(1) 1. ب ڕاستی مە سەركەڤتنەكا ئاشكەرا و مەزن [كو پێكهاتنا حودەیبییەیە] دا تە.
(2) 2. دا خودێ ل گونەهێت تە یێت پێش و پاش ببۆریت، و كەرەم و نیعمەتا خۆ [ب سەرئێخستنا دینێ تە، و ب ڤەكرنا مەكەهێ] ل سەر تە تمام بكەت، و دا تە ل سەر ڕێكا ڕاست ڕاگریت و موكوم بكەت.
(3) 3. و دا تە ب سەركەڤتنەكا موكوم ب سەربێخیت، شكەستن تێدا نەبیت.
(4) 4. خودێیە دل ڕەحەتی و تەنایی داڕێتییە دلێت خودان باوەران، دا د سەر باوەرییا وانڕا باوەرییا وان پتر لێ بێت، و لەشكەرێ ئەرد و ئەسمانان یێ خودێیە و خودێ یێ زانا و كاربنەجهە.
(5) 5. [و خودێ ئەو سەركەڤتن و دل ڕەحەتییە دا] دا زەلام و ژنێت خودان باوەر ببەتە د وان بەحەشتاندا ئەوێت ڕویبار د بنڕا دچن، هەروهەر دێ تێدا مینن، و گونەهێت وان دێ ڕاكەت و ناهێلیت، و ئەڤە ل دەڤ خودێ سەرفەرازییەكا مەزنە.
(6) 6. و دا زەلام و ژنێت دوڕوی و زەلام و ژنێت موشرك ئەوێت هزرێت خەلەت ژ خودێ دكەن [هزر دكەن خودێ هاریكارییا پێغەمبەرێ خۆ و موسلمانان ناكەت، و ئەو جارەكا دی نازڤڕنەڤە مەدینەیێ]، ئیزا بدەت [و ئەو بەلا و ئاتافێت ئەو ل هیڤیێ ب سەرێ موسلمانان بێن]، بەلا و ئاتاف ب سەرێ وان بێن، و خودێ غەزەبێ ل وان بكەت و ژ دلۆڤانییا خۆ دویر بێخیت، و دۆژەهـ یا بۆ وان بەرهەڤكری، و ئەو چ پیسە دویماهیكەكا ڕەشە.
(7) 7. و لەشكەرێ ئەرد و ئەسمانان یێ خودێیە، و خودێ یێ سەردەست و كاربنەجهە.
(8) 8. ب ڕاستی مە تو یێ هنارتی، ببییە شاهد و مزگینئین و ئاگەهداركەر.
(9) 9. دا هوین [گەلی مرۆڤان] باوەرییێ ب خودێ و پێغەمبەرێ وی بینن، و دا هوین هاریكارییا پێغەمبەرێ وی بكەن و دا ب ڕێز و ڕویمەت بەرێ خۆ بدەنێ، و دا سپێدە و ئێڤاران [ئانكو هەمی دەمان ب پەرستنا خۆ] خودێ ژ كێماسییان پاقژ بكەن.
(10) 10. ب ڕاستی ئەوێت بەیعا تە دكەن و پەیمانێ [ل سەر مرنێ] ددەنە تە، ب ڕاستی ئەو پەیمانێ ددەنە خودێ، دەستێ خودێ د گەل دەستێ وانە، ڤێجا هەر كەسێ پەیمانا خۆ بشكێنیت، ب ڕاستی ئەو ب وێ شكاندنێ بەس زیانێ ل خۆ دكەت، و هەر كەسێ ئەو پەیمانا دایییە خودێ ب جهـ بكەت، خودێ زوی دێ خەلاتەكێ مەزن دەتێ.
(11) 11. ئەوێت ڤەمایین ژ كۆچەرێت عەرەبان [ئەوێت ژ دەرڤەی باژێران دژیان]، دێ بێژن مال و عەیالێ مە ئەم مژویل كرین [و مە نەشیا د گەل تە بێینە حودەیبیێ، و نە ب مە بوو]، ڤێجا داخوازا گونەهـ ژێبرنێ بۆ مە ژ خودێ بكە، و ئەو وێ ب ئەزمانێ خۆ دبێژن ئەوا نە د دلێ واندا، بێژە: ئەرێ ئەگەر خودێ زیانەك یان مفایەك بۆ هەوە بڤێت، كی دشێت ڕاوەستینیت و خۆ بدەتە بەر بڕیارا خودێ، نەخێر نەوەسایە [نەهاتنا هەوە نە ژ بەر مال و كەس و كارێت هەوە بوو]، و ب ڕاستی تشتێ هوین دكەن خودێ پێ ئاگەهە.
(12) 12. بەلێ هەوە [گەلی دوڕوییان] هزر دكر پێغەمبەر و خودان باوەر ئێدی نازڤڕنە ناڤ كەس و كارێت خۆ [و هەمی دێ ئێنە كوشتن، ژ بەر هندێ هوین ترسیان و هەوە ڤەمان هەلبژارت]، و ئەڤ كارێ هەوە د دلێ هەوەدا هاتبوو جوانكرن [لەوا هوین ب ڤەمانا خۆ یێت شایی بوون]، و هەوە هزرێت خراب دكرن و هوین [ل دەڤ خودێ] ملەتەكێ د هیلاك چۆیی بوون.
(13) 13. و هەر كەسێ [راست و دورست] باوەرییێ ب خودێ و پێغەمبەرێ وی نەئینیت، ب ڕاستی مە ئاگرێ دۆژەهێ بۆ گاوران یێ بەرهەڤكری.
(14) 14. مالداری و خودانییا ئەرد و ئەسمانان یا خودێیە، یێ بڤێت لێ ناگریت و گونەهێت وی دێ ژێبەت، و یێ بڤێت دێ ئیزادەت، و خودێ گونەهـ ژێبەر و دلۆڤانە.
(15) 15. ئەوێت ڤەماین [ژ دوڕوییان ئەوێت نەچۆیینە حودەیبییێ] دێ بێژن: ئەگەر هوین دەركەڤتنە خەیبەرێ دا دەستكەڤتییان بینن بهێلن، ئەم ژی د گەل هەوە بێین، دڤێن پەیمانا خودێ [ئەوا دایییە وان ئەوێت چۆیینە حودەیبییە كو دێ دەستكەڤتییێت خەیبەرێ دەتە وان] بگوهۆڕن، بێژە وان: قەت هوین د گەل مە ناهێن، خودێ بەری نوكە یا گۆتی [دەستكەڤتییێت خەیبەرێ بەس بۆ وینە ئەوێ چۆیییە حودەیبییێ]، ڤێجا دێ بێژن نەخێر خودایێ هەوە نەگۆتییە، بەلێ هوین ژ زكڕەشی ناهێلن، نەخێر وەنینە، ئەو كێم تێ دگەهن [و هزرا وان بەس ل سەر دەستكەڤتیانە].
(16) 16. بێژە ئەوێت ڤەمایین [ژ حودەیبیێ] ژ كۆچەرێت عەرەبان [ئەوێت ژ دەرڤەی باژێران ئاكنجی]، نێزیك هوین دێ بۆ [شەڕێ] ملەتەكێ ب هێز و شەڕكەر ئێنە داخوازكرن، یان هوین دێ شەڕی د گەل وان كەن یان دێ بێ شەڕ موسلمان بن، ڤێجا ئەگەر هوین گوهدارییێ بكەن [و دەركەڤن بۆ شەڕی] خودێ دێ خەلاتەكێ باش دەتە هەوە، و ئەگەر هوین پشتا خۆ بدەنێ و ڤەمینن هەروەكی هوین بەری نوكە [ژ حودەیبیێ] ڤەمایین، خودێ دێ هەوە ب ئیزایەكا دژوار و ب ژان ئیزادەت.
(17) 17. چو گونەهـ ل سەر كۆرە و سەقەت و نەخۆشان نینە [پشكداریێ د شەڕیدا نەكەن]، و هەر كەسێ گوهێ خۆ بدەتە خودێ و پێغەمبەرێ وی، خودێ دێ وی بەتە بەحەشتێت ڕویبار د بنڕا دچن، و هەر كەسێ بەرێ خۆ [ژ گوهدارییا خودێ] وەرگێڕیت و پشتا خۆ بدەتێ، خودێ دێ وی ب ئیزایەكا دژوار و ب ژان ئیزادەت.
(18) 18. ب سویند خودێ ژ خودان باوەران ڕازی بوو وەختێ ل بن دارێ سۆز و پەیمان ددانە تە [ل حودەیبیێ]، ڤێجا خودێ ئەوا د دلێت واندا هەی [ژ دلبێشی و ڕاستییێ] زانی، ئینا دلرەحەتی و تەناهی ب سەر واندا داڕێت، و پەیمان ب سەركەڤتنەكا نێزیك [كو ڤەكرنا خەیبەرێ بوو] دا وان.
(19) 19. و گەلەك دەستكەڤتیێت دی ژی دێ گەهنە وان، و خودێ یێ سەردەست و كاربنەجهە.
(20) 20. خودێ پەیمان ب گەلەك دەستكەڤتییان یا دایییە هەوە، هوین دێ گەهنێ و دێ ب دەست خۆڤە ئینن، و بۆ هەوە لەز ل ڤێ كر [كو دەستكەڤتیێت خەیبەرێ بوون]، و نەهێلا دەستێ خەلكی [خەلكێ خەیبەرێ و هەڤپەیمانێت وان: ژ ئەسەدیان و غەتەفان] بگەهتە هەوە، و دا ئەڤە بۆ خودان باوەران ببیتە نیشانەك [ل سەر ڕاستیا پێغەمبەری د هەر تشتەكیدا كو پەیمان و ژڤان پێ دایی، و دا بزانن هەر كەسێ ڕێكا خودێ بگریت، خودێ دێ وی خەلات و سەرفەرازكەت]، و دا بەرێ هەوە بدەتە ڕێكا ڕاست [و هەوە ل سەر موكوم بكەت].
(21) 21. و هندەك غەنیمە و دەستكەڤتیێت دی ژی [خودێ بۆ هەوە لەز لێ كر كو غەنیمەیێت (هەوەزان) بوون] هەوە نەدشیا ب دەست خۆڤە بینن، بەلێ خودێ ب دەست هەوەڤە ئینان و بۆ هەوە ب ساناهی ئێخستن، و خودێ ل سەر هەر تشتەكی یێ خودان شیانە.
(22) 22. و ئەگەر ئەوێت گاوربوویین [خەلكێ مەكەهێ ل حودەیبیێ] شەڕێ هەوە كربانە [و سولح د گەل هەوە نەكربانە] دا شكێن و ڕەڤن، پاشی وان چو دۆست و هاریكار و پشتەڤان نەددیتن.
(23) 23. ئەڤە ڕێكا خودێیە د ڕاستا واندا ئەوێت بەری نوكە چۆیین [ئەو دێ پێغەمبەران هەر ب سەر ئێخیت، و هۆسا پەیمان یا دایی (كتب الله لاغلبن أنا ورسلی ـ خودێ سۆزا دایی سەركەڤتن بۆ من و پێغەمبەرێت منە)]، و تو چو گوهۆڕینێ بۆ ڕێكا خودێ نابینی.
(24) 24. و خودێ نەهێلا دەستێت وان بگەهنە هەوە و دەستێت هەوە بگەهنە وان ل حودەیبیێ، پشتی هوین ب سەر وان ئێخستین [و هەوە هەژمارەك ژ وان ئێخسیركری، ئەوێت ل بەر گەڕیاین ب سەر هەوەدا بگرن]، و خودێ ئاگەهـ ژ وێ هەیە یا هوین دكەن.
(25) 25. ئەون گاور بوویین و ڕێكا كەعبەیێ ل هەوە گرتین، و نەهێلاین قوربانێت بەرهەڤكری [ئانكو تەرشێت هاتینە گرتن بۆ قوربانیێ] بگەهنە جهێ خۆ یێ ڤەكوشتنێ، و ئەگەر ژ بەر هندەك زەلامێت خودان باوەر و ژنێت خودان باوەر [ئەوێت د ناڤ مەكەهێدا، و باوەرییا خۆ دیار نەكرین] نەبایە ـ كو هوین وان نانیاسن ـ دەمێ هوین ب سەر واندا بگرن بكەڤنە بەر پیێت هەوە، ڤێجا بێی كو هوین بزانن هوین عەیبدار ببن و زیان بگەهیتە هەوە، و خوین بكەڤیتە سەر هەوە [خودێ دەستێ هەوە ل سەر وان ڕانەدكر، و دا هەوە سەردەستی وان كەت، و خودێ ئەڤە كر و هۆسا هوین ژێكڤەكرن] دا ئەوێ خودێ بڤێت ب بەر دلۆڤانییا خۆ بێخیت، و ئەگەر ئەو [گاور و خودان باوەرێت د مەكەهێدا] ژێكڤە ببانە [و ژێك هاتبانە نیاسین]، ئەم دا ئەوێت گاور بوویین ژ وان، ب ئیزادانەكا دژوار و ب ژان، ئیزا دەین.
(26) 26. وەختێ ئەوێت گاوربوویین ڕكا نەزانینێ كرینە د دلێ خۆدا [رێكا سەرەدانا كەعبەیێ ل هەوە گرتین]، ئینا خودێ دلرەحەتییا خۆ ب سەر پێغەمبەری و ب سەر خودان باوەراندا داڕێت، و پەیڤا پارێزكارییێ (لا إله إلا الله محمد رسول الله) بۆ وان هەلبژارت، و ئەو بۆ ڤێ پەیڤێ هێژاتر بوون و خودانێت وێ بوون، و خودێ ئاگەهـ ژ هەر تشتەكی هەیە.
(27) 27. ب سویند خودێ خەونا پێغەمبەرێ خۆ ڕاست دەرئێخست، خودێ حەزكەت هوین بێ ترس و ب ئێمن و سەرتراشی و سەركورتكری دێ چنە د مزگەفتا حەرامدا [كو كەعبەیە]، ڤێجا خودێ ئەو [ژ پێكهاتنێ و فایدەیێ وێ] دزانی یا هەوە نەدزانی، ڤێجا بەری وێ سەركەڤتنەكا نێزیك دا هەوە [ئەو ژی ڤەكرنا خەیبەرێ بوو].
(28) 28. ئەوی [خودێ] پێغەمبەرێ خۆ ب ڕاستەرێیییێ [كو قورئانە] و ب دینێ ڕاستڤە هنارت، دا دینێ ڕاست (كو ئیسلامە) بكەتە سەرپشكا هەمی دینان، و ب سەر هەمی دینان بێخیت، و بەسە خودێ شاهدێ ڤێ بیت.
(29) 29. موحەممەد پێغەمبەرێ خودێیە، و ئەوێت د گەل د ڕاستا گاوراندا یێت دژوارن، و د ناڤبەرا خۆ ب خۆدا دلۆڤانن، هندی تو دبینی هەر یێ د ڕكووع و سوجدەیێدا، كەرەم و ڕازیبوونا خودێ دخوازن، نیشانا وان یا ل سەروچاڤێت وان ژ بەر سوجدەبرنێ، د تەورات و ئنجیلێدا ژی ئەڤەیە پەسن و سالۆخەتا وان، وەكی شینكاتییەكێنە زیلك دابیت و ب هێز كەڤتبیت و ستویر بووبیت، ڤێجا ل سەر بنێ خۆ ڕاست ڕابووبیت، و جۆتیار ژێ عەجێبگرتی بمینیت [ئەڤە نموونەیەكە خودێ ل سەر هەڤالێت پێغەمبەری ددانیت، دەستپێكێ یێت كێمن، پاشی دێ زێدەبن و پتر لێ ئێن و ب هێز كەڤن، وەكی بنا شینكاتی دەستپێكێ یا لاوازە و ڕۆژ بۆ ڕۆژێ ستویر دبیت]، [و هۆسا موسلمانان زێدە دكەت]، دا كەربێت گاوران پێ ڤەكەت، و ئەوێت ژ وان باوەری ئینایین و كار و كریارێت ڕاست و دورست كرین، خودێ پەیمان ب لێبۆرینێ و خەلاتەكێ مەزن یا دایییە وان.