(1) 1. دەمێ ڕۆژ دئێتە وەرپێچان و تاری دبیت، و ڕۆناهییا وێ نەمینیت [كو ئەڤە دەستپێكا خرابكرنا دنیایێیە].
(2) 2. و دەمێ ستێر هلدوەریێن و پارچە پارچە دبن، و گەشاتیا وان دچیت.
(3) 3. و دەمێ چیا بەربا دبن، و ژ جهێ خۆ دەردكەڤن و پرت پرت دبن.
(4) 4. و دەمێ حێشترێت ئاڤس، ژ ترسێت ڤێ ڕۆژێدا، بێ خودان دمینن [بەس ئەڤە نموونەیە بۆ ڕۆنكرن و دیاركرنا ڕەوشا ڤێ ڕۆژێ، چونكی ڕۆژا قیامەتێ چو حێشتر نینن، بەلێ ژ ترسێت ڤێ ڕۆژێدا مالێ ژ هەمییان عەزیزتر ل دەڤ عەرەبان، دێ هێلن و پاتكا خۆ دەنێ، هەلبەت ژ ترس و لەرزا ڤێ ڕۆژێ].
(5) 5. و دەمێ جانەوەرێت كویڤی و دوڕندە دئێنە كۆمكرن، ژ ترساندا كۆم دبنە سەرێك.
(6) 6. و دەمێ كنارێت دەریایان دپەقن، و دەریا خۆ لێك ددەن.
(7) 7. و دەمێ ڕوح جارەكا دی دزڤڕیتە سەر لەشان.
(8) 8. و دەمێ كچا ب ساخی هاتییە بن ئاخكرن، دپرسیت.
(9) 9. ب كیژ گونەهێ هاتییە بن ئاخكرن و هاتە كوشتن.
(10) 10. و دەمێ كاغەزێت كار و كریاران دئێنە بەلاڤكرن.
(11) 11. و دەمێ ئەسمان ژ جهـ دچیت و پرت و پەڕاتە دبیت.
(12) 12. و دەمێ دۆژەهـ دشاریێت و دسنجریت.
(13) 13. و دەمێ بەحەشت بەرهەڤ دبیت بۆ خودێناسان.
(14) 14. هنگی هەر ئێك دێ زانیت، كا چ بۆ خۆ بەرهەڤكرییە.
(15) 15. ئەز سویند دخۆم، ب هەمی ستێرێت ڕۆژێ بەرزە و شەڤێ دیار.
(16) 16. ئەوێت د چەرخێت خۆدا دزڤڕن، و ب شەڤ دچرسن.
(17) 17. ئەز سویند دخۆم، ب شەڤ دەمێ ڕۆناهییێ هلدچنیت.
(18) 18. ئەز سویند دخۆم ب بەرسپێدێ، دەمێ ب ڕۆناهییا خۆڤە دئێت.
(19) 19. ب ڕاستی ئەڤ قورئانە ژ ئینانا جبریلێ خودان ڕێز و ڕویمەتە.
(20) 20. یێ خودان هێزە، و ل دەڤ خودانێ عەرشی [كو خودێیە] جهێ خۆ هەیە.
(21) 21. ملیاكەت ژێڕا گوهدارن، و ل دەڤ خودێ یێ دەستپاكە [ل سەر گەهاندنا پەیاما خودێ].
(22) 22. [گەلی خەلكێ مەكەهێ]، هەڤالێ هەوە [ئەوێ هەوە بەری نوكە هەڤالینی د گەل كری، و باش نیاسی كو موحەممەدە] نە یێ دینە.
(23) 23. پێغەمبەری (سلاڤێت خودێ ل سەر بن)، جبریل ل سەر ڕەنگێ وی یێ دورست و ب ئاشكەرایی ل پەڕێ ئەسمانی دیت.
(24) 24. و [موحەممەد ] یێ بێ كێماسییە ( بێ تەخسیرییە) د گەهاندنا بانگ و پەیاما خودێدا.
(25) 25. و قورئان نە ئاخڤتنا شەیتانەكێ ڕەجماندییە.
(26) 26. هوین دێ كیڤە چن، و چ ڕێكا ژ ڤێ ڕێكێ باشتر دێ گرن؟!.
(27) 27. قورئان شیرەت و ڕۆناهییە ژ بۆ هەمی خەلكی.
(28) 28. بۆ هەر كەسێ بڤێت سەرڕاست و ڕاستەڕێ ببیت.
(29) 29. هوین نەشێن وێ ڕێكا ڕاست ژێ بگرن، ب هاریكارییا خودێ خودایێ هەمی جیهانان نەبیت، (ئانكو ئەگەر خودێ حەز نەكەت هوین نەشێن ڕێكا ڕاست بگرن).