(1) 1. سویند ب وان ملیاكەتێت ب دژواری جانێ گاوران دكێشن. [هەر ل دەستپێكا كێشانا ڕوحێ دێ كەڤنە بەر ئیزا و نەخۆشییان، و ب توند و دژواری و بێ ڕەحم ملیاكەت جانێ وی دكێشن، دا هەمی گەهـ و بارێت وی بەر ئیزا ببن].
(2) 2. و سویند ب وان ملیاكەتێت ب ڕەحەتی و نەرمی جانێ خودان باوەران دكێشن [دەمێ مرۆڤێ چاك و باوەریدار دكەڤتە د سەكەراتێدا، ملیاكەت ڕەحمێ پێ دبەن و نەرم و ڕەحەت جانێ وی دكێشن، دا نەئێشیت، و دا بزانیت كو ئەو یێ ل سەر وەغەرەكا خۆش، و دێ بەر ب ژینەكا خۆشتر چیت].
(3) 3. و سویند ب وان ملیاكەتێت فەرمانێت خودێ ب لەز دئیننە خوارێ.
(4) 4. و سویند ب وان ملیاكەتێت بەرەبەزینكێ ب جانان دكەن، بۆ جهێ وان یێ دویماهییێ.
(5) 5. و سویند ب وان ملیاكەتێت كاروبارێ بوونێ ئانكو وجوودێ، ب فەرمانا خودێ ب سەروبەر دكەن.
(6) 6. [سویند ب ڤان هەمییان] ڕۆژا ئەرد ب بارێ خۆڤە دهەژیێت [هەر دێ ئێت، دەمێ پفا ئێكێ ل شاخكی دئێتە دان هەمی تشتێ خودان ڕوح پێ دمرن].
(7) 7. د پشتڕا پفا دی ژی دئێت [كو سەرێ ڕابوونا مرۆڤانە].
(8) 8. وێ ڕۆژێ هندەك دل د پەریشان و ب ترسن.
(9) 9. د چاڤ شۆڕ و ب ترسن.
(10) 10. دبێژن ئەرێ پشتی مرنێ ئەم دێ ساخ بینەڤە، و دێ زڤڕینە سەر حالێ خۆ یێ ئێكێ، پشتی مرنێ.
(11) 11. ئەرێ پشتی ئەم دبینە كۆمەكا هەستیكێت هەلوەریای.
(12) 12. [ب تڕانەڤە و ژ نەباوەری] دبێژن: ئەگەر وەبیت و ڕاست بیت [كو ئەم جارەكا دی دێ ساخ بینەڤە، پشتی ئەم دمرین] ئەڤە زڤڕینەكا خوسارەتە.
(13) 13. دویرنەئێخن ب پفا دوویێ هوین دێ ڕابنەڤە [و دێ ل مەیدانا حەشرێ حازربن].
(14) 14. پشتی وێ پفێ، جهێ زكێ ئاخێ هوین دێ سەر ئاخ بن.
(15) 15. ما تە های ژ سوحبەتا مووسایی نەبوویییە؟.
(16) 16. دەمێ خودێ ل نهالا پیرۆز (طوی) ل چیایێ (سینا) گازی كریێ.
(17) 17. گۆتیێ: هەڕە دەڤ فیرعەونی، گەلەك یێ د سەر پێ خۆدا چۆی و د ستەمێدا زێدە یێ خراب بووی.
(18) 18. بێژێ: تە دل تێ هەیە ل خۆ بزڤڕی، و خۆ ژ گونەهان بشۆی.
(19) 19. [بێژێ:] و ئەز دێ بەرێ تە دەمە خودایێ تە، دا تو بترسی.
(20) 20. و مووسایی نەدیتییا (موعجیزەیا) مەزن نیشا دا، كو دار دبوو مار.
(21) 21. فیرعەونی باوەر ژێ نەكر، و گوهدارییا خودێ نەكر.
(22) 22. پاشی پشت دا باوەرییێ (ئیمانێ)، و لەز ل خرابیا مووسایی و خودان باوەران كر.
(23) 23. خەلك ل خۆ كۆمكر و بانگ هلدێرا.
(24) 24. گۆت: ئەز خودێ و خودانێ هەوە یێ مەزنم، و هەوە ژ من پێڤەتر چو خودێ نینن.
(25) 25. ئینا خودێ ل سەر دنیایێ خەندقاند، و ل ئاخرەتێ دۆژەهـ كرە بارا وی [و خودێ ئیزایا دنیایێ و ئاخرەتێ دا بەر].
(26) 26. ب ڕاستی چیڕۆكا فیرعەونی چامە و عیبرەتە، بۆ وی یێ ژ خودێ بترسیت.
(27) 27. ئەرێ ساخكرنا هەوە پشتی مرنێ ب زەحمەتترە یان چێكرنا ئەسمانی؟.
(28) 28. بانێ وی بلند كر و بێ كێماسی دورست كر.
(29) 29. شەڤا وی تاریكر و ڕۆژا وی ب ڕۆناهی ئێخست.
(30) 30. و ئەرد پشتی هنگی ل سەر ئاوایێ هێكێ ڕاست و خۆشكر بۆ ژیانێ.
(31) 31. و ئاڤ و چەرە ژێ دەرئێخست.
(32) 32. و چیا بۆ كرنە سنگ، دا نەهەژیێت.
(33) 33. دا هوین هەمی پێكڤە ب جانەوەرێت خۆڤە مفای ژێ وەرگرن.
(34) 34. ئەگەر ئەو ڕۆژا ب ترس و سەهم هات [ڕۆژا ژ ترسا وێ، سەرێ بچویكان سپی دبیت].
(35) 35. ڕۆژا كار و كریارێت مرۆڤی دئێنە بیرا مرۆڤی.
(36) 36. و ڕۆژا دۆژەهـ ل خودان چاڤان دیار دبیت.
(37) 37. ڤێجا ئەو كەسێ گەلەك ستەم و زۆری كرین، د دەرهەقا خودێدا.
(38) 38. و ژیانا سەر دنیایێ چێتر ڤیای ژ ژیانا ئاخرەتێ [و ژیانا دنیایێ ب سەر یا ئاخرەتێ ئێخستی].
(39) 39. ئەها دۆژەهـ جهێ وییە.
(40) 40. بەلێ ئەو كەسێ ترسا ڕاوەستیانا بەرانبەری خودێ د دلیدا، و بەرێ خۆ ژ دلخواستنێ وەرگێڕای.
(41) 41. بەهەشت دێ بیتە جهێ وی.
(42) 42. پسیارا قیامەتێ ژ تە دكەن [هەی موحەممەد] كا كەنگی دێ ڕابیت؟!.
(43) 43. ما تو چ ژێ دزانی هەتا پرسا وێ ژ تە بكەن (ئانكو تو ژی نوزانی كەنگی دێ ڕابیت).
(44) 44. بێ گۆمان دویماهییا دنیایێ و هاتنا قیامەتێ، بەس خودایێ تە دزانیت.
(45) 45. كارێ تە بەس ترساندن و ئاگەهكرنا وی كەسییە یێ ژێ بترسیت.
(46) 46. دەمێ ئەو دبینن، دێ هزركەن مرنا وان ژ بێنەكا سپێدەیێ یان ئێڤاری پێڤەتر نەكێشایە.