(1) 1. هندی د ئەرد و ئەسماناندا هەیین، خودێ ژ كێماسییان پاقژ دكەن و تەسبیحا وی دكەن، و ئەو سەردەست و كاربنەجهە.
(2) 2. ملك و خودانییا ئەرد و ئەسمانان یا خودێیە، ئەوە ژیانێ و مرنێ ددەت، و ئەو ل سەر كرنا هەمی تشتان یێ خودان شیانە.
(3) 3. ئەوە یێ ئێكێ [بەری هەر تشتەكی]، و ئەوە یێ دویماهیێ [ئانكو یێ هەروهەر مایی]، و ئەوە بلند و سەردەست [هەبوونا وی ب نیشان و بەلگەیان خۆیا و ئاشكەرایە]، و ئەوە زانایێ تشتێ ڤەشارتی [یان یێ نەبەرچاڤ]، و ئەو ئاگەهداری هەمی تشتانە.
(4) 4. و ئەوە یێ ئەرد و ئەسمان د شەش ڕۆژاندا چێ كرین، پاشی ب سەر عەرشێ خۆ كەڤت [بلندبوونەكا هێژایی وی و بێ چاوایی]، و هەر تشتەكێ د ئەردیدا دچیت [ژ ئاڤ و خزینەیان و هەر تشتەكێ د بنڤە] و ژێ دەردكەڤیت [ژ چاندن و كانی و بیران... هتد]، و هەر تشتەكێ ژ ئەسمانی دئێتە خوارێ [ژ باران و گژلۆك و بەفر و برویسی و ملیاكەت و كتێبان]، و هەر تشتەكێ بەر پێ بلند دبیت [ژ كریارێت باش و دوعا و جان و ملیاكەت و تەیر و تەوال و هەلمێ و ... هتد] ژێ ب ئاگەهە، و ئەو [ب زانین و شیانا خۆ] هەر جهەكێ هوین لێ بن یێ د گەل هەوە، و خودێ هەر كار و كریارەكا هوین دكەن، ژێ ب ئاگەهە و دبینیت.
(5) 5. سەر و سامانێ ئەرد و ئەسمانان هەر یێ خودێیە، و هەمی كاروبار هەر ب بال خودێڤە دزڤڕن.
(6) 6. شەڤێ دكەتە د ناڤ ڕۆژێڕا، و ڕۆژێ دكەتە د ناڤ شەڤێڕا [و هەردووكان هۆسا كورت و درێژ دكەت]، و خودێ ژ هەر تشتەكێ د دلاندا ڤەشارتی ب ئاگەهە.
(7) 7. [گەلی مرۆڤان] باوەرییێ ب خودێ و پێغەمبەرێ وی بینن، و مالێ خودێ هوین ل سەر كرینە وەكیل ژێ [ب خێر] بدەن، و ژ هەوە ئەوێت باوەری ئینایین و مالێ خۆ د ڕێكا خودێدا مەزاختین، خەلاتەكێ مەزن بۆ وان یێ هەی.
(8) 8. و هەوە خێرە هوین باوەرییێ ب خودێ نائینن؟ و پێغەمبەر یێ داخوازێ ژ هەوە دكەت هوین باوەرییێ ب خودایێ خۆ بینن، و خودێ پەیمان ب باوەری ئینانێ یا ژ هەوە ستاندی [وەختێ هوین ژ پشتا باب ئادەمی دەرئێخستین]، ئەگەر هوین باوەر بكەن.
(9) 9. ئەوە یێ ئایەتێت ئاشكەرا [كو ئایەتێت قورئانێنە] بۆ بەندەیێ خۆ دهنێریت، دا هەوە ژ تاریستانێ دەربێخیتە ناڤ ڕۆناهییێ، و ب ڕاستی خودێ بۆ هەوە گەلەك یێ دلۆڤانە.
(10) 10. هەوە خێرە هوین مالێ خۆ د ڕێكا خودێدا نامەزێخن، و میراتێ ئەرد و ئەسمانان هەر یێ خودێیە، ئەوێت بەری ڤەكرنا مەكەهێ مالێ خۆ د ڕێكا خودێدا مەزاختین و جیهاد كرین، پایە و پەیسكێت وان ژ یێت وان ئەوێت پشتی ڤەكرنا مەكەهێ مال مەزاختین و جیهاد كرین مەزنترن، ئەڤ هەردوكە وەكی ئێك نینن، د گەل هندێ ژی خودێ پەیمانا خەلاتێ باش [كو بەحەشتە] یا دایییە هەردو جوینان، و خودێ ئاگەهـ ژ وێ هەیە یا هوین دكەن.
(11) 11. هەر كەسێ مالێ خۆ د ڕێكا خودێدا بدەت، خودێ دێ بۆ چەند قاتەكان زێدەكەت [هەر خێرەك ب دەهـ خێرانە، هەتا دگەهیتە حەفت سەدان] و وی خەلاتەكێ هێژاتر ژی [كو بەحەشتە] یێ هەی.
(12) 12. ڕۆژا تو زەلام و ژنێت خودان باوەر دبینی و ڕۆناهییا وان ل پێشییا وان، و ل ملێ وان یێ ڕاستێ ب بەر وان دكەڤیت [و ملیاكەت دبێژنە وان:] ئەڤرۆ مزگینییا بەحەشتێت ڕویبار دبنڕا دچن، و هوین هەروهەر دێ تێدا مینن، ل هەوە بیت، و ئەڤەیە سەرفەرازیا مەزن.
(13) 13. ڕۆژا زەلام و ژنێت دوڕوی دبێژنە وان ئەوێت باوەری ئینایین: خۆ ل مە بگرن دا ڕێكا خۆ ل بەر ڕۆناهییا هەوە ببینین [ئەڤە وەختێ د سەر پرا سیراتێڕا دەرباز دبن]، ئەو دێ بێژنە وان: [گەلی دوڕوییان] ب پاش خۆڤە بزڤڕن [ئانكو بزڤڕنە دنیایێ]، ل دنیایێ بۆ خۆ ل ڕۆناهییێ بگەڕن، و دیوارەك د ناڤبەرا هەردو جویناندا دێ ئێتە دانان، دەرگەهەكێ هەی، ژ ناڤدا دلۆڤانییە و ژ دەرڤە ژی ئیزایە.
(14) 14. ئەو [دوڕوی] گازی [خودان باوەران] دكەن و دبێژن: ما ئەم د گەل هەوە نەبوویین [بۆچی هەوە ئەم هێلاین]، دێ بێژن: بەلێ هوین [سەرڤە سەرڤە] د گەل مە بوون، بەلێ هەوە خۆ ب دوڕوییاتیێ د هیلاك بر، و چاڤێ هەوە ل نەخۆشییا خودان باوەران بوو، و هوین ل دینی ب شك كەڤتن، و هیڤی و ئومێدێت ڤالا هوین د سەردابرن، هەتا قیامەت ب سەر هەوەدا هاتی، و شەیتانی هوین ب كەرەما خودێ [و بەرفرەهییا ڕەحما وی] خاپاندن.
(15) 15. و ئەڤرۆ چو بەدەل، نە ژ هەوە [دوڕوییان]، و نە ژی ژ ئەوێت گاوربوویین نائێتە وەرگرتن، جهێ هەوە ئاگرە، ئاگر هێژایی هەوەیە، و چ پیسە دویماهیكە.
(16) 16. ئەرێ ما وەخت نەهاتییە دلێ خودان باوەران ب بیرئینانا خودێ و قورئانێ بترسیت، و ئەو وەكی وان نەبن ئەوێت بەری نوكە [ئانكو بەری هاتنەخوارا قورئانێ] كتێب بۆ هاتین، و پشتی سال و زەمان ب سەر وانڤە چۆیین، دلێت وان ڕەقبوون و باراپتر ژ وان ژ ڕێكا ڕاست دەركەڤتن.
(17) 17. [گەلی مرۆڤان] بزانن خودێیە ئەردی شین دكەت پشتی مرنا وی، ب سویند مە بۆ هەوە نیشان و بەلگە یێت ئاشكەرا ڕۆنكرین، دا هوین تێ بگەهن و ئەقلێ خۆ بدەنە شۆلی.
(18) 18. ب ڕاستی زەلام و ژنێت مالێ خۆ د ڕێكا خودێدا داین، و مالێ خۆ ژ دل بۆ ڕازیبوونا خودێ مەزاختین، خێرا وان چەند قاتەكان دێ ئێتە دان، و وان خەلاتەكێ ب ڕێز و ڕویمەت [كو بەحەشتە] یێ هەی.
(19) 19. و ئەوێت ب دورستی باوەری ب خودێ و پێغەمبەرێ وی ئینایین، ئەون ڕاستگۆ، و شەهیدان ل دەڤ خودایێ خۆ ڕۆناهی و خەلاتێ خۆ یێ هەی، و ئەوێت گاوربوویین و ئایەتێت مە درەو دانایین ئەو دۆژەهینە.
(20) 20. [گەلی مرۆڤان] بزانن هندی ژیانا دنیایێیە، تڕانە و مژویلی و كەشخەیی و جوانی و خۆمەزنكرنە د ناڤبەرا هەوەدا ب زێدەییا مال و عەیالی، و دنیا وەكی بارانەكێیە شینكاتیا وێ جۆتیاری كەیفخۆش بكەت، پاشی ئەو شینكاتی هشك ببیت و دێ بینی زەربوو، پاشی بوو پویش و پەلەخ، و ئاخرەت ژی یان ئیزایەكا دژوار و گرانە، یان ژی لێبۆرین و ڕازیبوونا خودێیە، و ژیانا دنیایێ ژ پەرتالێ خاپاندنێ پێڤەتر نینە.
(21) 21. [گەلی خودان باوەران] لەزێ ل ژێبرنا گونەهان ژ بەرێ خودایێ خۆڤە بكەن، و لەزێ ل وێ بەحەشتێ بكەن ئەوا فرەهییا وێ هندی فرەهییا ئەرد و ئەسمانی، ئەو بەحەشتا بۆ وان هاتییە بەرهەڤكرن ئەوێت باوەری ب خودێ و پێغەمبەرێت وی ئینایین، ئەڤە كەرەما خودێیە ددەتە وی یێ وی بڤێت، و خودێ خودانێ كەرەما مەزنە.
(22) 22. نینە تشتەك د ئەردیدا بقەومیت یان بێتە سەرێ هەوە، و د دەپێ پاراستیدا یێ نڤێسی نەبیت ـ بەری ئەم بدەین ـ و ب ڕاستی ئەڤە ل بەر خودێ یا ب ساناهییە.
(23) 23. دا ب خەم نەكەڤن بۆ یا ژ دەستێ هەوە چۆیی، و دا بەتران نەبن ب یا خودێ دایییە هەوە، و خودێ حەژ چو خۆمەزنكەرێت قەبە ناكەت.
(24) 24. ئەوێت چڕویكیێ دكەن [د ڕاستا فەرمانا خودێدا، و د ڕاستا دەیباب و كەس و كارێت خۆدا و... هتد، و دڤێن خەلك ژی وەكی وان بن ]، و فەرمانا خەلكی ژی ب چڕویكیێ دكەن، و هەر كەسێ ڕوییێ خۆ ژ مەزاختنا مالی د ڕێكا خودێدا وەرگێڕیت، ب ڕاستی خودێ منەت پێ نینە، و یێ دەولەمەند و هێژایی شوكور و پەسنێیە.
(25) 25. ب سویند مە پێغەمبەرێت خۆ ب بەلگە و موعجیزەیێت ئاشكەراڤە هنارتن، و مە كتێب و ترازی و عەدل د گەل وان هنارت دا مرۆڤ [ب ڤان] عەدالەتێ بكەن د هەمی كاروبارێت خۆدا، و مە ئاسن یێ دایی و چێكری، هێز و قەوەتەكا دژوار یا تێدا، و مفا و قازانج ژی بۆ مرۆڤان یێ تێدا، و دا خودێ بزانیت [ئانكو بۆ هەوە بەرچاڤ بكەت، چونكی خودێ هەر دزانیت] كا كی دێ باوەرییێ ب غەیبێ ئینیت، و دینێ وی و پێغەمبەرێت وی ب سەر ئێخیت، ب ڕاستی خودێ یێ ب هێز و سەردەستە.
(26) 26. ب سویند مە نووح و ئیبراهیم پێغەمبەر هنارتن، و مە پێغەمبەراتی [پشتی وان] ئێخستە د دویندەها واندا، و مە كتێب بۆ وان هنارتن [هەر پێغەمبەرەكێ پشتی وان هاتی ژ دویندەها وان بوو]، ڤێجا هندەك [ژ دویندەها وان] ڕاستەڕێ بوون، و باراپتر ژ وان ژ ڕێ دەركەڤتن.
(27) 27. پاشی مە پێغەمبەرێت خۆ د دویڤ وانڕا هنارتن، و پشتی وان مە عیسایێ كوڕێ مەریەمێ هنارت [و مە كرە پێغەمبەرێ ئسرائیلییان یێ دویماهیێ]، و مە ئنجیل دایێ و مە نەرمی و دلۆڤانی ئێخستە د دلێت واندا، ئەوێت باوەری پێ ئینایین و ب دویڤ كەتین، و ڕەبەناتیا ئەو ل سەر دچن [و دەستێت خۆ ژ دنیایێ دشۆن] مە بۆ وان نەنڤێسیبوو، ئەوان ژ نك خۆ ب ئنیەتا ڕازیبوونا خودێ چێ كربوو، د گەل هندێ ژی وەك پێدڤی ب جهـ نەئینان، و ژ وان ئەوێت باوەری ئینایین مە خەلاتێ وان دایێ، و گەلەك ژ وان ژ ڕێكا ڕاست دەركەتن و خراب بوون.
(28) 28. گەلی خودان باوەران تەقوایا خودێ بكەن و باوەرییێ ب هەمی پێغەمبەرێت وی بینن، دو پشك و باران ژ دلۆڤانییا خۆ دێ دەتە هەوە [ئێك: ژ بەر باوەرییا هەوە ب موحەممەد پێغەمبەری، و یا دی: ژ بەر باوەرییا هەوە ب پێغەمبەرێت بەری وی]، و دێ ڕۆناهییەكێ دەتە هەوە كو هوین ل بەر [د سەر پرا سیراتێڕا] بچن، و دێ ل گونەهێت هەوە بۆریت، و خودێ ب خۆ گونەهـ ژێبەر و دلۆڤانە.
(29) 29. [مە هوین ب ڤێ كەرەما بۆری ئاگەهداركرن] دا خودان كتێب [كو جوهی و فەلەنە] بزانن چو ژ كەرەما خودێ ب دەستێ وان نینە [نە ئەو دگەهنە ڤێ كەرەمێ یا خودێ دایییە ملەتێ پێغەمبەری، و نە دشێن ژێ ڤەگرن]، و ب ڕاستی كەرەم [پێغەمبەراتی و ڕاستەڕێیی و باوەری] هەمی ب دەستێ خودێیە، ددەتە وی ی ێ‌وی بڤێت و خودێیە خودانێ كەرەما مەزن.