(1) 1. سویند ب بایێت بەلاڤكەر.
(2) 2. و ب ئەورێت باران هەلگر.
(3) 3. ب گەمییێت ب ساناهی دئێن و دچن.
(4) 4. ب ملیاكەتێت كاروباران لێكڤە دكەن.
(5) 5. [سویند ب ڤان هەمییان] تشتێ پەیمان بۆ هەوە پێ هاتییەدان [ژ مرنێ و قیامەتێ]، ڕاستە.
(6) 6. و ڕۆژا قیامەتێ و جزادانێ، دێ هەر ئێت.
(7) 7. و سویند ب ئەسمانێ جوان و خودان ڕێكێت موكوم [ڕێكێت ستێران].
(8) 8. ب ڕاستی هوین [د دەرهەقێ موحەممەدیدا] هەر جارێ ئاخڤتنەكێ دكەن [جار دبێژن سێربەندە، و جار دبێژن یێ دینە، و جار ژی دبێژن هەلبەستڤانە].
(9) 9. ئەو دێ ژ باوەری ئینانێ [ب قورئانێ و موحەممەدی] ئێنە دویرئێخستن، ئەوێت [ژ ڕاستەرێیییێ] هاتینە دویرئێخستن.
(10) 10. لەعنەت ل درەوینان بن [ئەوێت هەر جارەكێ تشتەكی د دەرهەقێ پێغەمبەریدا دبێژن].
(11) 11. ئەوێت د نەزانینێدا، بێ ئاگەهـ.
(12) 12. [بۆ تڕانە] پسیار دكەن، پا كەنگییە ڕۆژا جزادانێ (ڕۆژا قیامەتێ)؟
(13) 13. ئەو ڕۆژە ئەوا ئەو ل سەر ئاگری دئێنە سۆتن.
(14) 14. [وێ ڕۆژێ ملیاكەت دێ بێژنە وان] دێ ئیزایا خۆ بخۆن و تامكەنێ، ئەڤە بوو یا هوین [د دنیایێدا و ژ لەكەڤە] ل هاتنا وێ ب لەز.
(15) 15. ب ڕاستی پارێزكار یێت د ناڤ جنیك و كانیاندا.
(16) 16. تشتێ خودایێ وان دایییە وان وەردگرن و ڕازینە، ب ڕاستی ئەو بەری نوكە [د دنیایێدا] ژ قەنجیكاران بوون.
(17) 17. ئەو پیچەك ژ شەڤێ دنڤستن.
(18) 18. و ئەو بەرێ سپێدەیان [خودێ دپەرستن و] و داخوازا ژێبرنا گونەهان ژ خودێ دكرن.
(19) 19. و خێزان و ژارێت خواستەك و ڕویت، خودان بار بوون د مالێ واندا.
(20) 20. و د ئەردیدا نیشان و بەلگە گەلەكن، بۆ وان ئەوێت هەقییێ پەسەند دكەن و پشتەڤانییا وێ دكەن.
(21) 21. و د هەوە ب خۆدا ژی [نیشان و بەلگە گەلەكن]، ما هوین نابینن؟.
(22) 22. و ڕزقێ هەوە و هەر تشتێ پەیمان بۆ هەوە پێ دئێتەدان یێ ل ئەسمانی.
(23) 23. سویند ب خودایێ ئەرد و ئەسمانی، ئەو تشتێ پەیمان بۆ هەوە پێ هاتییە دان ڕاستە و بێ گۆمانە، هەروەكی ئاخڤتنا هەوە نوكە یا بێ گۆمان ل دەڤ هەوە.
(24) 24. ئەرێ بەحسێ مێڤانێت ئیبراهیمی ئەوێت قەدرگران، گەهشتییە تە.
(25) 25. وەختێ چۆینە دەڤ، و سلاڤ كرینێ، سلاڤ ل وان ڤەگێڕا و گۆت: هوین د نەنیاسن [ئەز هەوە نانیاسم].
(26) 26. ڤێجا ب لەز و بێ مێڤان پێ بحەسن، چۆ ملێ مالێ و گۆلكەكێ قەلەو [براشتی] ئینا.
(27) 27. و نێزیكی وان كر، و گۆت: ما هوین ناخۆن؟.
(28) 28. ڤێجا [وەختێ ئیبراهیمی دیتی ئەو ناخۆن] د دلێ خۆدا ژ وان ترسیا، گۆتن: نەترسە، و مزگینییا كوڕەكێ زانا دانێ.
(29) 29. ژنا وی ب دەنگەكێ بلند پێشڤە هات و تەپەك ل سەروچاڤێت خۆ دا، و گۆت: [وەیلێ ئەزێ چاوا دێ من بچویك بن] و ئەز پیرەژنم و یا خرشم.
(30) 30. ملیاكەتان گۆت: [ئەم چاوا دبێژین، وەسایە] خودایێ تە هۆسا ئەمرێ دایی، و هەر ئەوە كاربنەجهـ و زانا.
(31) 31. [پشتی ئیبراهیمی زانی ملیاكەتن] گۆت: گەلی هنارتییان هەوە خێرە، هوین بۆ چ هاتینە هنارتن.
(32) 32. گۆتن: ب ڕاستی ئەم بۆ ملەتەكێ گونەهكار یێت هاتینە هنارتن [كو ملەتێ (لوط) پێغەمبەرە].
(33) 33. دا بەرێت هەڕییێ ب سەردا ببارینین.
(34) 34. ئەو بەرێت ل نك خودێ د نیشانكری بۆ زێدە گونەهكاران.
(35) 35. و مە ئەوێت باوەریدار هەمی ژ گوندی دەرئێخستن.
(36) 36. و مە ژ مالەكا موسلمان پێڤەتر، د وی گوندیدا، نەدیت.
(37) 37. و مە نیشانەك (شوینوار و كاڤلێت وان)، بۆ ئەوێت ژ ئیزایا دژوار دترسن، تێدا هێلا.
(38) 38. دیسا مە د چیڕۆكا مووسایدا ژی نیشانەك هێلا، وەختێ مە ب نیشان و بەلگەیێت ڕۆن و ئاشكراڤە، هنارتییە دەڤ فیرعەونی.
(39) 39. ڤێجا ب هێز و كۆما خۆڤە پشتا خۆ دا مووسایی، و گۆت: یان [مووسا] سێربەندە یان ژی یێ دینە.
(40) 40. و مە ئەو و لەشكەرێ وی گرتن، و ئاڤێتنە د دەریایێدا [و مە هەمی خەندقاندن، و كەس ژێ نەما] و ئەو یێ لۆمەكار بوو.
(41) 41. و دیسا د چیرۆكا عاددا ژی [ملەتێ هوود پێغەمبەر]، مە نیشانەك هێلا، وەختێ مە ڕەشەبایەكێ هشك ب سەر واندا هنارتی.
(42) 42. هەر تشتێ د سەرڕا دبۆری، پێتی و پرت پرت دكر.
(43) 43. دیسا د چیڕۆكا (ثمود)دا ژی [ملەتێ صالح پێغەمبەر]، مە نیشانەك هێلا، وەختێ مە گۆتییە وان هەتا دەمەكێ ئاشكەرا بژین و خۆشیان ببەن.
(44) 44. و وان خۆ ل سەر گوهداری و پەرستنا خودێ مەزن كر [و ژ ئەمرێ خودێ دەركەڤتن]، ڤێجا برویسیێ هنگاڤتن و بەرێ وان لێ بوون.
(45) 45. نە وان ڕابوون پێ چێ بوو، و نە هاریكارییا وان هاتەكرن.
(46) 46. و دیسا مە ملەتێ نووح پێغەمبەر ژی بەری وان د هیلاك برن، ب ڕاستی ئەو ملەتەكێ ژ ڕێدەركەڤتی بوو.
(47) 47. و مە ئەسمان ب هێز یێ چێ كری، و ئەم خودان شیانین.
(48) 48. و ئەرد مە یێ ڕائێخستی و دەشتكری [كو ب كێر ژیانێ بێت]، وەی ئەم چ خۆش ئەرد ڕائێخین.
(49) 49. و ژ هەر تشتەكی مە جۆتەك دا، دا هوین هزرا خۆ تێدا بكەن.
(50) 50. ڤێجا ب بال خودێڤە بزڤڕن، و ئەز ژ دەڤ وی بۆ هەوە ئاگەهداركەرەكێ ئاشكرامە.
(51) 51. و هوین [گەلی مرۆڤان] چو هەڤپشكان بۆ خودێ چێ نەكەن، ئەز ژ دەڤ خودێ بۆ هەوە ئاگەهداركەرەكێ ئاشكرامە.
(52) 52. هۆسا چو پێغەمبەر بۆ ئەڤێت بەری ڤان ژی نەهاتینە هنارتن، و وان نەگۆتبیت [ئەو پێغەمبەر] یان سێربەندە یان یێ دینە [ڤێجا ب خەم نەكەڤە، ژ بەر وێ یا ئەو د دەرهەقێ تەدا دكەن و دبێژن].
(53) 53. ئەرێ وان شیرەت و وەسیەت ل ئێك و دو كرینە [دا هەمی هۆسا ل سەر ئێك ئاخڤتنێ كۆم ببن]، نەخێر بەلێ ئەو زێدە د سەرداچۆینە.
(54) 54. ڤێجا ژ وان بگەڕە و بەرێ خۆ ژ وان وەرگێڕە، تو نەیێ لۆمەكاری [یا تە بەس گەهاندنە].
(55) 55. و [ب قورئانێ] بەردەوام شیرەتان بكە، ب ڕاستی بەس خودان باوەر فایدەی ژ شیرەتان دكەن.
(56) 56. و من ئەجنە و مرۆڤ بەس بۆ هندێ یێت داین، من بپەرێسن.
(57) 57. من چو ڕزق ژ وان نەڤێت [بدەنە من یان بدەنە خۆ یان بدەنە غەیری خۆ، ئەزم یێ ڕزقی ددەم]، و من نەڤێت ئەو خوارنێ بدەنە من [نە بۆ من، نە بۆ بەندەیێت من].
(58) 58. ب ڕاستی خودێیە ڕازق و خودان هێز و هێز موكوم.
(59) 59. ڤێجا ب ڕاستی ئەوێت ستەم كرین [ژ ملەتێ تە و ئەوێت گاوربوویین]، پشك و بارەك ژ ئیزایێ یا هەی، وەكی پشك و بارا هەڤالێت وانە [ئەوێت مە د هیلاك برین ژ ملەتێ نووح و عاد و (ثمود)]، ڤێجا بلا لەزێ نەكەن.
(60) 60. و ئیزا و نەخۆشی بۆ وان بن ئەوێت گاوربوویین، وێ ڕۆژێ ئەوا پەیمان بۆ وان پێ هاتییە دان [و ئەو ڕۆژ، یان ڕۆژا بەدرێیە یان یا قیامەتێیە].