(1) 1. سویند ب سپێدەیێ.
(2) 2. و سویند ب دەهكێت جەژنا حاجیان (دەهكێت سەرێ ذی الحجە).
(3) 3. و سویند ب كت و جۆتێ هەر تشتەكی.
(4) 4. و سویند ب شەڤێ دەمێ دچیت.
(5) 5. ئەرێ ئەڤ تشتێت سویند پێ هاتییە خوارن، نە هێژا و لائقی سویند خوارنێنە؟.
(6) 6. تە نەزانی كا خودایێ تە چ ب سەرێ ملەتێ هوود پێغەمبەری ئینا؟.
(7) 7. ئیرەما [ئیرەم ناڤەكە بۆ عاد] خودان ستوین و پایە یان خودان هێز و بەژنوبال.
(8) 8. ئەو ملەتێ وەكی وان، ب قەلافەت و خودان گەود و هێز، دئەردیدا نەهاتینە چێكرن.
(9) 9. و تە نەزانی كا چ ب سەرێ ملەتێ [(صالح) پێغەمبەر] (ثمود) ئینا، ئەوێت بەر ل (وادی القری) دبڕین، [جهەكە دكەڤیتە د ناڤبەرا شام و حیجازێدا]؟
(10) 10. و كا چ ب سەرێ فیرعەونێ خودان لەشكەر، ئەو لەشكەرێ ب زەند و باسك و هێز، ئینا؟
(11) 11. ئەوێت گەلەك دەستدرێژی و زێدەگاڤی د گونەهێدا كرین.
(12) 12. و گەلەك بێخێری و بێ شەرمی تێدا كرین.
(13) 13. ڤێجا خودایێ تە ئیزا و نەخۆشییەكا دژوار، ب سەرێ واندا داڕێت.
(14) 14. خودایێ تە ل بەر وان یێ ڕاوەستیایە، و هەمی كار و كریارێت وان ل بەر د ئاشكەرانە [و هەر ئێكی جزاییێ وی دێ دەتێ].
(15) 15. ڤێجا دەمێ خودێ مرۆڤی ب خێر و كەرەما خۆ دجەڕبینیت، دبێژیت: [ئانكو مرۆڤ دبێژیت] خودێ دا من، و ئەڤە قەدرە بۆ من، و ئەڤ خێر و كەرەمە نائێنە بەرچاڤان و نوزانیت جەڕباندنە.
(16) 16. و ئەگەر خودێ جەڕباند، ڕێكا ژینێ لێ بەرتەنگ كر، دێ بێژیت: خودێ ئەز ڕەزیل و ڕسوا كرم.
(17) 17. نەخێر وەنینە [دان و نەدان، ب قەدری و نەقدریڤە، نە یا گرێدایییە]، نێ هوین ب ڕاستی قەنجی و مەردینییێ د ڕاستا سێویدا ناكەن.
(18) 18. هوین ئێك و دو د بەر هاریكارییا بەلنگازیڕا ناكەن.
(19) 19. و هوین میراتێ حەلال و حەرام پێكڤە دخۆن [و حەقێ میراتخۆران ب دورستی نادەنێ، نەخاسمە یێ كچان].
(20) 20. و هوین گەلەك حەژ مالدارییێ ژی دكەن.
(21) 21. هۆ نەكەن، دەمێ ئەرد دهەژیێت و ڕاست دبیت، و چو ل سەر نەمینیت.
(22) 22. و خودێ هات بۆ جوداكرنا هەقییێ ژ نەهەقییێ، و ملیاكەت ڕێز ڕێز هاتن.
(23) 23. وێ ڕۆژێ دۆژەهـ هاتە بەرهەڤكرن، ئەو ڕۆژا مرۆڤ هەمی كار و كریارێت خۆ ل پێش چاڤێت خۆ دبینیت و دئینیتە بیرا خۆ، بەلێ چو مفای ژێ نابینیت.
(24) 24. دبێژیت خۆزی من تشتەك بۆ ژینا خۆ كربایە [و ژ نوی دزانیت ژیانا دورست ژیانا ئاخرەتێیە، نەیا دنیایێ ئەوا كورت].
(25) 25. وێ ڕۆژێ كەس وەكی خودێ ئیزا و نەخۆشییێ نادەتە بەر.
(26) 26. و كەس وەكی خودێ وی نائێخیتە قەید و زنجیران.
(27) 27. (د وێ ڕۆژێدا دێ ئێتە گۆتن:) هەی نەفسا ب باوەری و ئێمن و ڕەحەت و پشت ڕاست.
(28) 28. ب بال خودایێ خۆڤە بزڤڕە، قایل و ڕازی ب بارا خۆ، سەربارێ ڕازیبوونا خودێ ژ تە.
(29) 29. ڤێجا خۆ بدە د گەل بەندەیێت من.
(30) 30. و هەڕە د بەحەشتا مندا.