(1) 1. ئێك ژ گاورێت مەكەهێ گۆت: كا بلا قیامەت بێت.
(2) 2. گاوران وێ ڕۆژێ چو مەفەر نینن، و چو جهـ نینن پێڤە بڕەڤن.
(3) 3. ئەو قیامەتا ئەو دخوازن، ب فەرمانا خودێ دێ ب سەر واندا ئێت، ئەو خودایێ خودان پێك و پەییسك، ملیاكەتێت وی پێ دچنە ئەسمانان.
(4) 4. ملیاكەت و جبریل د ڕۆژەكێدا ژێلەل بەر ب خودێ دچن، درێژاییا وێ پێنجی هزار سالن.
(5) 5. تو بێنا خۆ ل سەر نەخۆشییێت وان فرەهـ بكە، بێنفرەهكرنەكا بێ ترس و بێ خەم.
(6) 6. ئەو دبینن ئەو ڕۆژ كو ڕۆژا قیامەتێیە، یا دویرە و چوجا نائێت.
(7) 8. و ئەم دبینین یا نێزیكە و دێ هەر ئێت.
(8) 8. ڕۆژا ئەسمان وەكی ڕساسێ حەلیایی لێ دئێت.
(9) 9. و ڕۆژا چیا وەكی هرییا بەرەبا لێ دئێت.
(10) 10. و وێ ڕۆژێ خۆشڤی پسیارا خۆشڤییێ خۆ ناكەت و لێ ناپرسیت.
(11) 11. ئێك و دو دبینن و ئێك و دو دنیاسن، مرۆڤێ گونەهكار وێ ڕۆژێ حەز دكەت، كوڕ و كچێت خۆ هەمییان گۆری خۆ بكەت.
(12) 12. و ژنا خۆ و برایێت خۆ هەمییان گۆری خۆ بكەت
(13) 13. و ئێل و ئویجاخا خۆ، هەمییان گۆری خۆ بكەت.
(14) 14. و پێ خۆشە هندی ل سەر ڕوییێ ئەردی گۆری خۆ بكەت، بەس قورتال ببیت.
(15) 15. نەخێر چو وان قورتال ناكەن و بلا ل خودێ بزڤڕن، ئاگر و گوڕی یێ ل پێشییا وان.
(16) 16. [ئەو ئاگرە] پیستێ سەری و لەشی ڕادكەت و دڕەڤیت.
(17) 17. گازی وان دكەت ئەوێت پشت دایینە هەقییێ، و خۆ ژێ دایینە پاش.
(18) 18. گازی وان دكەت ئەوێت مال كۆمكرین و داناینە سەرێك و ڤەشارتین.
(19) 19. مرۆڤ چاڤترسیایی و بێنتەنگ یێ هاتییە چێكرن.
(20) 20. ئەگەر نەخۆشی گەهشتێ (چ نەساخی و چ هەژاری و هەر نەخۆشییەكا دی) یێ خەمگین و بێ هیڤی و ب ئاخ و ئۆفە.
(21) 21. و ئەگەر خودێ قەنجی د گەل كر و دەستێ وی فرەهكر، چو ژ دەستان دەرناكەڤیت.
(22) 22. نڤێژكەرێت تێ نەبن.
(23) 23. ئەوێت ل سەر كرنا نڤێژان بەردەوام.
(24) 24. و ئەو تێ نەبن ئەوێت بارا خودێ دئێخنە د ناڤ مالێ خۆدا.
(25) 25. بۆ فەقیر و ژار و خوازخوازۆكان.
(26) 26. و ئەو تێ نەبن ئەوێت باوەرییێ ب ڕۆژا جزادانێ دئینن.
(27) 27. و ئەو تێ نەبن ئەوێت دلێ وان یێ ب ترس ژ ئیزادانا خودێ.
(28) 28. ب ڕاستی عەزابا خودایێ وان نەیا هندێیە ژێ پشت ڕاست ببن.
(29) 29. و ئەو تێ نەبن ئەوێت داڤ و دەهمەن پاقژ و شەرمگەها خۆ دپارێزن، ژ هەر كەسەكی.
(30) 30. ژ بلی ژن و جێریێت خۆ، و ئەو بۆ ڤێ نە د لۆمەدارن، و گازندە ژ وان نائێتەكرن.
(31) 31. و هەر كەسێ ب ڕێكەكا دی شەهوەتا خۆ بشكێنیت ئەو یێ گونەهكارە.
(32) 32. و ئەو تێ نەبن ئەوێت سۆز و پەیمان و ئەمانەتێت خۆ دپارێزن.
(33) 33. و ئەو تێ نەبن ئەوێت شادەیییا خۆ بۆ دویر و نێزیكان نەڤەشێرن.
(34) 34. و ئەو تێ نەبن ئەوێت ب دورستی و بەردەوام نڤێژێت خۆ دكەن.
(35) 35. ئەها ئەڤەنە د بەحەشتاندا، خودان قەدر.
(36) 36. ئەڤان گاوران خێرە هۆسا ب لەز ژ تە دڕەڤن، و تە درەوین ددانن و باوەرییێ ب تە نائینن؟!!.
(37) 37. دەستەك دەستەك ل ڕەخێ تە یێ ڕاستێ و چەپێ، د ڕوینشتی و بەلاڤ و گوهشینە.
(38) 38. ئەرێ هەر ئێك ژ وان ل هیڤییا هندێیە بچیتە بەحەشتا تێر خێر و بێر؟.
(39) 39. نەخێر نە ب كەیفا وانە، مە ئەو یێ ژ وی تشتی چێكرین یێ ئەو دزانن [ژ چپكەكێ، پاشی ژ پرتەكا خوینێ، پاشی ژ پارچەیەكا گۆشتی].
(40) 40. سویند ب خودایێ ڕۆژهەلات و ڕۆژئاڤایان، ئەم دشێین.
(41) 41. وان ب هندەكێت ژ وان چێتر بگوهۆڕین، و ئەڤە ل بەر مە نەیا ب زەحمەتە و كەس نەشێت ڕێكێ ل مە بگریت.
(42) 42. (هەی موحەممەد) ژ وان بگەڕە، بلا بمیننە ب پویچاتیێت خۆڤە، و بلا د دنیایا خۆدا بلەزن، هەتا وێ ڕۆژا ب ترس و سەهم یا تۆبە و پەشێمانی تێدا بێ مفا، دبینن.
(43) 43. ڕۆژا ب لەز ژ گۆڕستانان دەردكەڤن، و بەر ب جهێ كۆمبوونێڤە دچن، دێ بێژی یێ قەستا بوتێت خۆ دكەن، ئەوێت وان ب دەستێت خۆ چێكرین.
(44) 44. وێ ڕۆژێ، ئەو چاڤ شۆڕ و ڕەزیل و ڕسوانە، ئەها ئەڤەیە ئەو ڕۆژا ئەو ل سەر دنیایێ پێ دهاتنە ترساندن [و وان یاری پێ دكرن و باوەری پێ نەدئینان، ئەڤرۆ دێ جزایێ وێ بێ باوەرییێ ب چاڤێ سەرێ خۆ بینن].