانیت كا چەند بوون، پێغەمبەرێت وان ب موعجیزە و نیشانێت ئاشكەراكەر بۆ هاتن، ڤێجا هەردو دەستێت خۆ ژ كەرباندا كێشانە د دەڤێت خۆدا و گەزتن، و گۆتن: ب ڕاستی ئەم باوەرییێ ب وی تشتی نائینین یێ هوین پێ هاتین، و ب ڕاستی ئەم بەرانبەری وی تشتێ هوین داخوازا مە بۆ دكەن ب گۆمانین [ژێ بێ باوەرین].
(10) 10. پێغەمبەرێت وان گۆتن: ئەرێ [هەوە] شك و گۆمانەك د خودێدا هەیە، چێكەرێ ئەرد و ئەسمانان داخوازا هەوە دكەت، دا گونەهێت هەوە ژێ ببەت [یێت وی بڤێن]، و هەوە هەتا وەختەكێ دیاركری بهێلیت و گیرۆ بكەت، گۆتن: هوین ژی مرۆڤن وەكی مە، هەوە دڤێت هوین بەرێ مە ژ وان پەرستییان وەرگێڕن، ئەوێت باب و باپیرێت مە دپەرستن، ڤێجا [ئەگەر هوین ڕاست پێغەمبەر بن] كا بەلگە و نیشانەكا ڕۆن و دیار بۆ مە بینن.
(11) 11. پێغەمبەرێت وان گۆتنە وان: [راستە] ئەم ژی مرۆڤین، وەكی هەوە، بەلێ خودێ كەرەما خۆ ب پێغەمبەراتییێ د گەل وی بەندەیی دكەت یێ وی بڤێت [و وی وەسا ڤیا ڤێ كەرەمێ د گەل مە بكەت]، و بۆ مە نەدورستە ئەم نیشان و بەلگەیەكی بۆ هەوە بینین ئەگەر ب دەستویرییا خودێ نەبیت، و بلا خودان باوەر پشتا خۆ ب خودێ گەرم بكەن.
(12) 12. و ما مە چ دەستویردان هەیە ئەم خۆ ب هیڤییا خودێڤە نەهێلین، و پشتا خۆ پێ گەرم نەكەین، ب ڕاستی وی بەرێ مە یێ دایییە وان ڕێكان یێت ئەم وی پێ بنیاسین، و ب سویند ئەم دێ بێنا خۆ فرەهـ كەین ل سەر وێ ئەزیەتا هەوە گەهاندییە مە، و بلا پشتگەرمیخواز پشتا خۆ بەس ب خودێ [ب تنێ] گەرم بكەن.
(13) 13. و ئەوێت گاوربوویین گۆتنە پێغەمبەرێت خۆ: ب سویند ئەم دێ هەوە ژ ئەردێ خۆ دەرئێخین، یان هوین دێ جارەكا دی زڤڕنەڤە سەر دینێ مە، ڤێجا هنگی خودێ وەحی بۆ وان هنارت، بێ گۆمان دێ ستەمكاران د هیلاك بەین.
(14) 14. و بێ گۆمان ئەم دێ هەوە پشتی وان ل سەر ئەردێ وان ئاكنجی كەین [ئەو ئەردێ ئەوان گەف ل هەوە دكرن كو هەوە ژێ دەربێخن]، ئەڤ پەیمانە [قڕكرن و نەهێلانا وان، و ئاكنجیكرنا هەوە ل جهێ وان] بۆ وییە ئەوێ ژ ڕاوەستیانا بەرهەمبەری من و ڕۆژا قیامەتێ بترسیت.
(15) 15. و پێغەمبەران داخوازا سەركەڤتنێ ژ خودایێ خۆ كر [ل سەر نەیاران]، [ڤێجا خودێ بۆ ئینا]، و هەمی خۆمەزنكەرێت زێدە سەرڕەق خوسارەت و بێ هیڤی بوون.
(16) 16. و [وێ ڕۆژێ] جەهنەم و دۆژەهـ ب دویڤ وانڤەیە، و دێ ب ئاڤا كێم و زۆخێ ئێنە ئاڤدانێ [دێ ئاڤا كێم و زۆخێ دەنە وان].
(17) 17. دێ ب زەحمەت داقورچینیت و نەشێت خۆش داعویریت، و مرن ژ هەمی ڕەخانڤە دئێتێ، بەلێ نامریت [كو تەنا ببیت] و ئیزایەكا گران یا ل دویڤ وی.
(18) 18. مەتەلا وان ئەوێت باوەری ب خودایێ خۆ نەئینایین، كار و كریارێت وان وەكی خۆلییەكێنە هوڕەبایەك ل ڕۆژەكا ب هوڕوبا لێ بدەت، ئەو نەشێن خێر و كریارێت خۆ ب دەست خۆڤە بینن [چونكی ب گاورییێ یێت پویچ كرین، وەكی خۆلییا هوڕەبای بری نائێتە زڤڕاندن] ئەها ئەڤەیە گومڕایییا كویر و دویر.
(19) 19. ئەرێ ما تە نەزانییە خودێ ئەرد و ئەسمان ب زانایی و حیكمەت چێكرینە [كو ب ڕێكا وان بگەهنە دەستهەلاتدارییا خودێ]، ئەگەر بڤێت دێ هەوە بەت و مرینیت، و هندەك مرۆڤێت نوی دێ ئینیت.
(20) 20. و ئەڤە ل بەر خودێ نەیا ب زەحمەتە.
(21) 21. و [ڕۆژا قیامەتێ] ئەو هەمی [ب كار و كریارێت خۆڤە] دێ بەرانبەری خودێ ئاشكەرا بن، ڤێجا [وی وەختی] بندەست و بەلنگاز دێ بێژنە وان یێت ئەو تەپەسەركرین و خۆ مەزنكرین [ئەوێت ئەو سەردابرین و نەهێلایین باوەرییێ بینن] ئەم دویكەڤتییێت هەوە بووین، ئەرێ هوین دشێن تشتەكی ژ ئیزایا خودێ ژ مە بدەنە پاش، دێ بێژن: ئەگەر خودێ ئەم ڕاستەڕێ كرباینە ئەم ژی دا هەوە ڕاستەڕێ كەین، وەكی ئێكە بۆ مە، چ ئەم نالنالێ بكەین، و چ ئەم بێنا خۆ فرەهـ بكەین، ڕزگاربوونا مە نینە.
(22) 22. [ڤێجا وەختێ حەق و حساب ب دویماهیك دئێت، و بەحەشتی دچنە د بەحەشتێدا، و دۆژەهی دچنە د دۆژەهێدا] شەیتان دێ بێژیت: ب ڕاستی خودێ پەیمان ب دورستی دابوو هەوە، و من ژی پەیمان دابوو هەوە [كو چو حساب و بەحەشت و دۆژەهـ نینن]، ڤێجا من درەو ل هەوە كر، و من چو دەستهەلات ل سەر هەوە نەبوو [ئەز ب خورتی و كۆتەكی پێ بەرێ هەوە بدەمە گاورییێ و گونەهان]، ژ بلی هندێ من گازی هەوە كر، و هوین ژی ل دویڤ گازییا من هاتن [هەوە گوهێ خۆ دا من و بوونە گاور]، ڤێجا گازندەیان ژ من نەكەن، و گازندەیان ژ خۆ بكەن، ئەز نەشێم د هەوارا هەوە بهێم و هەوە ژ ئیزایێ ڕزگار بكەم، و هوین ژی نەشێن د هەوارا من بهێن و من ژ ئیزایێ ڕزگار بكەن. ب ڕاستی ئەز یێ بەریمە ژ كریارا هەوە ئەز د دنیایێدا پێ كریمە هەڤپشك بۆ خودێ، بێ گۆمان بۆ ستەمكاران ئیزایەكا ب ژان و دژوار هەیە.
(23) 23. و ئەوێت باوەری ئینایین و كار و كریارێت قەنج كرین، ڕەوانەی وان بەحەشتان كرن ئەوێت ڕویبار د بنڕا دچن، و ب دەستویرییا خودایێ خۆ دێ هەروهەر تێدا مینن، و ملیاكەت سلاڤی وان دكەن.
(24) 24. ئەرێ ما تە نەدیت كا چاوا خودێ مەتەلەك ئینا و ڕۆنكر، پەیڤا پاك و پاقژ [كو (لا إله إلا الله)ـە] وەكی دارەكا پاقژە، بنێ وێ و ڕه و ڕویشالێت وێ یێت د ئەردیدا چۆیین، و یا بنەجهە و تایێت وێ یێت ل بەر ئەسمانی.
(25) 25. هەمی وەختان ب دەستویرییا خودایێ خۆ بەر و فێقییێ خۆ ددەت، و خودێ مەتەلان بۆ مرۆڤان دئینیت بەلكی [هزرا خۆ تێدا بكەن] بۆ خۆ پێڤە بچن.
(26) 26. و مەتەلا پەیڤا پیس [پەیڤا گاوری و بەرزەبوونێ] وەكی دارەكا پیسە ب ڕه و ڕویشالڤە ژ ئەردی هاتبیتە هلكێشان، چو ڕاوەستیان و خۆجهی بۆ نینە [هەروەسا پەیڤا گاورییێ خۆڕاگرتن و بەرەكەت نینە].
(27) 27. خودێ ئەوێت باوەری ئینایین ب ئاخڤتنا بنەجهـ ڕادگریت [كو پەیڤا (لا إله إلا الله)] د ژیانا دنیایێدا [ئانكو وەختێ د گۆڕیدا پسیار ژێ دئێتەكرن] و د قیامەتێ ژیدا و ل بەر ستەمكاران بەرزە دكەت [نەشێن بەرسڤا خۆ د گۆڕیدا بدەن، و بێ بەرسڤن ژی ڕۆژا حسێب د گەل دئێتەكرن]، و خودێ چ بڤێت وێ دكەت.
(28) 28. ئەرێ ما تە نەدیت، ئەوێت نیعمەت و كەرەما خودێ ژ چاڤكۆرەیی گوهاڕتی، و ملەتێ خۆ [ب سەرڕەقییا خۆ] كێشاینە خانییێ بنبڕی و هیلاكێ.
(29) 29. ئەو خانی دۆژەهە دێ چنە تێدا، و دێ تامكەنە گەرما وێ، و چ پیسە بنەجهە.
(30) 30. و وان هەڤال و هەڤپشك بۆ خودێ چێكرینە، دا خەلكی ژ ڕێكا خودێ دەربێخن [هەی موحەممەد] بێژە [وان]: ل سەر خۆشییێت خۆ بن، دویماهیكا هەوە هەر ئاگرە.
(31) 31. [هەی موحەممەد] بێژە بەندەیێت من ئەوێت باوەری ئینایین: [كا چاوا مە فەرمانا وان كرییە] بلا نڤێژان بكەن و ژ ڕزقێ مە دایییە وان، بلا ژ نەپەنی و ئاشكەرا، خێران ژێ بدەن، بەری هاتنا وێ ڕۆژێ، ئەوا نە كڕین و نە فرۆتن و نە دۆستینی و نە هەڤالینی، تێدا هەی.
(32) 32. خودێ ئەوە یێ ئەرد و ئەسمان چێكرین و باران ژ ئەسمانی ئینایییە خوارێ، ڤێجا [ب وێ بارانێ] فێقییێت ڕەنگ ڕەنگ یێت بۆ هەوە دەرئێخستین و كرینە ڕزقێ هەوە، و گەمی بۆ هەوە یێت سەرنەرم كرین و ب ساناهی ئێخستین، دا ب ئەمرێ خودێ د دەریایێدا بچن، [و هەوە و تشتێت هەوە ژ جهەكی ببەنە جهەكێ دی]. و ڕویبار بۆ هەوە ساناهی و بەردەست كرن [دا هوین ژێ ڤەخۆن و تۆڤچینییا خۆ پێ بكەن].
(33) 33. و ڕۆژ و هەیڤ ژی یێت ب بەر خزمەتا هەوە ئێخستین، و بەردەوامن د ڕاستكرنێدا (اصلاح) یان بەردەوامن د چۆنێدا بێ ڕاوەستیان، و شەڤ و ڕۆژ ژی یێت بۆ هەوە ساناهی كرین [دا هوین د شەڤێدا ڤەهەسن و د ڕۆژێدا بۆ خۆ شۆل بكەن].
(34) 34. و هەر تشتێ هەوە ژێ خواستی یێ دایییە هەوە، و ئەگەر هوین نیعمەت و كەرەمێت خودێ بهەژمێرن هوین نەشێن بهەژمێرن [چونكی هندی گەلەكن ب دویماهیك نائێن]، ب ڕاستی مرۆڤ زێدە ستەمكار و زێدە چاڤنقە.
(35) 35. و بیننە بیرا خۆ وەختێ ئیبراهیم پێغەمبەر گۆتی: خودێوۆ تو ڤی باژێڕی [مەكەهێ] ئێمن بكە و بكە جهێ ئێمنییێ، و من و زاڕۆكێت من ژ پەرستنا بوتان دویربێخە.
(36) 36. خودێوۆ ب ڕاستی وان بوتان گەلەك مرۆڤ یێت د سەردابرین، ڤێجا هەچیێ ل دویڤ من هات و ڕێكا من گرت ئەو ژ منە، و یێ گوهێ خۆ نەدا من، ب ڕاستی تو یێ گونەهـ ژێبەر و دلۆڤانی.
(37) 37. خودایێ مە ب ڕاستی من هندەك ژ دویندەها خۆ [ئیسماعیل و بچویكێت وی]، یێت ل نهالەكا بێ شینكاتی ل دەڤ مالا تە یا موحەڕەم [كەعبەیێ] ئاكنجی كرین، خودایێ مە، دا نڤێژان [تێدا] بكەن، ڤێجا دلێ هندەك مرۆڤان ب نك وانڤە ببە [بچنە دەڤ وان، و ئەو ب تنێ نەمینن]، و فێقییێت ڕەنگ ڕەنگ ب ڕزقێ وان بكە، دا سوپاسییا تە بكەن.
(38) 38. خودایێ مە ب ڕاستی ئەوا ئەم ڤەدشێرین و نەڤەشێرین تو دزانی، و چو تشت د ئەرد و ئەسمانیدا ل بەر خودێ بەرزە نابن.
(39) 39. هەمی شوكور و سوپاسی بۆ وی خودایی ئەوێ ب پیراتی ئیسماعیل و ئیسحاق دایینە من، ب ڕاستی خودایێ من یێ گوهدێر و دوعا قەبویلكەرە.
(40) 40. خودێوۆ تو من و هندەكان ژ دویندەها من ژ نڤێژكەران [ب ڕەنگێ پێدڤی] دانە، خودایێ مە، و دوعایا مە قەبویل بكە.
(41) 41. خودایێ مە گونەهێت من و دەیبابێت من و خودان باوەران، ڕۆژا حەق و حساب دئێتەكرن، ژێ ببە [دوعا بۆ دەیبابێت خۆ كرن بەری بزانیت ئەو دژمنێت خودێنە].
(42) 42. و هزر نەكە خودێ یێ بێ ئاگەهە ژ وێ یا ستەمكار دكەن، نێ [ب تنێ] حسێب و جزایێ وان بۆ ڕۆژەكێ ب پاش دئێخیت، چاڤ تێدا بەق دبن و ژ ترساندا نانقن.
(43) 43. وێ ڕۆژێ ئەو ب لەزن [و ل كەسێ نازڤڕن]، و سەرێت وان سەرئەڤرازن [ژ ترساندا كەس بەرێ خۆ نادەتە كەسێ، و چاڤێت هەمییان سەرئەڤرازن كا دێ حسێبا وی چاوا بیت]، و چاڤێت وان زیق دمینن و ناكەڤنە سەرێك، و دلێت وان ڤالا دبن ژ تێگەهشتنێ [ژ ترس و گوهشینێ].
(44) 44. [هەی موحەممەد] مرۆڤان ژ وێ ڕۆژا ئیزا بۆ وان دئێت [كو ڕۆژا قیامەتێیە] بترسینە، ڤێجا ئەوێت ستەمكاری كرین دێ بێژن: خودایێ مە، هەتا وەختەكێ نێزیك مە بهێلە، دا ئەم بەرسڤا بانگ و گازییا تە بدەین، و ڕێكا پێغەمبەران بگرین و ل دویڤ وان بچین [و ملیاكەت دێ بێژنێ]، ما هەوە بەری نوكە سویند نەخواربوو هوین دێ د ئەردیدا مینن و چو قیامەت نینن.
(45) 45. و ما هوین نە ئەو بوون، ئەوێت هوین ل جهێ وان ئاكنجی بوویین ئەوێت ستەم ل خۆ كرین؟ و بۆ هەوە دیاربوو كا مە چ ل وان كر، و مە بۆ هەوە مەتەل دیاركرن و ئینان [بەلێ هەوە بۆ خۆ چو ژێ نەگرت].
(46) 46. ب ڕاستی وان [موشركێت مەكەهێ] پیلان و ئۆیین [بۆ پویچكرنا ئیسلامێ و بەرسینگگرتنا هەقییێ و كوشتنا پێغەمبەری] گێڕان، و جزایێ پیلانگێڕان یێ ل دەڤ خودێ، و خودێ پێ ئاگەهە، و هەرچەندە ئەو پیلانێت ئەوان گێڕایین، دا چیایان ژ جهـ بەن [و پیلانێت وان ئەو نەبوون یێت بشێن چیایان (كو ئیسلام و بانگ و گازییا ئیسلامێیە) ژ بن بكەن و ژ جهـ ببەن].
(47) 47. هزر نەكە ئەو پەیمانا خودێ دایییە پێغەمبەرێت خۆ لێڤە ببیت و ب جهـ نەئینیت، ب ڕاستی خودێ یێ سەردەست و تۆلڤەكەرە.
(48) 48. ڕۆژا ئەڤ ئەردە ب ئەردەكێ دی، و ئەسمان ب هندەك ئەسمانێت دی دئێنە گوهۆڕین، و هەمی ژ گۆڕان بۆ خودایێ ب تنێ و ستۆچەمین دەردكەڤن.
(49) 49. و د وێ ڕۆژێدا [ڕۆژا قیامەتێ] دێ بینی گاور و موشرك پێكڤە یێت هاتینە قەید و زنجیركرن [یان دەست و پییێت وان د قەید و زنجیراندا یێت گەهاندینە ئێك].
(50) 50. جلكێت وان ژ قەترانێنە [قەتران دۆنەكە ژ دارەكێ دئێتە وەرگرتن دبێژنێ (ئەبهەل) و دئێتە كەلاندن، حێشترا گوڕی پێ دئێتە دۆنكرن، و ئەو ب خۆ یا نویسەك و بێهن پیس و تیژ و ئاگرگڕە، جەهنەمی ڕۆژا قیامەتێ دێ پێ ئێنە هنوین، هەتا وەكی جلكان لێ دئێت ل بەر وان، دا تیژی و گەنیاتی و گەزتن و زوی ئاگر گرتن ل سەر وان كۆم ببن]. و ئاگر ل سەر سەروچاڤێت وان بلند دبیت و هەمییێ ڤەدگریت.
(51) 51. دا خودێ جزایێ هەر مرۆڤەكی كا چ كار و كریار كرینە [ژ باشی و خرابییان] بدەتێ، و ب ڕاستی خودێ د حەق و حسابێدا یێ دەست سڤكە.
(52) 52. ئەڤ قورئانە ڕاگەهاندنەكە بۆ هەمی مرۆڤان، و دا پێ بێنە شیرەتكرن و ترساندن و ئاگەهداركرن، و دا بزانن [ب وان بەلگە و نیشانێت ڕۆن و ئاشكەرا تێدا] ب ڕاستی ئەو [یێ هێژایی پەرستنێ] خودایەكێ تاك و تەنیایە، و دا خودان ئاقل و ئاقلدار بۆ خۆ چام و عیبرەتان ژێ وەرگرن.