(1) 1. ب ڕاستی و بێ گۆمان دەمەكێ درێژ یێ ب سەر مرۆڤیدا بۆری، و ئەو نەبوو، و یێ نەنیاس بوو.
(2) 2. ب ڕاستی مە مرۆڤ ژ چپكەكا ئاڤا ژن و مێران یا تێكەل یێ چێكری، دا بجەڕبینین كا پاشی دێ چ كار و كریاران كەت، و مە ب گوه و چاڤ ئێخست.
(3) 3. بێ گۆمان مە ڕێك یا بۆ ڕۆنكری، ڤێجا یان دێ یێ شوكوردار بیت و نیعمەت و كەرەمێت خودێ د گەل كرین ژ بیر ناكەت، یان دێ ژ ڕێ دەركەڤیت و دێ یێ بێ نان و خوێ بیت، و ڕێكا خرابییێ دێ گریت.
(4) 4. مە بۆ گاور و بێ باوەران زنجیر و قەید و ئاگرێ سنجری یێ بەرهەڤكری.
(5) 5. بێ گۆمان مرۆڤێت قەنج و خودان باوەر، دێ ژ پەرداغەكا تێكەلی كافوورێ ڤەخۆن.
(6) 6. ئەڤ ئاڤە كانییەكە خودێناس ژێ ڤەدخۆن، مرۆڤ د دویڤ خۆڕا ڕادكێشیت كیڤە بچیت دێ د دویڤڕا ئێت، و چاوا بڤێت دێ وەسا دەربیت.
(7) 7. ئەڤ خودێناسە ئەون ئەوێت تشتێ ئێخستینە سەر خۆ ب جهـ دكەن، و ژ ڕۆژەكێ دترسن تەنگاڤی و نەخۆشییا وێ یا تەڤایییە، كەس ژێ ڤەدەر نینە.
(8) 8. و ئەو خوارنا ئەو حەژێ دكەن و هەوجە، ددەنە هەژار و سێوی و دیلان.
(9) 9. دبێژنە وان: ئەم ڤێ خوارنێ د ڕێیا خودێدا ددەینە هەوە، مە چو بەرانبەر ژ هەوە نەڤێت، نە خەلات و نە شوكورداری.
(10) 10. ئەم ڤێ چەندێ دكەین چونكی ئەم ژ خودایێ خۆ دترسین، دا مە ژ ڕۆژەكا ترش و تەحل و گران بپارێزیت.
(11) 11. ژ بەر باشیا وان، خودێ ئەو ژ نەخۆشییا وێ ڕۆژێ پاراستن، و ڕۆناهی و گەشاتی ئێخستە د سەر و چاڤێت واندا.
(12) 12. و ژ بەر بێنفرەهییا وان، ب بەحەشتێ و ئارمویشی خەلاتكرن.
(13) 13. سەر تەختێت نەرم و خۆش و چارچەڤكری د بەحەشتێدا پالداینە، نە گەرمێ دبینن نە سەرمایێ.
(14) 14. و سیبەرا داروبارێ بەحەشتێ نێزیكی وانە، و فێقی و بەرێ وان داروباران یێ بەردەستە.
(15) 15. و خزمەتكار، ئامانێت زیڤی و پەرداغێت تەنك و زەلال، ل بەر وان دگێڕن.
(16) 16. ئامان ژ زیڤینە و بەس تێرا وان یا تێ هەی نە كێم نە زێدە.
(17) 17. و ئەڤ خودان باوەرە د بەحەشتێدا ژ پەرداغەكی ڤەدخۆن، تێكەلی زنجەبیلێیە.
(18) 18. ژ كانییەكێ ڤەدخۆن دبێژنێ سەلسەبیل [ئانكو خۆش و نەرم و شرین و سڤك].
(19) 19. و هندەك خزمەتكارێت بچویك ل بەر خزمەتا وان دگەڕن، هەروهەر تێدانە، و هەروەكی خۆ دمینن، ئەگەر تو ببینی دێ بێژێ لۆلۆ و مراری یێت بەلاڤن.
(20) 20. و ئەگەر تو خۆشییێت بەحەشتێ ببینی، دێ بینی ملكەكێ بەرفرەهە، و بێ حسێب خۆشینە.
(21) 21. و جلكێت ب خەمل و كەسك ل بەر وانە، ژ ئارمویشێ تەنك و ستویر، و بازنێت زێری دكەنە دەستێت خۆ، و خودایێ وان ڤەخوارنەكا زەلال و پاقژ دێ دەتە وان.
(22) 22. [خودایێ مەزن دێ بێژتە وان]: ئەها ئەڤە خەلاتێ بزاڤا هەوەیە، مە بزاڤا هەوە قەبویل كر و مە خەلات كر.
(23) 23. مە قورئان پیچ پیچە بۆ تە یا هنارتی.
(24) 24. ڤێجا بێنا خۆ ل سەر گەهاندنا حوكمێ خودێ فرەهـ بكە، و گوهدارییا چو گونەهكار و بێ باوەران ژ وان نەكە.
(25) 25. و بەردەوام ناڤێ خودێ بینە، سپێدە و ئێڤاران.
(26) 26. و ب شەڤ نڤێژان بكە و شەڤا خۆ ب نڤێژان ساخ بكە.
(27) 27. ئەڤ گاور و موشركە گەلەك حەژ دنیایێ دكەن، و پشتا خۆ ددەنە ڕۆژەكا گران [كو ئاخرەتە].
(28) 28. مە ئەو یێت [ژ چونەیییێ] چێكرین، و مە ئەندامێت وان یێت موكومكرین، و ئەگەر مە بڤێت دێ وان ب هندەكێت ژ وان چێتر گوهۆڕین.
(29) 29. ئەڤە شیرەت و بیرئینانە، و یێ باشیا خۆ بڤێت، بلا ڕێكا خودایێ خۆ بگریت.
(30) 30. و هوین نەشێن چو بكەن ئەگەر خودێ حەز نەكەت، ب ڕاستی خودێ یێ زانا و كاربنەجهە.
(31) 31. یێ وی بڤێت دێ ب بەر دلۆڤانییا خۆ ئێخیت، و بۆ گونەهكاران ئیزا و نەخۆشییەكا دژوار یا بەرهەڤكری.