(1) 1. ب سویند خودێ گۆتنا وێ ژنا د ڕاستا خۆدا جڕەبڕ د گەل تە دكر، و گازندە و خەما خۆ بۆ خودێ دیار دكر، بهیست و خودێ ئاگەهـ ژ دان و ستاندنا هەوە هەبوو، ب ڕاستی خودێ یێ گوهدێر و بینەرە.
(2) 2. و ژ هەوە ئەوێت دبێژنە ژنێت خۆ تو وەكی دەیكا من ل من حەرام بی، ژنێت وان نابنە دەیكێت وان، دەیكێت وان بەس ئەون ئەوێت ئەو ژێ بوویین، و ب ڕاستی ئەو [ب ڤێ ئاخڤتنا خۆ] ئاخڤتنەكا دویری ڕاستییێ و شەرعی، و ئاخڤتنەكا درەو دبێژن، و ب ڕاستی خودێ لێبۆر و گونەهـ ژێبەرە [وەختێ دەرگەهێ ڕزگاربوونێ ب كەفارەتێ بۆ هەوە ڤەكری].
(3) 3. و ئەوێت دبێژنە ژنێت خۆ تو وەكی دەیكا من ل من حەرام بی و پاشی پەشێمان دبن و لێڤە دبن، ڤێجا بەری ئەو بچنە نڤینا خۆ دڤێت كۆلەیەكی [چ ژن بیت چ مێر ] ئازا بكەن، ئەمرێ هەوە ب ڤێ بڕیارێ دئێتەكرن [دا هوین ڤێ ئاخڤتنێ نەكەن] و هوین چ بكەن خودێ پێ ئاگەهدارە [و چو ل بەر بەرزە نابیت].
(4) 4. و یێ كۆلە نەدیت و ب دەست نەكەڤت، ڤێجا هێژ نەچۆینە نڤینا ئێك و دو، بلا دو هەیڤان ل سەرێك ب ڕۆژی بیت، و یێ نەشیا [دو هەیڤان یێ ب ڕۆژی بیت] بلا زادی بدەتە شێست بەلنگازان، ئەڤە [بڕیارێت زیهارێ مە دیاركرن] بۆ هندێیە دا هوین باوەرییێ ب خودێ و پێغەمبەرێ وی بینن [كار ب بڕیارا وی بكەن، و ل سەر بڕیارێت نەزانینێ نەمینن]، و ئەڤە تخویب و بڕیارێت خودێنە، و گاوران ئیزایەكا ب ژان و دژوار یا هەی.
(5) 5. ب ڕاستی ئەوێت دژاتی و دژمناتیا خودێ و پێغەمبەرێ وی دكەن كا چاوا ئەوێت بەری وان ڕەزیل و ڕسوا بوون، ئەو ژی وەسا دێ ڕەزیل و ڕسوا بن، و ب سویند مە نیشان و بەلگەیێت ڕۆن و ئاشكەرا یێت هنارتین، و گاوران ئیزایەكا ڕسواكەر و شەرمزاركەر یا هەی.
(6) 6. ڕۆژا خودێ وان هەمییان زێندی دكەتەڤە [دێ هەمییان كۆم كەت]، ڤێجا هەر كارەكێ وان كری [هویر یان گر] دێ وان پێ ئاگەهدار كەت، هەمی [كریارێت وان] خودێ یێت نڤێسین و وان ب خۆ یێت ژ بیركرین، و خودێ ل سەر هەمی تشتان یێ شاهدە.
(7) 7. ئەرێ ما تە نەزانییە كا چ د ئەرد و ئەسماناندا هەیە خودێ دزانیت، نینە سێ كەس پستەپستێ د گەلێك بكەن [و یان ب دزیڤە د گەلێك باخڤن] ئەگەر خودێ یێ چارێ نەبیت [ئانكو ئاگەهـ ژێ نەبیت و نەزانیت]، و نینە پێنج كەس پستەپستێ د گەلێك بكەن ئەگەر ئەو یێ شەشێ نەبیت، و نە كێمتر و نە زێدەتر، نینە خودێ [ب زانینا خۆ] د گەل وان نەبیت هەر جهێ لێ بن، پاشی دێ ڕۆژا قیامەتێ وان ب كار و كریارێت وان كرین ئاگەهدار كەت. ب ڕاستی خودێ ژ هەر تشتەكی ب ئاگەهە.
(8) 8. ئەرێ ما تە ئەو نەدیتینە ئەوێت نەهیا وان ژ پستەپستێ هاتییە كرن [مەخسەد پێ جوهی و دوڕوینە]، پاشێ دزڤڕنە وێ ئەوا نەهیا وان ژێ هاتییە كرن و پستەپستێ ب گونەهكاریێ و نەیارەتیێ و نەگوهدارییا پێغەمبەری دكەن، و هەر وەختەكێ دئێنە دەڤ تە وێ سلاڤێ ل تە دكەن ئەوا خودێ ل تە نەكری، و د دلێ خۆدا دبێژن: پا بلا خودێ ب ڤێ ئاخڤتنا ئەم دبێژین مە ئیزا بدەت [ئەگەر ڕاستە موحەممەد پێغەمبەرە]، دۆژەهـ بەسی وانە تامكەنێ، و دۆژەهـ چ پیسە جهـ و پیسە دویماهیكە.
(9) 9. گەلی خودان باوەران، ئەگەر هەوە پستەپست كر، ڤێجا پستەپستێ ب گونەهێ و دژمنییێ و بێ ئەمرییا پێغەمبەری نەكەن، و پستەپستێ ب باشییێ و تەقوایێ بكەن، و ژ وی خودایی بترسن ئەوێ هوین هەمی دێ ب بالڤە ئێنە كۆمكرن.
(10) 10. ب ڕاستی پستەپست ژ شەیتانییە، دا خودان باوەران پێ ب خەم بێخیت و ئەو ب خۆ (شەیتان) چو زیانێ ناگەهینیتە وان ب دەستویرییا خودێ نەبیت، و دڤێت خودان باوەر پشتا خۆ ب خودێ گرێ بدەن.
(11) 11. گەلی خودان باوەران هەر وەختێ ژ هەوە هاتە داخوازكرن د جڤات و دیواناندا جهی بكەن، جهی بكەن، خودێ ژی دێ ل سەر هەوە فرەهـ كەت، و هەر وەختێ ژ هەوە هاتە داخوازكرن هوین ڕابن [دا جهێ هندەكێت دی بێتەكرن] ڕابن، خودێ، ئەوێت ژ هەوە باوەری ئینایین، و زانین ب ڕزقێ وان كری، دێ وان پایە بلند كەت، و كار و كریارێت هوین دكەن خودێ پێ ئاگەهە.
(12) 12. گەلی خودان باوەران ئەگەر هەوە بڤێت ب تنێ د گەل پێغەمبەری باخڤن بەری ئاخڤتنا خۆ یا ب تنێ خێرەكێ [ئانكو سەدەقەیەكێ] بدەن، ئەڤە [دانا سەدەقەیێ بەری ئاخڤتنا هەوە یا ب تنێ د گەل پێغەمبەری] بۆ هەوە باشتر و پاقژترە، ڤێجا ئەگەر هەوە چو نەبوو بدەن، ب ڕاستی خودێ یێ گونەهـ ژێبەر و دلۆڤانە.
(13) 13. ئەرێ هوین ترسیان خیزان و ژار ببن ئەگەر بەری ئاخڤتنا خۆ یا ب تنێ د گەل پێغەمبەری سەدەقەیان بدەن؟ ڤێجا ئەگەر هوین وێ نەكەن [یا ئەمرێ هەوە پێ هاتییە كرن و ل سەر هەوە یا گران بیت]، خودێ ل سەر هەوە سڤك كر [و ل هەوە ناگریت هوین سەدەقەیان بەری ئاخڤتنا خۆ یا ب تنێ د گەل پێغەمبەری نەدەن]، ڤێجا بەردەوام و ب ڕەنگێ پێدڤی نڤێژان بكەن و زەكاتێ بدەن، و گوهدارییا خودێ و پێغەمبەرێ وی بكەن، و خودێ ب خۆ ئاگەهداری وێیە یا هوین دكەن.
(14) 14. ئەرێ ما تە ئەو نەدیتن ئەوێت بوویین ە دۆست و پشتەڤانێت وان ئەوێت خودێ غەزەب لێ كری [كو جوهینە]، ئەو [دوڕوی] نە ژ هەوەنە [گەلی موسلمانان] و نە ژی ژ وانن، و ل سەر درەوێ سویند دخۆن [ژ درەو سویند دخۆن كو ئەم موسلمانین، و نە دۆست و هاریكارێت جوهییانین]، و ئەو دزانن ئەو ژ درەو سویند دخۆن.
(15) 15. خودێ ئیزایەكا دژوار بۆ وان یا بەرهەڤكری، و چ پیسەكار بوو وان كری.
(16) 16. وان سویندێت خۆ [یێت ژ درەو] بۆ خۆ یێت كرینە مەتال [دا خۆ و مالێ خۆ پێ بپارێزن]، و ڕێكا خودێ ل خەلكی گرتن، وان ئیزایەكا ڕسواكەر و هەتكبەر یا هەی.
(17) 17. نە مال و نە عەیالێ وان فایدەیێ وان دكەت و نە وان ژ ئیزایا خودێ دپارێزیت، [و بزانن] ئەڤە دۆژەهینە و هەروهەر دێ تێدا مینن.
(18) 18. ڕۆژا خودێ وان هەمییان زێندی دكەت و بۆ حەق و حسابێ كۆم دكەت، وێ ڕۆژێ كا چاوا ئەڤرۆ بۆ هەوە ژ درەو سویند دخۆن وەسا دێ بۆ خودێ ژی سویند خۆن، و هزر دكەن سویندێت وان وێ ڕۆژێ دێ ب تشتەكی چن [و دێ فایدەی وان كەن هەروەكی سویندا دنیایێ فایدەی وان دكر]، باش بزانە ئەڤە درەوینن.
(19) 19. شەیتانی سەرێ ژ وان ستاندی [ب وەسواس و خەملاندنا خۆ یێت سەردابرین و هەڤسارێ خۆ یێ كرییە سەرێ وان]، خودایێ وان یێ ژ بیرا وان بری، ئەڤە قولپ و دەستەكا شەیتانینە، باش بزانن خوسارەتی بارا قولپ و دەستەكا شەیتانییە.
(20) 20. ب ڕاستی ئەوێت نەیارەتی و دژمناتیا خودێ و پێغەمبەرێ وی دكەن، ئەو ڕسواترین و ڕەزیلترین مرۆڤن.
(21) 21. خودێ ب خۆ بڕیار یا دایی: بێ گۆمان ئەز و پێغەمبەرێت خۆ، دێ ب سەركەڤین، ب ڕاستی خودێ خودان هێز و سەردەستە.
(22) 22. نینە هندەك باوەرییێ ب خودێ و ڕۆژا قیامەتێ بینن، و حەژ وان بكەن ئەوێت نەیارەتی و دژمناتیا خودێ و پێغەمبەرێ وی دكەن، خۆ ئەگەر ئەو باب و باپیرێت وان بن، یان زارۆكێت وان بن، یان برایێت وان بن، یان عەشیرەتا وان بیت، ئەڤان خودێ باوەرییا د دلێت واندا نڤێسی و بنەجهكری، و ب هاریكاری و پشتەڤانی و ب سەركەڤتنا خۆ ئەو یێت ب هێز ئێخستین، و دێ وان بەتە بەحەشتێت ڕویبار د بنڕا دچن و هەروهەر دێ تێدا بن، خودێ ژ وان ڕازی بوو و ئەو ژی ژ خەلاتێ خودایێ خۆ ڕازی بوون، و ئەڤە كۆما خودێنە و باش بزانن یێت سەرفەراز هەر كۆما خودێنە.