(1) 1. (ق) هۆسا دئێتە خواندن (قاف)، ل دۆر ڕاڤەكرنا ڤان ڕەنگە تیپان، بزڤڕە دەستپێكا سۆرەتا (بەقەرە). سویند ب قورئانا ب ڕویمەت و پایە بلند [تو پێغەمبەری و ڕۆژا قیامەتێ ڕاستە].
(2) 2. [خەلكێ مەكەهێ نە بەس باوەری نەئینان] بەلێ عەجێبگرتی بوون دەمێ پێغەمبەرەك هەر ژ وان بۆ وان هاتی، و گاوران گۆت: ب ڕاستی ئەڤە تشتەكێ عەجێبە و جهێ حێبەتیبوونێیە.
(3) 3. ئەرێ ئەگەر ئەم مرین و بووینە ئاخ [جارەكا دی دێ زیندی بینەڤە؟]، ب ڕاستی ئەڤ زڤڕین و ڤەگەڕیانە تشتەكی نەبەرئاقلە و دویرە].
(4) 4. ب سویند ئەم دزانین كا ئەرد چەندێ ژ لەشێ وان دخۆت و چەند كێم دكەت، و [ژ بلی ڤێ ژی] مە كتێبەكا پارێزەر یا هەی، هەمی تشت تێدا دنڤێسینە.
(5) 5. بەلێ گاڤا قورئان بۆ وان هاتی ئەوان درەو دانا، و ئەو یێت د كاروبارەكێ شەپلیدا [جار دبێژن سێربەندە، و جار دبێژن نابیت پێغەمبەر مرۆڤ بیت، و جار دبێژن دڤێت یێ زەنگین بیت... هتد].
(6) 6. ما ئەو بەرێ خۆ نادەنە ئەسمانێ د سەر خۆڕا، كا مە چاوا ئاڤاكرییە و خەملاندییە؟ و چو كون و دەرز لێ نینن.
(7) 7. و كا مە ئەرد ژی [چاوا] دەشت كرییە، و مە چیایێت بنەجهـ ئێخستینە تێدا [دا بۆ ببنە سنگ و نەلڤلڤیت]، و كا مە چاوا هەمی ڕەنگێت شینكاتیێ جوان د ئەردیدا شینكرینە.
(8) 8. [ئەڤ كارە، ئاڤاكرنا ئەسمانی و دانانا ئەردی هۆسا] خودێ كر دا دلان ل سەر هەقییێ ڕۆن بكەت، و ببیتە بیرئینان بۆ هەر بەندەیەكێ ل خودێ بزڤڕیت [و هزرا خۆ د چێكرییێت ویدا بكەت].
(9) 9. و مە ئاڤەكا پڕ خێر و بەرەكەت ژ ئەسمانی باراند، و مە بیستان و باخچە، و دندكێت دبنە دان و دكاك، پێ شینكرن.
(10) 10. و مە دارقەسپێت بلند، یێت فێقیێ وان ئویشی و ل سەرێك، پێ شینكرن.
(11) 11. دا ببنە ڕزقێ بەندەیان، و مە ب وێ ئاڤێ ئەردەكێ هشك و مری زێندی كر، و زێندیكرنا مرییان ژی هەر هۆسایە.
(12) 12. [هەی موحەممەد ئەگەر ملەتێ تە یێ قورەیشی تە درەوین دانن، ب ڕاستی ئەڤە نە تشتەكێ نوییە] بەری وان ملەتێ نووحی و خودانێت بیرێ [ملەتێ شوعەیبی ل دۆر بیرێ كۆم بوون، ڤێجا خودێ هەمی ئێخستنە تێدا]، و (ثمود) ژی پێغەمبەرێت خۆ درەوین دانان.
(13) 13. و ملەتێ عاد و فیرعەون و ملەتێ (لوط) پێغەمبەر ژی.
(14) 14. و خەلكێ جهێ تێردار و دارتێكڕا [مەخسەد پێ خەلكێ مەدیەنێیە و ملەتێ شوعەیبی] و ملەتێ توببەعی ژی، هەمییان پێغەمبەرێت خۆ درەوین دانان، و هێژای ئیزایا من بوون.
(15) 15. ڤێجا ما ئەم ب چێكرنا جارا ئێكێڤە وەستیایینە؟ [هەتا یا بێت بۆ مە یا ب زەحمەت بیت؟] نەخێر [بێزار نەبوویە و پێڤە نەوەستیایە، و زڤڕینا وان پشتی بووینە خۆلی، یا دویر نینە وەكی ئەو دبێژن] بەلێ ئەو د چێكرنەكا نویدا ب شكن [هەر چەندە ئەو دزانن جارا ئێكێ مە ئەو یێت چێكرین].
(16) 16. ب سویند مە مرۆڤ یێ چێكری، و ئەم دزانین كا دلێ وی بۆ چ دبێژیت و كا چ دكەڤیتە سەر دلێ وی، و ئەم ژ ڕها ستۆیێ وی نێزیكتری وینە.
(17) 17. ئەم ژ وان هەردو ملیاكەتێت، ل سەر ملێ وی یێ ڕاستێ و ملێ وی یێ چەپێ و كاروكریارێت وی دنڤێسن، پتر ئاگەهداری وینە.
(18) 18. و مرۆڤ چو ئاخڤتنان ناكەت [چ باش چ خراب]، ئەگەر ملیاكەتەكێ كاركری و زێرەڤانێ دگەل، نەنڤێسیت.
(19) 19. و سەكەراتا مرنێ د گەل هەقییێ هات، ئەڤە ئەو بوو یا تو ژێ دڕەڤی.
(20) 20. و پف ل بۆقێ هاتە دان، ئەڤە ئەو ڕۆژە یا پەیمان پێ هاتییەدان.
(21) 21. و هەر ئێك دێ ئێت [چ باش چ خراب] دو ملیاكەت یێت دگەل، ئێك دئینیتە مەیدانا حەشرێ، و یێ دی شادەیییێ ل سەر ددەت.
(22) 22. ب سویند تو [د دنیایێدا] ژ ڤێ یێ بێ ئاگەهـ بووی، و مە پەردە ل سەر تە ڕاكر، و تو ئەڤرۆ یێ چاڤ تیژ و دژواری [بۆ دیتنێ].
(23) 23. و ملیاكەتێ بەرپرس ژێ دێ بێژیت: ئەڤە ئەو و كتێبا كار و كریارێت وی ژی، ل دەڤ من یا حازرە.
(24) 24. [خودێ دێ بێژیتە وان هەردو ملیاكەتێت د گەل دئێن] هەر زێدەگاورەكێ زێدەڕكۆیی باڤێژنە د دۆژەهێدا.
(25) 25. ئەوێ زێدە خێرنەكەر و زێدە ستەمكار و ب شك [د دینیدا].
(26) 26. ئەوێ پەرستییەكێ دی بۆ خودێ دكەتە هەڤپشك، ڤێجا هوین هەردو [مەخسەد پێ هەردو ملیاكەتێت د گەل دئێن]، دێ باڤێژنە د ئیزایا دژوار و گراندا.
(27) 27. تەكێ وی یێ شەیتان دێ بێژیت: خودایێ مە، ب ڕاستی نە من ئەو د بەر سەرداچۆنێڕا كربوو، ئەو ب خۆ د سەرداچۆنەكا كویر و دویردا بوو.
(28) 28. خودێ دێ بێژیت: هوین هەردو [مرۆڤ و شەیتانێ وی] ل دەڤ من جڕەبڕێ نەكەن، و من [د دنیایێدا و ل سەر ئەزمانێ پێغەمبەرێت خۆ، و ب هنارتنا كتێبان] هوین ژ ڤێ ڕۆژێ ترساندبوون.
(29) 29. و ئاخڤتن (پەیمان) ل دەڤ من نائێتە گوهۆڕین، و ئەز ستەمێ ل بەندەیان ناكەم.
(30) 30. ڕۆژا ئەم دبێژینە دۆژەهێ تو تژی بووی؟ دبێژیت: ما [ژ ڤان] هێژ هەنە؟
(31) 31. و بەحەشت بۆ تەقواداران نێزیك دبیت، و یا دویر نینە.
(32) 32. ئەڤە ئەوە یا پەیمان پێ هاتییەدان، بۆ هەر تۆبەدارەكێ پارێزڤان [بۆ تخویبێت خودێ] ژ هەوە.
(33) 33. ئەوێ دەمێ ب تنێ و كەس نە ل دەڤ، ژ خودایێ دلۆڤان بترسیت، و ب دلەكێ ل خودێ زڤڕی، بێتە دەڤ خودێ.
(34) 34. ب سلامەتی [ژ ئیزا و كول و كۆڤانان] هەڕنە د بەحەشتێدا، و ڕۆژا ژیانا بێ دویماهیك ئەڤەیە.
(35) 35. تشتێ وان بڤێت د بەحەشتێدا یێ هەی، و زێدەتر ژی بۆ وان یێ هەی [ئەو ژی دیتنا خودایێ مەزنە].
(36) 36. و مە چەند ملەتێت ژ وان زەبەردەستتر و ب هێزتر، بەری وان د هیلاك برن، گەلە وەلات تێكڤەدابوون، ئەرێ ڕەڤینەك [ژ مرنێ یان ژ ئیزایا خودێ] وان هەبوو؟.
(37) 37. ب ڕاستی ئەڤە [د هیلاكبرنا گوندێت ستەمكار] چامە و دەرسن، بۆ وی یێ خودان عەقل، یان بۆ وی یێ گوهدارییێ دكەت و هشێت وی د سەرێ وی.
(38) 38. ب سویند مە ئەرد و ئەسمان و هندی د ناڤبەرا واندا، د شەش ڕۆژاندا چێكرن، و چو وەستیان ژی نەگەهشتە مە.
(39) 39. ڤێجا [هەی موحەممەد] سەبرا خۆ ل سەر یا ئەو دبێژن بكێشە، و بەری ڕۆژهەلات و ڕۆژئاڤایێ، خودایێ خۆ ژ كێماسییان پاقژ بكە، و پەسن و سوپاسییا وی بكە.
(40) 40. و چەندەكێ ژ شەڤێ ژی تەسبیحا وی بكە، و پشتی نڤێژان ژی..
(41) 41. گوهێ خۆ بدێ، ڕۆژا گازیكەر (ئسرافیل) ژ جهەكێ نێزیك گازی دكەت [و دەنگ دگەهیتە هەر كەسەكی].
(42) 42. ڕۆژا [هەمی مرۆڤ] وی دەنگێ هەقییێ گولێ دبن، ئەو [رۆژ] ڕۆژا دەركەڤتنێیە [ژ گۆڕان].
(43) 43. ب ڕاستی ئەم ب تنێ، ژیانێ و مرنێ ددەین، و زڤڕین هەر ب بال مەڤەیە.
(44) 44. ڕۆژا ئەرد دكەلشیت، و ئەو ب لەز ژ گۆڕان بەر ب مەیدانا حەشرێ دچن، ئەو كۆمكرنەكا ب ساناهییە ل بەر مە.
(45) 45. ئەم چێتر دزانین ئەو چ دبێژن [د دەرهەقێ تە و ڕۆژا قیامەتێدا]، و تو ل سەر وان نە یێ زۆردەستی [دا ب خورتی وان بكەیە موسلمان]، و ئەوێت ژ ئیزایا مە دترسن، وان ب قورئانێ شیرەت بكە.