(1) 1. سویندێ ب ڕۆژا ڕابوونێ و دویماهییێ دخۆم.
(2) 2. و سویند ب نەفسا خێرخواز و زێدە لۆمەكاری خۆ [لۆمەی خۆ دكەت ل سەر خەلەتیێ، كا بۆچی كر، و ل سەر باشییێ كا بۆچی نەكر].
(3) 3. ئەرێ ما مرۆڤ هزر دكەت ئەم نەشێین جارەكا دی هەستیكێت وی لێك بدەین.
(4) 4. بەلێ.. ئەم دشێین سەرتلێت وی ژی وەكی بەرێ چێ بكەین.
(5) 5. مرۆڤی دڤێت ب ڤێ ئینكاركرنێ چو د دلێ خۆدا نەهێلیت، و ڕێكا خرابییێ ل بەر هەر یا ڤەكری بیت.
(6) 6. دبێژیت كا كەنگی ڕۆژا قیامەتێ دێ ئێت.
(7) 7. وەختێ چاڤ زیق دبن، ژ ترساندا نە بێن نە بچن.
(8) 8. و وەختێ هەیڤ نەما، غەیری و تاری بوو.
(9) 9. و وەختێ ڕۆژ و هەیڤ ڤێك دكەڤن و دگەهنە ئێك.
(10) 10. ئەها هنگی مرۆڤ دێ بێژیت كیڤە بڕەڤم.
(11) 11. نەخێر وی چو ڕێك نینن.
(12) 12. وێ ڕۆژێ زڤڕین بۆ نك خودێیە، وێ ڕۆژێ هەمی ل دەڤ خودێ دێ ئێورن.
(13) 13. وێ ڕۆژێ كار و كریارێت مرۆڤی هەمی، هویر و گر، دێ بۆ مرۆڤی ئێنە گۆتن، و مرۆڤ دێ بینیت.
(14) 14. مرۆڤ ب خۆ ل سەر خۆ دێ بیتە شاهد.
(15) 15. ڤێجا چەند هەجەتان ژی بگریت فایدێ وی ناكەن.
(16) 16. [هەی پێغەمبەر] ئەزمانێ خۆ ب لەز ل قورئانێ نەگەڕینە ژ ترسا ژ بیركرنێ.
(17) 17. ب ڕاستی ل سەر مەیە ئەم ڤێ قورئانێ د سینگێ تەدا كۆم بكەین، و بێخینە سەر ئەزمانێ تە كو تو بخوینی.
(18) 18. ڤێجا ئەگەر مە بۆ تە خواند، گوهێ خۆ بدە خواندنێ [و ژ بەر خواندنا وێ ئەزمانێ خۆ نەلڤلڤینە و بێ دەنگ بە، پشتی ئەم بۆ تە دخوینین پاشی بخوینە، هەروەكی بۆ تە هاتییە خواندن ئەم دێ ل سەر تە ساناهی و سڤك كەین].
(19) 19. پاشی ل سەر مەیە ئەم بۆ تە ئاشكەرا بكەین، و ڕۆنكرنا وێ نیشا تە بدەین.
(20) 20. نەخێر نەكو هوین ل هاتنا ڕۆژا قیامەتێ ب شكن، بەلێ هوین ل دنیایێ ب لەزن [هوین گەلەك حەژێ دكەن].
(21) 21. وهوین و پشتا خۆ ددەنە ئاخرەتێ.
(22) 22. وێ ڕۆژێ هندەك سەروچاڤ د گەش و خۆشن.
(23) 23. بەرێ وان یێ ل خودایێ وان و خودایێ خۆ دبینن.
(24) 24. و هندەك سەروچاڤ وێ ڕۆژێ د تەحل و ترشن.
(25) 25. دزانن كو ئاتافەكا مەزن دێ ب سەر واندا ئێت، و پشتێ ل وان شكێنیت.
(26) 26. نەخێر وەنەكەن و ل خۆ بزڤڕن، چ گاڤا ڕوح گەهشتە قولقولكا ستۆی، و مرۆڤ كەڤتە د سەكەراتێدا.
(27) 27. و خەلكێ مالا وی گۆت: كا كی هەیە دەرمانەكی یان چارەیەكێ بۆ ببینیت.
(28) 28. و پشت ڕاست بوو كو مرنە، و دێ كەس و كارێت خۆ هێلیت.
(29) 29. و پیێت وی تێك ئالیان.
(30) 30. ئەها هنگی بەر ب خودێڤە دێ ئێنە ئاژۆتن.
(31) 31. نە [وی] باوەری ب قورئانێ ئینا، و نە [وی] نڤێژ كرن.
(32) 32. بەلێ درەو دانان، و پشت دا وان.
(33) 33. و [نە بەس ئەڤە وی كر] پاشی قەبە چۆ مالا خۆ.
(34) 34. ئیزا ل سەر ئیزایێ بۆ تە بیت [هەی بێ باوەر].
(35) 35. پاشی ل سەر ئیزایێ بۆ تە بیت [هەی بێ باوەر].
(36) 36. ئەرێ مرۆڤ هزر دكەت، هەما دێ هۆسا مینیت، بێ حساب د گەل بێتەكرن.
(37) 37. ما نە چپكەكا ئاڤێ بوو، كەڤتییە د مالبچویكیدا؟.
(38) 38. پاشی بوو خوینپارە، پاشی خودێ چێكر و دورستكر، دەست و پێ و چاڤ و گوه دانێ.
(39) 39. و ژن و مێر هەر ژ وی چێكرن [ئانكو كچ و كوڕ ب دویڤ ئێخستن].
(40) 40. ئەرێ ما ئەوێ هوین هۆسا دایین، نەشێت مرییان ساخ بكەتەڤە؟.