(1) 1. [بێژە وان] گاڤا قیامەت ڕابوو.
(2) 2. كەس نەشێت ڕابوونا وێ درەو بدانیت [خۆ ئەوێت د دنیایێدا درەو ددانان، دەمێ ڕابوونا وێ نەشێن درەو بدانن].
(3) 3. [ئەو ڕۆژ كو ڕۆژا قیامەتێیە] هندەكان نزم دكەت [دبنە دۆژەهی]، و هندەكان بلند دكەت [و دبنە بەحەشتی].
(4) 4. گاڤا ئەرد هەژیانەكا مەزن و ب هێز هەژیا.
(5) 5. و چیا پرت پرت بوون.
(6) 6. و بوونە تۆزەكا بەرەبا.
(7) 7. و هنگی هوین دێ بنە سێ جوین.
(8) 8. ڤێجا خودانێت ملێ ڕاستێ [ئەوێت ژ ملێ ڕاستێڤە بۆ بەحەشتێ دئێنە برن]، [یان ژی] خودانێت دەستێ ڕاستێ [ئەوێت كتێبێت كار و كریارێت خۆ ب دەستێ ڕاستێ وەردگرن]، و خودانێت ملێ ڕاستێ [د كاروبار و سالۆخەتێت خۆدا] د چاوانن؟.
(9) 9. و خودانێت ملێ چەپێ [ئەوێت ژ ملێ چەپێڤە بۆ دۆژەهێ دئێنە ئاژۆتن]، یان ژی خودانێت دەستێ چەپێ [ئەوێت كتێبا كار و كریارێت خۆ ب دەستێ چەپێ وەردگرن]، و خودانێت ملێ چەپێ د د چاوانن؟.
(10) 10. و [جوینێ سیێ] ئەوێت بەری هەمییان خێرێ دكەن، و بەری هەمییان خۆ دئاڤێژنێ، ئەوێت ل پێشییا هەمییانە [بۆ بەحەشتێ].
(11) 11. ئەڤەنە نێزیكی خودێ.
(12) 12. یێت د بەحەشتێت پڕ خێر و بێردا.
(13) 13. [ئەو بەحەشتی، ئەوێت نێزیكی خودێ] گەلەك ژ پێشیانە.
(14) 14. و كێمەك ژ پاشیانە [ئانكو ژ ملەتێ پێغەمبەری].
(15) 15. ل سەر تەختێت زێركری و ڕێزكری.
(16) 16. بەرانبەری ئێك د پالداینە.
(17) 17. كوڕەلاوێت كوڕین (هەروهەر د ژییەكیدا) ل سەر وان دگەڕن [و خزمەتا وان دكەن].
(18) 18. و پەرداغان [یێت بێ چنبل] و ئامانێت ب لیلیك و چنبل و پەرداغێت مەیا كانیان [ل سەر وان دگێڕن].
(19) 19. نە سەرێ وان پێ دئێشیت، و نە پێ گێژ و سەرخۆش دبن [ئانكو نە سەرگێژی تێدایە، و نە سەرخۆشی].
(20) 20. و فێقیێ وان دڤێت [ل سەر وان دگێڕن].
(21) 21. و گۆشتێ بالەفرێ دلێ وان بچیتێ [ل سەر وان دگێڕن].
(22) 22. و پەریێت چاڤگر و چاڤڕەش، بۆ وان یێت هەین.
(23) 23. دێ بێژی لۆلۆ و مراریێت دەست لێ نەدایینە [هند زەلال و جوانن].
(24) 24. ئەڤە خەلاتێ كار و كریارێت وانە.
(25) 25. د بەحەشتێدا نە گول ئاخڤتنا بێ وەج دبن، و نە یا ب گونەهـ.
(26) 26. ژ سلاڤێ پێڤەتر گولێ نابن.
(27) 27. و خودانێت ملێ ڕاستێ، و خودانێت ملێ ڕاستێ د چاوانن؟.
(28) 28. ئەوێت د ناڤ دارنەبكێت بێ ستری [دارەكە وەكی گوهیشكێ ل جهێت گەرم شین دبیت] و تێر فێقیدانە.
(29) 29. و یێت د ناڤ دارمۆزێت، مۆزێت وان ل سەرێك.
(30) 30. و یێت ل بەر سیبەرا بەردەوام.
(31) 31. و یێت د ناڤ ئاڤەكا د چیتدا.
(32) 32. و یێت د ناڤ فێقییەكێ مشە و بەرفرەهدا.
(33) 33. نە ئەو فێقی، ب دویماهیك دئێت، و نە ئەو، ژێ دئێنە ڤەگرتن.
(34) 34. و یێت ل سەر نڤینێت بلند و نەرم.
(35) 35. ب ڕاستی مە ژنێت بەحەشتێ، سەر ژ نوی دان [ئانكو پشتی پیربوویین و كرێت بوویین، مە جوان كرنەڤە].
(36) 36. و مە كرنە كچ.
(37) 37. ئەڤیندارێت زەلامێت خۆنە، و ئێك دەست و ئێك ژینە (ئێك عەمرن).
(38) 38. ئەڤە مە بۆ خودانێت ملێ ڕاستێ یێت چێ كرین.
(39) 39. [خودانێت ملێ ڕاستێ] گەلەك ژ پێشیانە.
(40) 40. و گەلەك ژی ژ پاشیانە [ژ ملەتێ پێغەمبەری].
(41) 41. و خودانێت ملێ چەپێ، و خودانێت ملێ چەپێ یێت چاوانن؟.
(42) 42. ئەو یێت د ناڤ هەلما ئاگری و ئاڤا شاریایدا.
(43) 43. و یێت د بن سیبەرا دویكێلا تاری تاریدا.
(44) 44. نە سیبەرەكا هین و سارە، و نەیا هندێیە كەس ل بەر ڤەهەسیت.
(45) 45. ئەو بەری نوكە [د دنیایێدا] د خۆشیاندا بوون.
(46) 46. و ئەو ل سەر گونەها مەزن [كو شركە] د بەردەوام بوون.
(47) 47. و دگۆتن: ئەگەر ئەم مرین و بووینە ئاخ و هەستی، ئەرێ جارەكا دی ئەم دێ ساخ بینەڤە؟!.
(48) 48. ئەرێ باب و باپیرێت مە یێت پێشیێ ژی دێ ڕابنەڤە؟!.
(49) 49. بێژە: ب ڕاستی یێت پێشیێ و یێت پاشیێ هەمی.
(50) 50. بێ گۆمان هەمی دێ بۆ وەختێ ڕۆژا دەستنیشانكری [كو ڕۆژا قیامەتێیە] ئێنە كۆمكرن.
(51) 51. پاشی هوین، گەلی گومڕایێت، قیامەتێ درەو ددانن.
(52) 52. ب ڕاستی هوین دێ ژ دارەكێ خۆن، دارا زەقوومێیە.
(53) 53. و هوین دێ زكان پێ تژی كەن.
(54) 54. و ئاڤا كەل و شاریایی، هوین دێ ب سەرداكەن.
(55) 55. و هوین دێ وەسا ڤەخۆن، وەكی ڤەخوارنا حێشترا تێنی.
(56) 56. ئەڤە، ڕۆژا قیامەتێ دێ بۆ وان ئێتە پێشكێشكرن، و دێ ل سەر بنە مێڤان.
(57) 57. ب ڕاستی مە هوین یێت چێ كرین، ڤێجا بلا هەوە باوەری هەبیت ئەم دێ هەوە ساخكەینەڤە، [هەروەكی هەوە باوەری هەی مە هوین یێت چێ كرین].
(58) 58. كا بێژنە من، ئەو ئاڤا هوین دئاڤێژنە د مالبچویكا ژنێدا.
(59) 59. ئەرێ هوین وێ ئاڤێ ددەن یان ئەم؟.
(60) 60. ب ڕاستی مە مرن یا د ناڤبەرا هەوەدا دانایی، و وەختێ وێ یێ دیاركرییە [و هندەك ژ هەوە بچویكاتی دمرن و هندەك ب پیری دمرن، و كەس نینە نەمریت]، و نەكو ئەم نەشێین.
(61) 61. هەوە ب هندەكێت دی یێت وەكی هەوە بگوهۆڕین، و هەوە ب ڕەنگەكێ دی چێ كەین، هوین پێ نەزانن.
(62) 62. و ب سویند هەوە چێكرنا خۆ یا جارا ئێكێ یا زانی [خودێ هوین ژ نەییێ دان، ل بەراهییێ هوین چپكەك بوون، پاشی بوونە خوینپارە، پاشی بوونە گۆشتپارە، پاشی بوونە هەستی، و خودێ هەستی ب گۆشتی كراسكر، و ڕێكا بوونێ بۆ هەوە ب ساناهی ئێخست] و دەرس و چامەیان بۆ خۆ [ژ چێكرنا ئێكێ] وەرگرن [ئەوێ هوین جارا ئێكێ دایین، دشێت جارەكا دی ژی هەوە بدەتەڤە].
(63) 63. ئەرێ ما هوین نابینن تشتێ هوین دچینن؟!.
(64) 64. ئەرێ هوین شین دكەن، یان ئەمین شین دكەین؟.
(65) 65. و ئەگەر مە ڤیابایە دا كەینە پویش و پەلەخ، و هوین دا عەجێبگرتی مینن [چاوا شینكاتیێ هۆسا یێ كەسك هشك بوو].
(66) 66. [و دابێژن:] ب ڕاستی زەحمەتا مە، هەروە و بێ بەرانبەر چۆ، و ئەم خوسارەت بوویین .
(67) 67. بەلكی ئەم زڕباربوویین .
(68) 68. ئەرێ ما هوین وێ ئاڤێ نابینن، یا هوین ڤەدخۆن؟!.
(69) 69. ئەرێ هوین ژ ئەوران دئیننە خوارێ یان ئەم؟..
(70) 70. و ئەگەر مە ڤیابایە دا وێ ئاڤێ تەحل و سویر (شۆر) كەین، ڤێجا بۆچی هوین سوپاسی و شوكورا خودێ ناكەن.
(71) 71. ئەرێ ما ئاگرێ هوین هەل دكەن، هوین نابینن؟!.
(72) 72. ئەرێ هەوە دارا وی ئاگری دایییە، یان مە دایییە؟.
(73) 73. مە ئەڤ ئاگرە (یێ دنیایێ) یێ كرییە بیرئینان بۆ ئاگرێ ئاخرەتێ [ڤێجا وەختێ وی ئاگری و كارلێكرنا وی دبینیت، دێ ئاگرێ جەهنەمێ ئێتە بیرا وی، و دێ ژ خودێ و ئیزایا وی ترسیت]، و مە یێ كرییە فایدە بۆ ڕێڤنگان.
(74) 74. ڤێجا ناڤێ خودایێ خۆ یێ مەزن، ژ هەمی كێماسییان پاك و پاقژ بكە.
(75) 75. ڤێجا ب ڕاستی ئەز ب جهێ ستێران سویند دخۆم.
(76) 76. و ب ڕاستی ئەڤە سویندەكا مەزنە، ئەگەر هوین بزانن.
(77) 77. و ب ڕاستی ئەڤە قورئانەكا پیرۆز و پڕ خێر و بەرەكەتە.
(78) 78. یا د كتێبەكا پاراستیدا [كو دەپێ پاراستییە].
(79) 79. ژ بلی پاك و پاقژان [كو ملیاكەتێت خودان ڕێز و ڕویمەتن]، دەستێ كەسێ ناگەهیتێ.
(80) 80. هنارتنا خودایێ هەمی جیهانانە.
(81) 81. ئەرێ هوین سستیێ د ڤێ قورئانێدا دكەن [درەو ددانن و باوەرییێ پێ نائینن]؟!.
(82) 82. و هوین شوینا سوپاسی و شوكورا ڕزقێ خۆ بكەن درەوان دكەن [خودێ بارانێ و ڕزقی ددەتە هەوە، شوینا هوین سوپاسییا وی بكەن هوین درەوان دكەن، و دبێژن ب ئاخڤتنا وێ هە یان ب ڤێ ستێرێ باران بۆ مە هات].
(83) 83. ڤێجا بلا وەختێ [ڕوح] دگەهیتە گەورییێ.
(84) 84. و هوین وی وەختی بەرێ خۆ ددەنێ [و چو ژ هەوە نائێت و نەشێن ڕوحا وی بزڤڕیننەڤە].
(85) 85. و ئەم [ب زانین و شیان و دیتنێ] نێزیكتری وینە ژ هەوە، بەلێ هوین نابینن.
(86) 86. ڤێجا ئەگەر هوین ب كار و كریارێت خۆ نەئێنە جزاكرن، و حساب نەبیت.
(87) 87. وێ [ڕوحێ ئەوا گەهشتییە گەورییێ] بزڤڕیننەڤە، ئەگەر هوین ڕاست دبێژن.
(88) 88. و ئەگەر ئەو [یێ مری] ژ نێزیكێت خودێ بیت.
(89) 89. ڤێجا دلۆڤانی و دلشادی و بێنڤەدان و ڤەهەسیان و بێن خۆشی و بەحەشتا ب خێر و بەرەكەت، یێت وینە.
(90) 90. و ئەگەر ئەو مری ژ خودانێت ملێ ڕاستێ بیت.
(91) 91. ڤێجا سلاڤ ژ خودانێت ملێ ڕاستێ ل تە بن، هەی خودانێ ملێ ڕاستێ [ئەڤە دێ بۆ وی ئێتە گۆتن، چونكی دێ چیتە ناڤ وان، و ئەو دێ پێشوازیا وی كەن و دێ سلاڤكەنێ].
(92) 92. و ئەگەر ئەو مری ژ وان بیت، ئەوێت ڕۆژا قیامەتێ درەو ددانان، و ژ گومڕایان بیت.
(93) 93. دێ ئاڤەكا زێدە شاریایی، بۆ ئێتە پێشكێشكرن.
(94) 94. و دێ چیتە د دۆژەهێدا ژی.
(95) 95. ب ڕاستی ئەڤە [ئەڤا بۆ تە هاتییە گۆتن د دەرهەقێ خەلاتكرن و جزاكرنا باش و خراباندا] ڕاستە، و چو گومان تێدا نینە.
(96) 96. ڤێجا ناڤێ خودایێ خۆ یێ مەزن، ژ هەمی كێماسییان پاك و پاقژ بكە.