(1) 1. خەلكێ مەكەهێ پسیارا چ ژ ئێك و دو دكەن؟ [پاشی هەر سۆرەتێ بەرسڤ داڤە، چونكی پسیار نەبۆ هندێیە دا ئەو بەرسڤێ بدەن، بەلكی بۆ دیاركرنا حێبەتیبوونا حالێ وان بوو، و ئەو كراسێ وان خۆ كرییە تێدا].
(2) 2. پسیارا بەحس و خەبەر و سالۆخێ مەزن كو ڕۆژا قیامەتێیە ژ ئێك و دو دكەن.
(3) 3. ئەو ڕۆژا ئەو تێدا دودل.
(4) 4. نەخێر دێ زانن، بلا دودل نەبن.
(5) 5. دیسا نەخێر دێ زانن، دەمێ ب چاڤێ سەرێ خۆ وێ ڕاستیا ئەو تێدا دودل، دبینن.
(6) 6. [چاوا هوین باوەرییێ نائینن كو دێ جارەكا دی ساخ بن و ژ گۆڕان ڕابنەڤە، و ڕەخ و ڕویێت هەوە هەمی نیشان و بەلگەنە] ما مە ئەرد بۆ هەوە و ژینا هەوە و جانەوەرێت هەوە، خۆش نەكرییە و ڕانەئێخستییە و بەرهەڤ نەكرییە.
(7) 7. و ما مە چیا نەكرینە سنگ [بۆ ڕاگرتنا ئەردی، دا نەهێت و بچیت، دا نەلڤلڤیت، و دا ب چو ڕەخان نەكەڤیت، و هەكە ئەڤ چیایە نەبانە ئەرد نەدڕاوەستیا، و دا هەر یێ هەژهەژۆك بیت].
(8) 8. و ما مە هوین نەكرینە ژن و مێر.
(9) 9. و ما مە خەو (نڤستن) بۆ هەوە نەكرییە ڤەهەسیان [بۆ نەهێلانا وێ وەستیانا هوین د بزاڤا خۆ یا ڕۆژانەدا دبینن، و جارەكا دی دزڤڕنەڤە سەر بزاڤا خۆ].
(10) 10. و ما مە شەڤ بۆ هەوە نەكرییە پەردە و كراس.
(11) 11. و ما مە ڕۆژ بۆ هەوە نەكرییە دەمێ بزاڤا ژینێ.
(12) 12. و ما مە حەفت ئەسمانێت ب هێز د سەر هەوەدا ئاڤانەكرینە.
(13) 13. و ما مە چرایەكێ گەش بۆ هەوە چێ نەكرییە.
(14) 14. و ما مە بۆ هەوە ئاڤ و بارانەكا بۆش ژ عەوران دانەڕێتییە [و پاشی خودێ تەعالا سوود و مفایێت بارانێ ئاشكەرا كرن و گۆت:]
(15) 15. دا ئەم دان و دەرامەت و شینكاتی پێ بدەین.
(16) 16. و دا باخچەیێت تژی داروبار، پێ بدەین.
(17) 17. بێ گۆمان ئەو ڕۆژا ئەو تێدا دودل كو ڕۆژا جوداكرنا قەنجی و خرابییێیە، ڕۆژا كۆمبوون و ژێك ڤاڤارتنێ، یا د ڕێ و پێشییا هەمی چێكریاندا و هەر دێ ئێت.
(18) 18. ڕۆژا پف ل شاخكی دئێتە دان، ڤێجا هوین پێل پێل دئێن.
(19) 19. و ئەسمان وێ ڕۆژێ ڤەبوون و بوونە دەرگەهـ.
(20) 20. و چیا هەژیان و بوونە لەیلان.
(21) 21. ب ڕاستی [وێ ڕۆژێ] دۆژەهـ ل هیڤییا بێ باوەرانە.
(22) 22. جهە و دویماهیكە بۆ زێدە خرابكاران.
(23) 23. كو هەروهەر دێ تێدا مینن.
(24) 24. تێدا تام ناكەنە هینكاتییێ و ڤەخوارنا تەزی.
(25) 25. ئاڤا شاریای و كێم و زۆخ تێ نەبیت.
(26) 26. ئەڤ جزایە ل دویڤ كریارێت وایە.
(27) 27. د دنیایێدا وان چو بۆ حسابا ئاخرەتێ نەددانا.
(28) 28. و باوەری ب ئایەتێت مە نەدئینان و دگۆتن درەون.
(29) 29. هەمی تشت مە ب نڤێسین و هەژمار، سەركاغەز كرییە و نڤێسییە.
(30) 30. دێ بخۆن ژ ئیزایێ پێڤەتر ئەم نادەینە بەر هەوە [و ژ ئیزایێ پێڤەتر ل هەوە زێدەنابیت].
(31) 31. بێ گۆمان جهێ سەرفەرازییێ بۆ پارێزكار و خودێترسانە.
(32) 32. ژ باغ و هەمی ڕەنگێت تری.
(33) 33. و پەریێت مەمكهلدای و سینگهلدایی و هەڤژی و یەكدەست.
(34) 34. و پەرداغێت تژی مەی [كو سەرێ وان پێ نەئێشیت].
(35) 35. خەلكێ بەحەشتێ د بەحەشتێدا، ئاخڤتنێت پویچ و پەلاچ نابهیسن.
(36) 36. [ئەڤە] دان و خەلاتەكێ دورست و د جهێ خۆدایە، ژ خودایێ تە.
(37) 37. خودانێ ئەرد و ئەسمانان و هندی د ناڤبەرا واندا، خودایێ دلۆڤانە كەس نەشێت د بەرڕا باخڤیت.
(38) 38. ڕۆژا كو جبریل و ملیاكەت ب ڕێز ڕادوەستن، و كەس نائاخڤیت مەگەر ئەو نەبیت یێ خودێ ڕێ بدەتێ، و ئاخڤتنا دورست و د جهێ خۆدا بكەت.
(39) 39. ئەو ڕۆژە یا ڕاست و دورستە، ڤێجا یێ ڤیا بلا ڕێكا ڤەگەڕیانێ ب بال خودایێ خۆڤە خۆش بكەت.
(40) 40. ب ڕاستی مە هوین ژ ئیزایەكا نێزیك ترساندن ڕۆژا مرۆڤ كریارێت خۆ دبینیت، و گاور دبێژیت: خۆزی ئەز هەر ئاخ بامە و ساخ نەبووبامەڤە.