(1) 1. هندی د ئەرد و ئەسماناندا هەی خودێ ژ هەمی كێماسییان پاقژ دكەن و تەسبیحا وی دكەن، ئەوە خودانێ هەمی تشتان و ژ هەمی كێماسییان پاقژ، و سەردەست و كاربنەجهـ.
(2) 2. ئەوی پێغەمبەرەك بۆ عەرەبان هەر ژ ناڤ وان ب خۆ هنارت، دا ئایەتێت خودێ كو قورئانە بۆ وان بخوینیت، و دا وان [ژ قڕێژا شركێ و گاورییێ و گونەهان] پاقژ بكەت و وان فێری قورئانێ و سونەتا پێغەمبەری بكەت، هەرچەندە بەری ڤێ ئەو د گومڕایییەكا ئاشكەرادا بوون.
(3) 3. و یێ [هاتییە هنارتن] بۆ هندەكێت دی ژی كو هێژ نەگەهشتینە وان [ئانكو ئەو یێ هاتییە هنارتن بۆ موسلمانێت سەردەمێ پێغەمبەری و یێت پشتی وان دئێن هەتا ڕۆژا قیامەتێ، ژ عەرەب و نەعەرەبان]، و ئەوە یێ سەردەست و كاربنەجهـ.
(4) 4. و ئەڤە [رێزداری و پێغەمبەراتی] كەرەما خودێیە، خودێ ددەتە وی یێ بڤێت، و خودێ خودانێ كەرەما مەزنە.
(5) 5. مەتەلا وان ئەوێت ل سەر وان هاتییە دانان كار ب تەوراتێ بكەن، پاشی كار پێ نەكرین و ژ فەرمانێت وێ دەركەڤتین، وەكی مەتەلا وی كەرییە ئەوێ بارەكی كتێبان ل سەر پشتێ [و نوزانیت چییە ل سەر پشتێ، ئەوان ژی تەورات یا د ناڤ دەستاندا بەلێ چو ژێ نوزانن] مەتەلا وی ملەتێ نیشان و ئایەتێت خودێ درەو دانایین چەندا پیسە، و خودێ ملەتێ ستەمكار ڕاستەڕێ ناكەت.
(6) 6. بێژە: گەلی جوهییان ئەگەر ل دەڤ هەوە وەسایە كو هوین ب تنێ ژ هەمی مرۆڤان، دۆست و خۆشتڤیێت خودێنە، پا كا داخوازا مرنێ بكەن [دا بچنە دەڤ وی و ژ ئێش و ئازارێت دنیایێ دەركەڤن]، ئەگەر هوین ڕاست دبێژن.
(7) 7. و ژ بەر وان كار و كریارێت وان كرین، چوجا ئەو داخوازا مرنێ ناكەن، و خودێ ژ زۆرداران ب ئاگەهە.
(8) 8. [هەی موحەممەد] بێژە: ب ڕاستی ئەو مرنا هوین ژێ دڕەڤن، هەر دێ گەهیتە هەوە، پاشی هوین دێ ب بال زانایێ نهینی و ئاشكەرایانڤە زڤڕن، و هندی هەوە كری دێ هەوە پێ ئاگەهداركەت [ئانكو دێ هەوە ل دویڤ كار و كریارێت هەوە ئیزادەت].
(9) 9. گەلی خودان باوەران گاڤا ڕۆژا ئەینییێ بانگێ نڤێژێ هاتەدان هوین بۆ بیرئینانا خودێ [و گوهدانا وەعزی و نڤێژا ئەینیێ] هەڕن، و كڕین و فرۆتنێ بهێلن، ئەڤە [هێلانا كڕین و فرۆتنێ و گرتنا ڕێكا ڕازیبوونا خودێ] بۆ هەوە چێترە ئەگەر هوین بزانن.
(10) 10. و ئەگەر نڤێژ هاتەكرن، [ڕابن] و د ئەردیدا بەلاڤ ببن و ژ ڕزقێ خودێ [ب كارێ خۆ] بخوازن، و گەلەك خودێ بیننە بیرا خۆ و زكرێ وی بكەن [هەمی وەختان نە بەس وەختێ نڤێژان ب تنێ]، دا هوین سەرفەراز ببن.
(11) 11. و گاڤا وان بازرگانییەك یان كەیف و شاهییەك دیت، ب بەرڤە دچن و تە دهێلنە ژپێڤە [ل سەر مینبەرێ]، بێژە: تشتێ ل دەڤ خودێ بۆ هەوە چێترە ژ كەیف و شاهی و كڕین و فرۆتنێ، و خودێ باشترین ڕزقدەهە.