(1) 1. هندی د ئەرد و ئەسماناندا هەی تەسبیحا خودێ دكەن [ژ كێماسییان پاقژ دكەن]، و ئەوە یێ سەردەست و كاربنەجهـ.
(2) 2. گەلی خودان باوەران بۆچی هوین دبێژن و ناكەن؟.
(3) 3. ئاخڤتنا هوین دبێژن و نەكەن، كەربێ ل دەڤ خودێ پتر لێ دكەت.
(4) 4. ب ڕاستی خودێ حەژ وان دكەت ئەوێت ئێك ڕێز شەڕی د ڕێكا خودێدا دكەن، دێ بێژی ئاڤاهییەكێ موكوم و پێكڤە گرێدایییە.
(5) 5. و چیڕۆكا مووسایی بۆ ملەتێ خۆ بێژە وەختێ گۆتییە ملەتێ خۆ: گەلی ملەتێ من بۆچی هوین من ئیزا ددەن و دئێشینن و هوین دزانن ئەز پێغەمبەرێ خودێمە بۆ هەوە، ڤێجا وەختێ وان هەقی هێلایی و بەرێ خۆ ژێ وەرگێڕایی، خودێ ژی دلێت وان ژێ دانە پاش و ژێ وەرگێڕان، و خودێ ملەتێ ژ ڕێكا ڕاست دەركەڤتی ڕاستەڕێ ناكەت.
(6) 6. و وەختێ عیسایێ كوڕێ مەریەمێ گۆتییە [ئسرائیلییان]: گەلی ئسرائیلییان نێ ئەز پێغەمبەرێ خودێمە بۆ هەوە، و ئەز ڕاستدەرئێخێ كتێبا بەری خۆمە كو تەوراتە، و ئەزێ هاتیم مزگینییا پێغەمبەرەكی بدەمە هەوە، پشتی من دێ ئێت ناڤێ وی ئەحمەدە، و وەختێ عیسا ب موعجیزەیێت ئاشكەراڤە بۆ وان هاتی، گۆتن: ئەڤە سێربەندییەكا ئاشكەرایە.
(7) 7. و ما كی ژ وی ستەمكارترە ئەوێ درەوان ب ناڤێ خودێ بكەت [پێغەمبەرێ وی سێربەند بدانیت، و موعجیزەیێت وی سێربەندی بدانیت]، و داخواز ژ وی ب خۆ دئێتەكرن [ب ڕێكا پێغەمبەرێت خودێ] موسلمان ببیت، و خودێ ملەتێ ستەمكار ڕاستەڕێ ناكەت.
(8) 8. وان [ستەمكار و گاوران] دڤێت [ئانكو ل بەر دگەڕن] ڕۆناهییا خودێ [كو قورئانە] ب دەڤێت خۆ ڤەمرینن، و خودێ ڕۆناهییا خۆ هەر دێ تمام كەت، خۆ ئەگەر گاوران پێ نەخۆش ژی بیت.
(9) 9. ئەوە (خودێیە) پێغەمبەرێ خۆ ب ڕاستەرێیییێ [كو قورئانە] و دینێ ڕاستڤە هنارتی، دا ڤی دینی بكەتە سەرپشكا هەمی دینان و ب سەر هەمی دینان بێخیت، خۆ هەڤپشك چێكەران پێ نەخۆش ژی بیت.
(10) 10. گەلی خودان باوەران، ئەرێ ئەز بازرگانییەكێ نیشا هەوە بدەم، هەوە ژ ئیزایەكا دژوار و ب ژان ڕزگار بكەت.
(11) 11. باوەرییێ ب خودێ و پێغەمبەرێ وی بینن، و جیهادێ ب نەفسا خۆ و مالێ خۆ د ڕێكا خودێدا بكەن، ئەڤە [باوەری ئینان و جیهاد د ڕێكا خودێدا] بۆ هەوە [ژ هەوە و مالێ هەوە] چێترە، ئەگەر هوین بزانن.
(12) 12. [ئەگەر هوین ڤێ بكەن، باوەرییێ ب خودێ و پێغەمبەرێ وی بینن، و ب نەفسا خۆ و مالێ خۆ جیهادێ د ڕێكا خودێدا بكەن]، خودێ دێ گونەهێت هەوە ژێ بەت، و دێ هەوە بەتە بەحەشتێت ڕویبار د بنڕا دچن، و دێ هەوە كەتە د ئاڤاهییێت خۆشدا د بەحەشتێت ئاكنجیبوونێدا، و ئەڤەیە سەرفەرازیا مەزن.
(13) 13. و نیعمەتەكا دیتر [یان سەرفەرازییەكا دیتر] هوین حەژێ دكەن [خودێ دێ دەتە هەوە]، ئەو ژی سەركەڤتن و ڤەكرنەكا نێزیكە ژ خودێ [مەخسەد پێ ڤەكرنا مەكەهێیە]، و مزگینییێ بدە خودان باوەران.
(14) 14. گەلی خودان باوەران هاریكارێت دینێ خودێ بن [ئانكو دینێ خودێ ب سەربێخن و بلند بكەن]، وەكی عیسایێ كوڕێ مەریەمێ گۆتییە هەڤالێت خۆ یێت بژارە: كی دێ هاریكارییا من كەت بۆ سەرفەرازكرنا دینێ خودێ، هەڤالێت وی یێت بژارە گۆت: ئەم هاریكارێت دینێ خودێینە، ڤێجا دەستەكەكێ ژ ئسرائیلییان باوەری پێ ئینا و دەستەكەكێ باوەری پێ نەئینا، ڤێجا مە ژی پشتەڤانییا ئەوێت باوەری ئینایین ل سەر نەیارێت وان كر، و ئەو ب سەركەڤتن.