(1) 1. پاكی و بلندی بۆ خودایێ خودان دەستهەلات و فەرمانداری، ئەو ل سەر هەر تشتەكی دەستهەلاتدارە.
(2) 2. ئەوێ مرن و ژین دایی، دا هەوە تێدا بجەڕبینیت كا كی ژ هەوە دێ كار و كریارێت باش كەت، و ئەوە سەردەست و گونەهـ ژێبەر.
(3) 3. ئەوە یێ حەفت ئەسمان ل سەرێك دانایین و ڕانایین، و دانان و ڕانان و چێكرنا خودێ یا وەسایە تو چو ڤێكنەكەڤتنێ تێدا نابینی، چاڤێت خۆ بگێڕە تو چو تیك و دەرزان ل ئەسمانان نابینی.
(4) 4. پاشی جارەكا دی چاڤێت خۆ ل ئەسمانان بگێڕە، دێ چاڤێت تە شەپرزە و وەستیایی ڤەگەڕن.
(5) 5. و ب سویند مە ئەسمانێ دنیایێ ب ستێران یێ خەملاندی، و مە ئەو ستێر یێت كرینە تێوەر بۆ ڕەجماندنا شەیتانان، و مە بۆ وان ئیزا و نەخۆشییا دۆژەها شاریایی یا بەرهەڤكری.
(6) 6. ئیزا و نەخۆشییا دۆژەهێ بۆ وان ئەوێت باوەری ب خودایێ خۆ نەئینایین، و دۆژەهـ چ پیسە دویماهیكە.
(7) 7. دەمێ ڤان گاوران دئاڤێژنە د دۆژەهێدا، دەنگەكێ كرێت ژێ دئێت وەكی زڕزڕێ و دغەونیت.
(8) 8. نێزیكە ئەو ئاگرە خۆ بخۆت و بپەقیت هندی ژ گاوران یا كەربگرتییە، هەر گاڤا ملیاكەتان پێلەك ژ گاوران ئاڤێتنە تێدا، زێرەڤانێت دۆژەهێ ژێ دپرسن: ما چو پێغەمبەر بۆ هەوە نەهاتبوون، هەوە ژ ڤێ ڕۆژێ بترسینن؟
(9) 9. گۆتن: بەلێ پێغەمبەر بۆ مە هات [مە بترسینیت]، مە ئەو درەوین دانا و باوەری پێ نەئینا و مە گۆت: خودێ چو نەهنارتییە، و هوین یێت د گومڕایییەكا گەلە مەزندا.
(10) 10. و گۆتن ئەگەر مە فام هەبایە و ئەم یێت كەڕ (بێ گوه) نەباینە، نوكە ئەم نەدبووینە دۆژەهی.
(11) 11. و گونەهـ ل سەر خۆ ئاشكەراكرن، دۆژەهی نەمینن و دویر بن ژ دلۆڤانییا خودێ.
(12) 12. ئەو كەسێت، بێی خودایێ خۆ ببینن، [یان ژی دەمێ ئەو ب تنێ و بەرێ كەسێ ل وان نە] ژێ بترسن، گونەهـ ژێبرن و خەلاتەكی مەزن بارا وانە.
(13) 13. هوین چ ئاخڤتنا خۆ ڤەشێرن چ ژی دەرەهی (ئاشكەرا) بكەن، خودێ هەر ژێ ب ئاگەهە، هەر تشتێ د دلێ مرۆڤیدا خودێ ژێ ب ئاگەهە.
(14) 14. ما ئەوێ مرۆڤ چێكری پێ نوزانیت؟ نێ هویربین و شارەزا هەر ئەوە.
(15) 15. ئەوە یێ ئەرد بۆ هەوە بەردەست و ساناهی كری، د ناڤدا بگەڕن و ژ ڕزقێ وی دایییە هەوە بخۆن، و زڤڕینا هەوە یا دویماهییێ هەر ب بال ویڤەیە.
(16) 16. ئەرێ ما هوین پشت ڕاست بووینە ژ وی ئەوێ ل ئەسمانی [مەخسەد خودێیە] كو هەوە د ئەردیدا نەبەتە خوارێ، هەروەكی ب سەرێ قاروونی ئینایی و ئەرد بلەرزیت.
(17) 17. ئان هوین پشت ڕاست بووینە ژ وی ئەوێ ل ئەسمانی [كو خودێیە] كو بەرەبارانەكێ ب سەر هەوەدا نەڕێژیت [هەروەكی ب سەرێ ئەبرەهەی ئینایی]، و هوین دێ زانن كا گەفا من یا چاوایە دەمێ هوین ب چاڤێ خۆ دبینن.
(18) 18. و ب سویند یێت بەری وان ژی باوەری ب ڤێ چەندێ نەئینان، و من ژی چاوا خەلەتیا وان دا بەر ڕوییێ وان [ب داڕێتنا ئیزا و نەخۆشیێ].
(19) 19. ئەرێ ما وان تەیر و تەوال، چەنگ ڤەكری و چەنگ گرتی و ل هەوا، و د سەر خۆڕا نەددیتن كەس وان ل هەوا ڕاناگریت ژ خودێ پێڤە، ئەوە ژ هەر تشتەكی ب ئاگەهـ.
(20) 20. ئەرێ غەیری خودێ كییە لەشكەر و هاریكاربیت بۆ هەوە و هەوە ب سەربێخیت؟ ب ڕاستی گاور یێ د سەرداچۆنەكا ئاشكەرادا.
(21) 21. ئەرێ ئەڤە كییە ڕزقی بدەتە هەوە ئەگەر خودێ ژ هەوە ڤەگریت [ب ڤەگرتنا ئەگەرێت دەرامەتی، ژ بارانێ و بای و نەهێلانا ئاڤا كانی و دەریایان، ئانكو هەوە كەس نینە پشتا خۆ پێ گەرم بكەن و بۆ خۆ بكەنە پشت]، بەلێ د سەر ڤێ ژیڕا هەر مانە د ڕكا خۆدا و دویر مان ژ هەقییێ.
(22) 22. ئەرێ ما هوین ناڕێننێ كا كیژ دورستترە، ئەوێ هەر ل دویفسەرێ خۆ دچیت و سەرچەمیایی، یان یێ ڕاست و سەربلند ڕێكا خۆ دبینیت و دچیت.
(23) 23. بێژە خودێ هوین یێت دایین و گوه و چاڤ و عەقل یێت دایینە هەوە، بەلێ [هوین ڤان كەرەم و نیعمەتان كێم ب كار دئینن د باشی و تاعەتاندا] هوین كێم شوكور و سوپاسییا خودێ ل سەر دكەن.
(24) 24. بێژە: هەر خودێیە هوین د ئەردیدا دایین و زێدەكرین، و هەر دێ ب بال ویڤە زڤڕن.
(25) 25. و دبێژن: كەنگی ئەو ڕۆژ دێ ئێت [ئەوا تو مە پێ دترسینی]، ئەگەر ڕاستە وەكی هوین دبێژن؟!.
(26) 26. بێژە: ب ڕاستی.. بەس خودێ وەختێ هاتنا ڕۆژا قیامەتێ دزانیت، و ئەز بەس هەوە پێ ئاگەهدار دكەم.
(27) 27. و وەختێ ئیزا و نەخۆشییێ نێزیكی خۆ دبینن، سەر و چاڤێت گاور و بێ باوەران تێك دچن و تۆزكی دبن، هنگی ملیاكەت دێ بێژنە وان: ئەها ئەڤە ئەو ڕۆژە ئەوا هەوە لەز لێ دكر.
(28) 28. بێژنە من ئەگەر خودێ ل دویفداخوازا هەوە، من و ئەڤێت د گەل من نەهێلیت و بمرینیت یان ڕەحمێ ب مە ببەت و ژییێ مە درێژ بكەت، ما ئەڤە دێ چ گەهینیتە هەوە، و چ دێ گاوران ژ ئیزا و نەخۆشییا دژوار قورتالكەت.
(29) 29. بێژە: بەس خودایێ دلۆڤانە مرۆڤی ژ ئیزا و نەخۆشییا دژوار قورتال دكەت، مە باوەری پێ ئینا و مە پشتا خۆ پێ گرێدا، و نێزیك هوین دێ زانن كی ژ مە د گومڕایییەكا ئاشكەرادایە، ئەم یان هوین؟!
(30) 30. بێژە [وان]: ئەرێ بێژنە من ئەگەر ئاڤا هەوە د ئەردیدا بەرزەبوو، كی دێ بۆ هەوە ب سەر ئەردی ئێخیت؟