(1) 1. هەی كەسێ تە جلكێت خۆ ب سەر خۆ دادایین.
(2) 2. ڕابە و كارێ خۆ بكە و خۆ بەرهەڤ بكە، و خەلكی ئاگەهدار بكە.
(3) 3. و خودایێ خۆ ب تنێ، مەزن بكە [مەزناتییێ ب بال كەسێ دیڤە لێ نەدە، بەس خودێ یێ مەزنە].
(4) 4. و جلكێت خۆ بژوین بكە ژ پیساتییێ (ئانكو دلێ خۆ پاقژ بكە).
(5) 5. و خۆ ژ بوت پەرێسییێ دویر بێخە.
(6) 6. و قەنجییێ نەكە منەت ل سەر كەسێ، و قەنجییێ ب ئنیەتا هندێ نەكە زێدەتر بۆ تە بێتە شوینێ.
(7) 7. ژبۆ خودایێ خۆ، بێنا خۆ ل سەر ئیزا و نەخۆشییێ فرەهـ بكە.
(8) 8. و ڕۆژا پف ل بۆقێ دئێتە دان.
(9) 9. هنگی ڕۆژەكا گران و نەخۆشە.
(10) 10. ل سەر گاوران نەیا ب ساناهییە.
(11) 11. ژ من و وی ڤەبە، (وەلیدێ كورێ موغیرەیی) یێ من ئەو دایی و ئەو ب تنێ.
(12) 12. و پاشی من كرییە خودان ملك و مالەكێ بەرفرەهـ.
(13) 13. و من هند كوڕ دایینێ، ل دۆر خڕ ببن و هەردەم د گەل بن.
(14) 14. و من دنیاداری بۆ سڤك و خۆش كری.
(15) 15. پشتی ڤێ هەمیێ، چاڤێ وی لێیە ئەز هەر بۆ زێدە بكەم.
(16) 16. نەخێر ئەز چویێ دی نادەمێ، نەخێر ئەو بۆ ڤێ قورئانێ گەلەكێ مەژی هشك و سەرڕەق بوو.
(17) 17. ئەز دێ چاما ڕەش ئینمە سەرێ وی.
(18) 18. وی هزرەك بر، ئێك ئینا، ڤیا تشتەكی د دەرهەقێ قورئانێدا بێژیت.
(19) 19. خودێ كوشتی چ گۆت؟.
(20) 20. جارەكا دی خودێ كوشتی چ گۆت، و چاوا گۆت؟
(21) 21. جارەكا دی دا هزرا خۆ.
(22) 22. پاشی ناڤچاڤێت خۆ كرنە گرێ، و خۆ گەلەك تەحل و ترش كر.
(23) 23. پاشی پشت دا باوەرییێ، و خۆ ژ هەقییێ و ڕاستییێ مەزنتر دیت.
(24) 24. گۆت: هەبیت نەبیت ئەڤە سێرەیەكە ژ بەرێ وەرە، دەست بۆ دەست دئێتە ڤەگوهاستن.
(25) 25. هەبیت نەبیت ئەڤە گۆتنا مرۆڤانە [نەگۆتنا خودێیە].
(26) 26. دێ وی ئاڤێژنە د ئاگرەكێ سنجریدا.
(27) 27. تو دزانی ئەو ئاگرێ سنجری چییە؟
(28) 28. ئاڤاهی د چو ناهێلیت.
(29) 29. ژ دویر یا دیارە بۆ مرۆڤان.
(30) 30. نۆزدە زێرەڤان ل سەر د ڕاوەستاینە.
(31) 31. و مە زێرەڤانێت ئاگرێ دۆژەهێ ژ ملیاكەتان پێڤەتر چێ نەكرینە، و مە هەژمارا وان ژ بەر هندێ یا كرییە هندە دا بێ باوەران بجەڕبینین، و دا خودان كتێب (جوهی و فەلە) پشت ڕاست ببن كو ئەڤ قورئانە یا ژ نك خودێ هاتی، و دا باوەرییا خودان باوەران پتر لێ بێت، و دا خودان كتێب و خودان باوەر ب گۆمان نەكەڤن (ل هەژمارا وان)، و دا ئەوێت دلێ وان گۆمان و دوڕوییاتی تێدا و گاور بێژن: خودێ چ مەخسەد ب دیاركرنا ڤێ هەژمارێ هەیە، هۆسا یێ خودێ بڤێت گومڕا دكەت و یێ بڤێت ڕاستەڕێ دكەت، و كەس نوزانیت كا خودایێ تە چەند لەشكەر هەیە و كا چنە، و ئەڤ ئاگرە (دۆژەهە) ژ دەرس و چامەیان پێڤەتر نینە بۆ مرۆڤان.
(32) 32. نە‌و بلا ل خۆ بزڤڕن، سویند ب هەیڤێ.
(33) 33. و سویند ب شەڤێ دەمێ ب تارییا خۆڤە دچیت.
(34) 34. و سویند ب سپێدەیێ دەمێ ب ڕۆناهییا خۆڤە دئێت.
(35) 35. بێ گۆمان ئەڤ دۆژەهە ئیزا و ئاتافەكا مەزنە، چاوا ژێ ناترسن و تڕانەیان پێ دكەن.
(36) 36. ئەڤ ئاگرە ئاگەهداركرنە بۆ مرۆڤان، دا گوهدارییا فەرمانێت خودێ بكەن.
(37) 37. بۆ یێ بڤێت بێتە پێش ب كرنا خێرێ و باشییێ، یان ڤەمینیت ب كرنا گونەهان.
(38) 38. هەر كەسەك د گەرەوا كارێ خۆدایە و پێڤە گرێدایییە [ژێ دەرناكەڤیت هەتا مافێت ل سەر، ژێ نەئێنە ستاندن].
(39) 39. ئەو تێ نەبن ئەوێت كتێبا خۆ ب دەستێ ڕاستێ وەردگرن.
(40) 40. د بەحەشتاندا پسیارا ئێك و دو دكەن.
(41) 41. ژ حالێ گونەهكاران.
(42) 42. [دبێژنە گونەهكاران]: چ هوین كرنە د [ڤێ] دۆژەهێدا.
(43) 43. [گونەهكار] دێ بێژن: د دنیایێدا مە نڤێژ بۆ خودایێ خۆ نەدكرن.
(44) 44. و مە نان نەددا فەقیر و ژاران.
(45) 45. مە ژی وەكی خەلكی خۆ دهاڤێتە هەمی كاران، چ باش چ خراب.
(46) 46. و مە د دنیایێدا باوەری ب ڕۆژا جزادانێ نەدئینا.
(47) 47. ئەم د هۆسا بوویین ، هەتا مرن ب سەر مەدا هاتی.
(48) 48. مەهدەرا مەهدەرچییان، چو مفایی ناگەهینیتە وان.
(49) 49. بۆچی پشتا خۆ ددەنە قورئانێ و گوهێ خۆ نادەنێ.
(50) 50. دێ بێژی كەرێت ڕاتەقیایینە.
(51) 51. ژ شێرەكی یێت ڕەڤین.
(52) 52. بەلێ هەر ئێكی ژ وان، دڤیا بۆ وی ژی كتێبەك هاتبایە، هەروەكی بۆ پێغەمبەری هاتی.
(53) 53. نەخێر بلا ل وێ هیڤییێ نەبن، بەلێ ب ڕاستی وان باوەری ب ڕۆژا قیامەتێ نینە و ژێ ناترسن.
(54) 54. نەخێر وەنینە وەكی ئەو د ڕاستا قورئانێدا دبێژن، قورئان ئاخڤتنا خودێیە، و بیرئینان و شیرەتە.
(55) 55. و یێ بڤێت دێ باوەرییێ پێ ئینیت، و بۆ خۆ شیرەتان ژێ وەرگریت.
(56) 56. و بەس ئەو دێ بۆ خۆ شیرەتان ژێ وەرگریت یێ خودێ بۆ ڤیایی، و هەر خودێیە خودانێ پارێزكارییێ و خودانێ گونەهـ ژێبرنێ.