(1) 1. (حم) هۆسا دئێتە خواندن (حا، میم)، و ل دۆر ڕاڤەكرنا ڤان ڕەنگە تیپان، ل دەستپێكا سۆرەتا بەقەرە بزڤڕە.
(2) 2. ئینانەخوارا ڤێ كتێبێ ژ دەڤ خودایێ سەردەست و كاربنەجهە.
(3) 3. و مە ئەرد و ئەسمان و هندی د ناڤبەرا واندا بۆ هەقییێ، و هەتا دەمەكێ دەستنیشانكری، یێت دایین، و ئەوێت گاوربوویین ڕوییێ خۆ ژ وێ وەردگێڕن، ئەوا ژێ هاتینە ترساندن [كو ڕۆژا قیامەتێیە].
(4) 4. بێژە: كا بۆ من بێژن ئەوێت هوین شوینا خودێ دپەرێسن كا چ ژ ئەردی دایینە؟ یان ژی وان پشكدارییەك د چێكرنا ئەسماناندا هەیە؟ كا كتێبەكێ كو بەری قورئانێ هاتبیت، یان پاشمایییەكێ ژ زانینا ملەتێت كەڤن بۆ من بینن [شادەیییێ بۆ هەوە بدەن، هوین د پەرستنا ڤان بوتاندا دورستن]، ئەگەر هوین ڕاست دبێژن.
(5) 5. و ما كی ژ وی گومڕاترە، ئەوێ وی پەرستی شوینا خودێ دپەرێسیت، ئەوێ هەتا ڕۆژا قیامەتێ گول وان نەبیت و بەرسڤا وان نەدەت، و ئەو ب خۆ ژی ژ پەرستن و دوعایێت وان د بێ ئاگەهن.
(6) 6. و وەختێ مرۆڤ [ڕۆژا قیامەتێ] دئێنە كۆمكرن، ئەو (بوتێت وان) دێ بنە دژمنێت وان، و دێ حاشاتیێ ژ پەرستنا وان كەن [و دێ بەرائەتا خۆ ژ وان كەن].
(7) 7. و وەختێ ئایەتێت مە یێت ئاشكەراكەر بۆ وان دهاتنە خواندن، ئەوێت گاوربوویین، د ڕاستا قورئانێدا پشتی بۆ وان هاتی، گۆتن: ئەڤە سحرەكا ئاشكەرایە.
(8) 8. یان ژی دبێژن [موحەممەدی ئەڤ قورئانە] ژ نك خۆ یا چێكری، بێژە: ئەگەر من ژ نك خۆ چێ كربیت، هەوە پێ چێنابیت چو ئیزایێ ژ ئیزایا خودێ ژ من بدەنە پاش، و خودێ ئەڤا هوین د دەرهەقێ قورئانێدا دبێژن چێتر دزانیت [بێژە:] خودێ بەسە د ناڤبەرا من و هەوەدا شاهد بیت [ل سەر پێغەمبەراتییا من]، و ئەوە گونەهـ ژێبەر و دلۆڤان.
(9) 9. بێژە: ئەز نەپێغەمبەرێ ئێكێمە هاتیمە هنارتن [و بەری من چو پێغەمبەر نەهاتبنە هنارتن و كتێب بۆ وان نەهاتبن، بەری من گەلەك پێغەمبەرێت هاتین، و خودێ كتێب یێت بۆ وان هنارتین، ڤێجا چاوا كتێبا ئەز پێ هاتیم هوین درەو ددانن؟!]، و ئەز ژ دەڤ خۆ نوزانم كا خودێ دێ چ ل من و چ ل هەوە كەت [ئەگەر وەحی بۆ من نەئێت]، ژ وەحییا بۆ من دئێت پێڤەتر ئەز ل دویڤ چو یێ دی ناچم [و یا ل سەر من ئەوە ئەز هەوە بترسینم]، و ئەز ژ ئاگەهداركەر و پێغەمبەرەكێ ئاشكرا پێڤەتر نینم.
(10) 10. كا بێژنە من [حالێ هەوە دێ چ بیت] ئەگەر ئەڤ قورئانە [ئەڤا بۆ من هاتی] ژ دەڤ خودێ بیت، و هوین باوەرییێ پێ نەئینن و شاهدەك [زانا] ژ ئسرائیلییان شادەیییێ ل سەر ڕاستییا وێ بدەت و باوەرییێ پێ بینیت، و هوین خۆ مەزن بكەن و باوەرییێ پێ نەئینن، ب ڕاستی خودێ ملەتێ ستەمكار ڕاستەڕێ ناكەت.
(11) 11. و ئەوێت گاوربوویین گۆتە ئەوێت باوەری ئینایین: ئەگەر [ئەڤ دینێ هەوە و بەلنگازان، باوەری پێ ئینایی كو ئیسلامە] باشی بایە [ڤان بەلنگازان] بەری مە باوەری پێ نەدئینا، و پشتی وان باوەری پێ نەئینایی، گۆتن: ئەڤە درەوەكا كەڤنە [موحەممەدی ژ ملەتێت كەڤن یا وەرگرتی و ب بال خودێڤە لێ ددەت].
(12) 12. و بەری قورئانێ تەورات پێشی و دلۆڤانی بوو، و ئەڤ قورئانە ڕاستدەرئێخا كتێبێت بەری خۆیە و ب ئەزمانێ عەرەبییە، دا ئەوێت ستەم كرین بترسینیت و ئاگەهدار بكەت، و مزگینییە بۆ قەنجیكاران.
(13) 13. ب ڕاستی ئەوێت گۆتین خودانێ مە خودێیە، پاشی ل سەر ئێكینییا خودێ و ئیسلامێ مایین، ڤێجا [ڕۆژا قیامەتێ] نە ترس بۆ وان هەیە، و نە ب خەم دكەڤن.
(14) 14. ئەڤە بەحەشتینە هەروهەر دێ د بەحەشتێدا مینن، ئەڤە خەلاتە بۆ وان ژ بەر كارێ وان دكر.
(15) 15. و مە ئەمرێ مرۆڤی یێ كری، قەنجی و باشییێ د گەل دەیبابێت خۆ بكەت، دەیكا وی ئەو ب نەخۆشی و زەحمەت [د زكێ خۆدا] یێ هەلگرتی، و ب زەحمەت و نەخۆشی یێ بووی، و هەلگرتنا وی هەتا شیرڤەكرنا وی سیه هەیڤن [ڤی وەختی هەمییێ دەیك زەحمەتێ پێڤە دبەت و نەخۆشییان ل سەر دبینیت]، گاڤا دگەهیتە كاملانا خۆ و دبیتە چل سالی، دبێژیت: خودێوۆ دەستێ من بگرە و هاریكارییا من بكە ئەز سوپاسییا تە بكەم ل سەر وان كەرەمێت تە د گەل من و دەیبابێت من كرین، و دەستێ من بگرە و هاریكارییا من بكە ئەز وێ باشییێ بكەم یا تو پێ ڕازی، و دویندەها من بكە دویندەهەكا باش، و من بەرێ خۆ دا تە و ئەز ل بەر ئەمرێ تە یێ ڕاوەستایمە.
(16) 16. ئەڤەنە، ئەم كار و كریارێت وان یێت باش قەبویل دكەین و ل گونەهێت وان دبۆرین، و ئەڤەنە د گەل خەلكێ بەحەشتێ د بەحەشتێدا، ئەڤە ئەو وەعد و پەیمانا ڕاستە ئەوا د دنیایێدا سۆز بۆ وان پێ دهاتە دان.
(17) 17. و ئەو كوڕێ دبێژیتە دەیبابێت خۆ ئۆف بۆ هەوە [ئەز ژ هەوە یێ تێرم]، ئەرێ هوین من ب هندێ دترسینن، ئەز [پشتی مرنێ ژ گۆڕی] دێ ساخ بمەڤە، و بەری من ئەڤە چەند ملەت و چەرخ چۆن [و كەس ژ وان نەزڤڕیڤە]، و ئەو دەیباب هەوارا خۆ دگەهیننە خودێ و دبێژنە كوڕێ خۆ: ئەها بۆ تە! بەرێ تە یێ ل هیلاكێ، باوەرییێ بینە، ب ڕاستی پەیمانا خودێ یا ڕاستە [و هەر دێ ئێت]، ڤێجا [كوڕێ وان] دێ بێژیت: ئەڤە [رابوونا پشتی مرنێ] ژ چیڕۆك و چیڤانۆكێت پێشییان پێڤەتر نینە [هوین من پێ دترسینن].
(18) 18. ئەڤە ژی [خودانێت ڤان سالۆخەتان و كوڕێت هۆسا و خودانێت ڤان ئاخڤتنان] وەكی ملەتێت بەری خۆ ژ ئەجنە و مرۆڤان، هێژایی ئیزایا خودێ بوون و یێت خوسارەت هەر ئەو بوون.
(19) 19. و هەر ئێك ژ ڤان [چ خودان باوەر، چ گاور] ل دویڤ كار و كریارێت خۆ پێك و پایە و پەییسكێت خۆ [ژ جزاكرن و خەلاتكرنێ] یێت هەین، دا خودێ ل دویڤ وان پێك و پایە و پەییسكان جزایێ كار و كریارێت وان دورست بدەتە وان، بێی ستەم ل وان بێتەكرن [نە خێرێت وان كێم دبن، و نە گونەهێت وان پتر لێ دئێن].
(20) 20. و ڕۆژا ئەوێت گاوربوویین پێشبەری ئاگری دئێنە ڕاوەستاندن [و ئاگری ب چاڤێت خۆ دبینن، ملیاكەت دێ بێژنە وان:] هەوە خۆشییێت خۆ هەمی د ژیانا دنیایێدا برن و هەوە كەیف پێ كر، ڤێجا ئەڤرۆ ژ بەر مەزناتییا ژ نەهەقی هەوە د ئەردیدا دكر، و ژ بەر دەركەڤتنا هەوە ژ ڕێكا خودێ، هوین دێ [ئەڤرۆ] ب ئیزایا ڕسوایی و سەرشۆریێ ئێنە جزاكرن.
(21) 21. [هەی موحەممەد سەرهاتییا] پێغەمبەرێ عاد [هوود پێغەمبەر] بۆ [ملەتێ خۆ] بێژە وەختێ ملەتێ خۆ ل ئەردێ ئەحقافێ ژ ئیزایا خودێ ترساندین، و پێغەمبەرێت بەری هوودی و پشتی وی ژی [هەمییان دگۆتن:] ژ غەیری خودێ كەسێ نەپەرێسن، ب ڕاستی [ئەگەر هوین غەیری وی بپەرێسن] ئەز دترسم ئیزایا ڕۆژەكا مەزن هەوە بهنگێڤیت.
(22) 22. گۆتن: ئەرێ تو بۆ مە هاتی دا مە ب درەوان ژ [پەرستنا] پەرستییێت مە بدەیە پاش؟ كا وێ ئیزایا تو مە پێ دترسینی و گەفێ پێ ل مە دكەی، بۆ مە بینە ئەگەر تو ڕاست دبێژی.
(23) 23. گۆت: ب ڕاستی بەس خودێ دزانیت [كا ئەو ئیزا كەنگی دێ ئێت]، و ئەڤە من ئەو گەهاندە هەوە یا ئەز پێ هاتیمە هنارتن، بەلێ ئەز دبینم هوین ملەتەكێ نەزانن.
(24) 24. ڤێجا وەختێ عەورەك دیتین یێ بەر ب نهالێت وانڤە دئێت [كەیفا وان هات]، و گۆتن: ئەڤە عەورەكە دێ بارانێ بۆ مە ئینیت [و ئەو دەمەك بوو خودێ باران ژ وان ڤەگرتبوون، ڤێجا وەختێ وان ئەو عەور دیتی هزركرن عەورێ بارانێیە و كەیفا وان پێ هات، و گۆتنە هوودی ئەڤ عەورە دێ بارانێ بۆ مە ئینیت]، [هوودی گۆتە وان:] نەخێر [ئەڤە نەعەورێ بارانێیە، وەكی هوین هزر دكەن] بەلێ ئەڤە ئەو ئیزایە یا هوین لێ ب لەز، ئەڤە بایەكە، ئیزایەكا ب ژان و دژوار یا تێدا.
(25) 25. [ئەو با] هەمی تشتان ب ئەمرێ خودێ وێران دكەت، ڤێجا [وەختێ ئەو با ب سەر واندا هاتی] وەلێ هاتن ژ خانییێت خۆ پێڤەتر نەددیتن، هۆسا ئەم ملەتێ گونەهكار جزا دكەین.
(26) 26. ب سویند مە ئەو شیان و هێز دابوو وان یا مە نەدایییە هەوە، و مە گوه و چاڤ و دل [هەمی ئالاڤێت تێگەهشتنێ] دابوونە وان، بەلێ [وەختێ ئیزایا خودێ ب سەر واندا هاتی] گوه و چاڤ و دلێت وان فایدەی وان نەكرن، و چو ئیزا ژ وان نەدانە پاش، چونكی وان باوەری ب ئایەتێت خودێ نەدئینان، و ئەو ئیزایا وان تڕانە پێ دكر و لێ ب لەز دۆرماندۆرێت وان گرتن.
(27) 27. و ب سویند مە گوندێت دۆرماندۆری هەوە د هیلاك برن، و مە نیشان و بەلگە ژ هەمی ڕەنگان و گەلە جاران بۆ وان ئینان، دا ل خۆ بزڤڕن.
(28) 28. بلا ئەوێت شوینا خودێ، و ب ئنیەتا نێزیكبوونێ ژ خودێ، هاتینە پەرستن هاریكارییا وان كربانە، نەخێر شوینا هاریكارییا وان بكەن ل وان بەرزەبوون، ئەڤە [هاریكاری نەكرنا پەرستییێت وان، و بەرزەبوونا وان ژ وان] جزایێ درەوا وانە وەختێ ئەو كرینە هەڤپشك بۆ خودێ.
(29) 29. و بۆ ملەتێ خۆ بێژە وەختێ مە بەرێ هندەك ئەجنەیان دایییە تە دا گول قورئانێ ببن، ڤێجا وەختێ ل سەر خواندنا قورئانێ حازر بوویین، گۆتن: خۆ بێ دەنگ بكەن و گوهێ خۆ بدەنێ، و وەختێ خواندن ب دویماهیك هاتی، ڤەگەڕیان و ملەتێ خۆ ئاگەهداركرن.
(30) 30. گۆتن گەلی ملەتێ مە، مە گول كتێبەكێ بوو، پشتی مووسایی یا هاتییە خوارێ، ڕاستدەرئێخا كتێبێت بەری خۆیە، بەرێ خۆدانێ خۆ ددەتە دینێ ڕاست و ڕێكا ڕاست.
(31) 31. گەلی ملەتێ مە، بەرسڤا پێغەمبەرێ خودێ بدەن [كو موحەممەدە] و باوەرییێ پێ بینن، [خودێ] دێ ل گونەهێت هەوە بۆریت، و دێ هەوە ژ ئیزایەكا ب ژان و دژوار قورتال كەت.
(32) 32. و هەر كەسێ بەرسڤا پێغەمبەرێ خودێ نەدەت [ئانكو هەر كەسێ باوەرییێ پێ نەئینیت] نەشێت خودێ نەچار بكەت، كو وی ل سەر ئەردی ئیزا نەدەت، و وی ژ بلی خودێ چو هاریكار و پشتەڤان نینن [وی ژ ئیزایا خودێ بپارێزن]، ئەڤە [ئەڤێت بێ باوەر ژ پێغەمبەرێ خودێ] یێت د ڕێبەرزەبوونەكا ئاشكەرادا.
(33) 33. ئەرێ ما نوزانن [هزرا خۆ ناكەن] ئەو خودایێ ئەرد و ئەسمان چێ كرین، و ب چێكرنا وانڤە نەوەستیایی و بێ هێز نەبووی، دشێت مرییان ژی ساخ بكەتەڤە، بەلێ ئەو دشێت مرییان ساخ بكەتەڤە، ب ڕاستی ئەو ل سەر هەر تشتەكی خودان دەستهەلات و شیانە.
(34) 34. و ئەوێت گاوربوویین ڕۆژا پێشبەری ئاگری دئێنە ڕاوەستاندن [ب چاڤێت خۆ ئاگری دبینن، و بێ هیڤی دبن كو ژێ قورتال ببن]، [ملیاكەت دێ بێژنە وان:] ئەرێ ئەڤ ئیزایە نەڕاستە [هەوە دگۆت ئەم نائێینە ئیزادان، و چو دۆژەهـ نینن]، دێ بێژن: بەلێ ب خودێ ڕاستە [ملیاكەت دێ بێژنە وان:] دێ ڤێجا ژ بەر گاورییا خۆ تامكەنە ئیزای.
(35) 35. ڤێجا [هەی موحەممەد] بێنا خۆ [ل سەر كرن و گۆتن و ئەزیەتا گاوران] فرەهـ بكە، هەروەكی پێغەمبەرێت ناڤدێر و ڕژد و مجد ل سەر فەرمانێت خودێ بێنا خۆ فرەهـ كری (پێغەمبەرێت ژێگۆتی ئەڤەنە: (نووح، ئیبراهیم، مووسا، عیسا و موحەممەد)، و ل ئیزادانا وان ب لەز نەبە، وەختێ ئەو وێ ئیزایێ دبینن یا پەیمان بۆ وان پێ هاتییە دان، د وەسانە هەچكو ژ بیستەكێ پێڤەتر ژ ڕۆژێ [د دنیایێدا] نەماینە، ئەڤ قورئانە ڕاگەهاندنەكە [پێغەمبەر دگەهینیتە هەوە] ئەرێ ما كەس هەیە د هیلاك بچیت، ژ بلی ملەتێ ژ ڕێدەركەڤتی و ڤاڕێ؟! [بەس ئەو دێ د هیلاك چن].