(1) 1. وەی ئیزا و نەخۆشی، بۆ ترازی دز و پیڤان دزان.
(2) 2. ئەوێت دەمێ ب پیڤان و كێشان ژ خەلكی دكڕن، ب دورستی هەقێ خۆ دخوازن.
(3) 3. بەلێ ئەگەر ب كێشان و پیڤان فرۆتن، ترازییێ ددزن و ب دورستی نا كێشن.
(4) 4. ما ئەڤێت هەنێ هزرا ڕابوونا پشتی مرنێ ناكەن؟.
(5) 5. بۆ ڕۆژەكا ب ترس و سەهم [كو ڕۆژا دویماهیێیە].
(6) 6. ڕۆژا هەمی مرۆڤ ل بەر خودێ و ل بەر فەرمانا وی ڕادوەستن.
(7) 7. نەخێر وەنەكەن، هندی دەفتەرا بەدكارانە (گونەهكارانە) د تۆمارا دۆژەهیاندایە.
(8) 8. تو چ دزانی ئەو تۆمارە چییە؟.
(9) 9. دەفتەرەكا ب ناڤ و نیشانە.
(10) 10. وەی ئیزا و نەخۆشییا وێ ڕۆژێ بۆ بێ باوەر و خودێ نەناس و گونەهكاران بیت.
(11) 11. ئەوێت بێ باوەر ژ هاتنا ڕۆژا جزادانێ، و درەو ددانن.
(12) 12. ئەو ب تنێ یێ ژێ بێ باوەرە و درەو ددانیت، ئەوێ ستەمكار و گونەهكار بیت.
(13) 13. دەمێ قورئان بۆ دئێتە خواندن، دبێژیت: ئەڤە گۆتگۆتك و ئەفسانەیێت پێشیانن.
(14) 14. نەخێر وەنینە... بەلكوو گونەهێت وان دلێ وان گرتییە و كۆرە كرییە.
(15) 15. نەخێر... ئەو وێ ڕۆژێ [ڕۆژا دویماهییێ] ژ دیتنا خودێ بێ بارن.
(16) 16. پاشی ئەو دێ چنە د دۆژەهێدا و دێ ئیزای بینن.
(17) 17. پاشی ملیاكەتێت دەرگەهڤان دێ بێژنە وان: ئەها ئەڤە ئەوە یا هەوە باوەری پێ نەی و درەو ددانا.
(18) 18. ب ڕاستی دەفتەرا خۆش مرۆڤ و خودێناسان د جهەكێ بەحەشتێ یێ بلند دایە.
(19) 19. تو چ دزانی، ئەو جهێ بلند یێ چاوایە.
(20) 20. دەفتەرەكا ب ناڤ و نیشانە.
(21) 21. ملیاكەتێت خودان ڕێز و ڕویمەت ل دەڤ خودێ، دێ ڤێ دەفتەرێ ئامادەكەن و ڕۆژا دویماهییێ شادەیێ بۆ دەن.
(22) 22. هندی خۆش مرۆڤ و خودێناسن، دێ د بەحەشتێدا بن.
(23) 23. دێ ل سەر تەختێت چارچەفكری، بەرێ خۆ دەنە وێ خێرا خودێ بۆ وان بەرهەڤكری.
(24) 24. دێ نیشانێت خۆشییێ د ناڤ چاڤێت وانڕا بینی.
(25) 25. دێ ژ مەیەكا سەرمۆر ڤەخۆن.
(26) 26. دویماهییا وێ ڤەخوارنێ تاما مسكێ ددەت، بلا هەڤڕك هەڤڕكییێ ئەها بۆ ڤێ بكەن.
(27) 27. تێكەلێ وێ ژ كانییەكا زێدە ب قەدرە د بەحەشتێدا.
(28) 28. كانییەكە خودێناس و خۆش مرۆڤ ژێ ڤەدخۆن.
(29) 29. ئەوێت ژ ڕێ دەركەڤتین د دنیایێدا، بۆ خۆ ب خودان باوەران دكەنین.
(30) 30. دەمێ د بەر وانڕا دبۆرین، چاڤێت خۆ ل هەڤدوو دنقاندن.
(31) 31. دەمێ دزڤڕینە مال بۆ خۆ دكرنە پێ تڕانك، و خۆشی ژێ ددیتن د سوحبەتێت خۆدا.
(32) 32. و ئەگەر ددیتن دگۆتن: ئەڤەنە یێت گومڕا و ڕێبەرزە.
(33) 33. و ئەو ڕێدەركەڤتی نەهاتینە هنارتن كو زێرەڤانییێ ل وان بكەن.
(34) 34. ئەها ئەڤرۆ (ڕۆژا قیامەتێ) خودان باوەر دێ ب بێ باوەران كەنن.
(35) 35. ل سەر تەختێت چارچەفكری دێ تەماشە كەنە وان.
(36) 36. دا بزانن كا گاور ل سەر گونەهێت خۆ هاتنە جزادان و یا دنیایێ بۆ وان ما!.