(1) 1. (الحاقە) ناڤە بۆ ڕۆژا قیامەتێ، هاتییە ناڤكرن ب ئەلحاققە چونكی حەقە و ڕاستییە، و هەر دێ ئێت.
(2) 2. ئەلحاققە چییە؟ [ئەڤە تەئكیدە ل سەر هاتنا ڕۆژا قیامەتێ].
(3) 3. ما تو چ دزانی هەی موحەممەد كا ڕۆژا قیامەتێ، ئەلحاققە یا چاوایە؟ [تو چو ژێ نوزانی] چونكی تە نەدیتییە كا ئەو ڕۆژە چەند ب سەهمە.
(4) 4. (ثمود) (ملەتێ صالح پێغەمبەر) و عاد (ملەتێ هوود پێغەمبەر) باوەری ب ڕۆژا قیامەتێ نەئینان، و گۆتن: درەوە چو ڕۆژ نینن دلقوتك تێدا بێتە دلان.
(5) 5. هندی (ثمود) بوو (ملەتێ صالح پێغەمبەر) ب هشكەقێڕییەكا ب هێز و دژوار د هیلاك چۆن.
(6) 6. و هندی عاد بوو (ملەتێ هوود پێغەمبەر)، ب ڕەشەبایەكێ ب سروسەقەم و ب ڤزەڤز و زێدە سار د هیلاك چۆن.
(7) 7. حەفت شەڤ و هەشت ڕۆژان ل سەرێك ب سەر واندا هنارت، و ئەو د مالێت خۆدا مری و بێ بزاڤ مان، وەكی قورمێت دارقەسپێت خلۆلە لێ هاتن.
(8) 8. ما تو دبینی شوینمایییەكا وان مابیت، [بچویك و مەزن كەس ژ وان نەمان، هەمی قڕبوون].
(9) 9. و فیرعەون و یێت بەری وی و گوندێت سەرێك و بنێك كرین دەست ب گونەهان كرن.
(10) 10. گوهدارییا پێغەمبەرێ خودێ نەكرن، ئینا خودێ ئەو ئیزادانەكا دژوار ئیزادان.
(11) 11. بێ گۆمان وەختێ ئاڤ ڕابووی و هەمی تشت بنئاڤ بوویین، مە هوین ل سەر پشتا گەمییێ قورتالكرن.
(12) 12. دا ئەم [قورتالكرنا خودان باوەران و د هیلاكبرنا گاوران] بكەینە چامە و عیبرەت، و دا هەر بمینیتە د گوهێت ڤەكریدا.
(13) 13. وەختێ پفەك ل بۆقێ دئێتە دان [پفا وێرانكرنا دنیایێ].
(14) 14. و دەمێ ئەرد و چیا ژ ڕهان دئێنە هلكێشان، و ڤێك دكەڤن و هویر و هەرا دبن.
(15) 15. ئەها هنگی بزانە قیامەت ڕابوو.
(16) 16. و ئەسمان كەلشت، و وێ ڕۆژێ ئەسمان یێ سست و خاڤە.
(17) 17. و ملیاكەت ل ڕەخ و دۆرانن (چونكی ئەسمان ئێورگەها ملیاكەتانە)، وێ ڕۆژێ هەشت ملیاكەت عەرشێ خودێ ڕادكەن.
(18) 18. وێ ڕۆژێ هوین دێ پێشبەری خودایێ خۆ بن، كەس ژ هەوە نائێتە ڤەشارتن.
(19) 19. هندی ئەوە ئەوێ كتێبا كار و كریارێت خۆ ب دەستێ ڕاستێ وەردگریت، ب كەیف دێ بێژیت: كەرەمكەن كتێبا من بخوینن.
(20) 20. ئەز یێ پشت ڕاست بووم حسابا ڕۆژا قیامەتێ یا ل دویفمن، و خودایێ من دێ حسابەكا سڤك د گەل من كەت.
(21) 21. و ئەو یێ د ژین و ژیارەكا خۆشدا.
(22) 22. د بەحەشتەكا خودان ڕێز و قەدردا.
(23) 23. فێقییێ وێ [بەحەشتێ] نزم و بەردەستە.
(24) 24. بخۆن و ڤەخۆن، هەوە نۆشی جان بیت ژ بەر وان كار و كریارێت باش ئەوێت هەوە د دنیایێدا كرین.
(25) 25. و هندی ئەوە ئەوێ كتێبا خۆ ب دەستێ چەپێ وەردگریت ب كول و خەمڤە دێ بێژیت: خۆزی ژ خێرا خودێڕا من ئەڤ كتێبە وەرنەگرتبایە.
(26) 26. و من چو ژ هەق و حسێبا خۆ نەزانیبایە.
(27) 27. خۆزی ژ خێرا خودێڕا مرنا من، مرنا ئێكجاری بایە [و ئەز پشتی مرنێ ساخ نەببامەڤە].
(28) 28. مال و ملكێ من ل سەر دنیایێ كۆمكری، نە مفا گەهاندە من، و نە ئیزا ژ من دا پاش.
(29) 29. دەستهەلاتا من (پشت و پشتەڤانی و ناڤ و دەنگ) هەمی ژ دەست من چۆ.
(30) 30. [خودایێ مەزن دێ بێژیتە ملیاكەتان: ڤی گونەهكارێ تێر گونەهـ] ببەن و دەست و پێیان لێ قەید و زنجیر بكەن.
(31) 31. و باڤێژنە د ناڤ دۆژەها سنجریدا.
(32) 32. پاشی ب زنجیرەكا حەفتێ گەز زنجیرپێچ بكەن.
(33) 33. ئەوی باوەری ب خودایێ مەزن نەدئینا.
(34) 34. و نە خۆ و نە یێ وێڤەتر د بەر هندێڕا نەدكر، برسا فەقیر و ژاران بشكێنیت.
(35) 35. ئەوی ئەڤرۆ چو هەڤال و هۆگرێت خۆ ل ڤێرێ نینن.
(36) 36. و چو خوارن ژی وی نینە، كێم و عەداڤا برینێت دۆژەهییان نەبیت.
(37) 37. كەس ڤێ خوارنێ ناخۆت، گونەهكار نەبن.
(38) 38. سویند ب یێ بەرچاڤ (یێ هوین دبینن).
(39) 39. سویند ب یێ نەبەرچاڤ، (یێ هوین نەبینن).
(40) 40. بێ گۆمان ئەڤ قورئانا هەنێ ئاخڤتنا خودایێ دلۆڤانە، بۆ پێغەمبەری یا هنارتی.
(41) 41. و [ئەڤ قورئانە] نەئاخڤتنا هۆزانڤانانە، هوین ژێ بێ باوەر.
(42) 42. و [ئەڤ قورئانە] نەئاخڤتنا خێڤزانكانە، پیچەكێ ژی، هوین خۆ تێ ناگەهینن!.
(43) 43. ئەڤ قورئانە ژ نك خودایێ هەمی جیهانان یا هاتی.
(44) 44. و هەكە وی [مەخسەد موحەممەد پێغەمبەر] هندە ئاخڤتن ژ كیسێ مە چێكربانە.
(45) 45. ئەم دا ب هێز و شیانا خۆ زوی تۆلێ لێ ڤەكەین.
(46) 46. پاشی ئەم، دا ڕها ب دلێ ویڤە گرێدایی، بڕین و قەتینین.
(47) 47. هنگی ئێك ژ هەوە نەدشیا بەڕەڤانییێ ژێ بكەت، دا نەكەڤیتە بەر جزایێ خۆ.
(48) 48. و ب ڕاستی ئەڤ قورئانە بیرئینانە بۆ خودان باوەرێت ژ خودێ ترس.
(49) 49. و مە ئاگەهـ ژێ هەیە، هندەك ژ هەوە قورئانێ درەو ددانن.
(50) 50. و ئەڤە ڕۆژا قیامەتێ بۆ گاوران دێ بیتە هزرەت و پەشێمانی.
(51) 51. و ئەڤ قورئانە ڕاستییەكا ڕاستە، چو گۆمان ناچنێ.
(52) 52. ڤێجا تو پاقژییێ بدە بال ناڤێ خودایێ خۆ یێ مەزن، و خودایێ خۆ ژ هەمی كێماسییان پاقژ بكە.