(1) 1. هندی د ئەرد و ئەسماناندا هەی خودێ ژ كێماسییان پاقژ دكەن و تەسبیحا وی دكەن، مالداری و فەرمانداری و پەسن هەمی یێت وینە، و ئەو ل سەر هەمی تشتان یێ دەستهەلاتدارە.
(2) 2. وی هوین یێت دایین، ڤێجا هندەكان ژ هەوە باوەری پێ نەئینا و هندەكان باوەری پێ ئینا، و چ یا هوین دكەن خودێ پێ ئاگەهە و دبینیت.
(3) 3. ئەرد و ئەسمان بۆ هەقییێ یێت دایین، و وێنە و شكل دا هەوە، و سەر و شكلێ هەوە جوان كر و باش چێكر، و زڤڕین و دویماهیكا هەوە هەر ب بال ویڤەیە.
(4) 4. هەچییا د ئەرد و ئەسماناندا هەی دزانیت، و هەر تشتەكی هوین دكەن چ ب نهینی و چ ب ئاشكەرایی دزانیت، و دزانیت كا چ د دلاندا هەیە.
(5) 5. ئەرێ ما بەحسێ ئەوێت بەری ڤان گاوربوویین نەگەهشتییە هەوە، وان تامكرە جزایێ كارێ خۆ، و وان ئیزایەكا ب ژان و دژوار یا هەی [ڕۆژا قیامەتێ].
(6) 6. ئەڤە [ئیزایا وان دیتی] یا هندێ بوو، پێغەمبەرێت وان ب بەلگە و موعجیزەیێت ئاشكەراڤە بۆ وان دهاتن [و ئەوان باوەری ب وان نەدئینا]، و دگۆتن: ئەرێ چاوا مرۆڤەك دێ بیتە پێغەمبەر و دێ مە ڕاستەڕێ كەت؟ گاوربوون و ڕوییێ خۆ [ژ باوەری ئینانێ] وەرگێڕان، و خودێ پاكی ب [باوەری ئینانا] وان نەبوو، و خودێ یێ زەنگین و هێژایی پەسن و سوپاسییێیە.
(7) 7. گاوران [مەخسەد خەلكێ مەكەهێ] هزركرن ئەو [پشتی مرنێ] ناڕابنەڤە، بێژە: نەخێر، وەسا نینە وەكی هوین هزر دكەن، ئەز ب خودایێ خۆ كەم هوین [پشتی مرنێ] دێ ڕابنەڤە، پاشی هوین دێ ب كار و كریارێت خۆ ئێنە ئاگەهداركرن، و ئەڤە ل بەر خودێ یا ب ساناهییە.
(8) 8. ڤێجا باوەرییێ ب خودێ و پێغەمبەرێ وی و وێ ڕۆناهییا مە ئینایییە خوارێ [كو قورئانە] بینن، و هەر كارێ هوین دكەن خودێ پێ ئاگەهە.
(9) 9. ڕۆژا خودێ هەوە بۆ ڕۆژا كۆمبوونێ كۆم دكەت، ئەو ڕۆژ ئەوە یا خوسارەتیا هەر كەسەكی دیار دبیت، و هەر كەسێ باوەرییێ ب خودێ بینیت و كار و كریارێت ڕاست و دورست بكەت، خودێ دێ گونەهێت وی ژێ بەت و دێ بەتە بەحەشتێت ڕویبار دبنڕا دچن، و هەروهەر دێ تێدا بن و ئەڤەیە سەرفەرازیا مەزن.
(10) 10. و ئەوێت گاوربوویین و نیشان و بەلگەیێت مە درەو دانایین، ب ڕاستی ئەڤە دۆژەهینە و هەروهەر دێ د دۆژەهێدا بن، و چ پیسە دویماهیكە ئەو.
(11) 11. چو نەخۆشی ب سەرێ كەسێ نائێت ئەگەر ب قەدەر و دەستویرییا خودێ نەبیت، و هەر كەسێ باوەرییێ ب خودێ بینیت [و بزانیت هەر تشتەكێ ب سەری دئێت قەدەرا خودێیە]، خودێ دێ دلێ وی ڕاستەڕێ كەت [ئەو دێ ڕەفتارا دورست د گەل نەخۆشییێ كەت و خەلەت نابیت]، و هەر تشتێ هەبیت خودێ ژێ ب ئاگەهە.
(12) 12. [گەلی مرۆڤان] گوهدارییا خودێ بكەن و گوهدارییا پێغەمبەری بكەن، ئەگەر هوین ڕوییێ خۆ [ژ گوهدارییا خودێ و پێغەمبەری] وەرگێڕن، [بزانن] ژ گەهاندنا ئاشكەرا پێڤەتر ل سەر پێغەمبەرێ مە نینە.
(13) 13. خودێ ئەوە یێ چو پەرستی یێت ڕاست و دورست ژ وی پێڤەتر نەی، و بلا خودان باوەر پشتا خۆ ب خودێ گەرم بكەن.
(14) 14. گەلی خودان باوەران، ب ڕاستی هندەك ژ ژن و زاڕۆكێت هەوە دژمنێت هەوەنە، ڤێجا هشیاری وان بن [ئەو كارلێكرنێ ل هەوە نەكەن هوین گونەهێ بكەن یان د ڕێكا خودێدا سست ببن]، و ئەگەر هوین ل وان نەگرن و ل وان ببۆرن و لۆمەی وان نەكەن [و كێماسیێت وان ئاشكەرا نەكەن و نەدەنە ڕوییێ وان]، ب ڕاستی خودێ گونەهـ ژێبەر و دلۆڤانە.
(15) 15. هندی مال و زاڕۆكێت هەوەنە بۆ هەوە جەڕباندنن [دبیت بەرێ هەوە بدەنە حەرامییێ، ڤێجا هشیار بن]، و خەلاتەكێ مەزن یێ ل دەڤ خودێ هەی [ڤێجا بلا مال و زاڕۆكێت هەوە، هەوە ژ ڤی خەلاتی نەكەن].
(16) 16. و هندی هوین بشێن ژ خودێ بترسن، و گوهدارییێ [یا وان شیرەتان ئەوێت ل هەوە دئێنەكرن] بكەن، و گوهدارییا فەرمانێت ل هەوە دئێنەكرن بكەن، و مالی [د ڕێكا خودێدا] بدەن و بمەزێخن، بۆ هەوە باشییە، و هەر كەسێ [خودێ] وی ژ قەلساتیا نەفسا وی بپارێزیت، ب ڕاستی ئەو یێ سەرفەرازە.
(17) 17. و ئەگەر هوین ژ دل [و بێ بەرانبەر] مالێ خۆ د ڕێكا خودێدا بدەن و بمەزێخن، خودێ دێ خێرا هەوە چەند قاتەكان زێدەكەت و گونەهێت هەوە دێ ژێ بەت، و ب ڕاستی خودێ شوكوردارە [ئانكو بەرانبەری تشتێ كێم، گەلەكێ ددەت و خەلاتدەهە]، و حەلیمە [لەزێ ل جزادانێ ناكەت].
(18) 18. زانایێ نهینی و ئاشكەرایانە، و یێ سەردەست و كاربنەجهە.